شەماڵ بارەوانی
تۆ بوویت
دەمی کازیوەی بەرەبەیانی هۆنراوەکانمت
پڕکرد لە ئێوارەی غەمگینی و
بە تاتەبەردی دڵڕەقیت
جامی پەنجەرەی هەستمت شکاند
تۆ بوویت
پشکۆی سووتانت دا لەجەستەی وشەکانم و
وەرزی وەرینت بۆ خەزانی ئومێدم هێنا
تۆ بوویت
دەستنوێژی ئەوینت بە ئاوی ناپاکی شکاند و
توسبیحی پەیمانت پساند
تۆ بوویت
باڵی چۆڵەکەی چاوەڕوانیت شکاندم و
قۆپچەی کراسی بەختمت پچڕاند
تۆ بوویت
دەستت نایە گەرووی قەڵەمەکەم و
کۆرپەی شیعرمت خنکاند
تۆ بوویت
جانتای خەونەکانمت دزی و
سەبەتەی پێکەنینەکانمت پڕکرد لە پرووشەی گریان
تۆ بوویت
ئاپۆڕای ڕۆحمت بە تەنافی تەنیایی هەڵواسی و
ئەرشیفی بیرەوەرییەکانمت سووتاند
تۆ بوویت
ئاگری ئاتەشگای دڵمت کوژاندەوە و
تەلاری یەسنای خەونەکانمت ڕماند
تۆ بوویت
بە شەستەبارانی دابڕان
بیابانی بینایت تەڕکردم و
دەفتەری خۆزگەکانمت دڕاند