جوانترین بابەتێک کە ئەوڕۆ خوێندمەوەو شایانی خوێندنەوەیە
ئەم دەقە بە پێزە سیمبۆلییەیە
مەهـــا حەلوانی نووسیویەتی
و : عەباس داودی
دەنگ و هاواری فڕۆشیارە گەڕۆکەکە سەرانسەری گەڕەکەکەی تەنیبووەوە..
یەڵڵا کێ بەختەوەری ، شادی..
یەڵڵا کێ غەم.. فرمێسکی کۆنی هەیە بۆ فڕۆشتن
فڕۆشیاری گەڕۆکم خۆش دەوێت..
بە پەلە چوومە لای دایکم و پێم وت: دوو پێکەنینی کۆنم هەیە، خوازیارم بیفڕۆشم .
دایکم وتی : چیت پێ باشە، ئەنجامی بدە
رووم کردە فڕۆشیارە گەڕۆکەکە و هاوارم کرد
مامە .. مامە، پێکەنینی ئەمڕۆ بە چەند دەکڕی ؟
پێی وتم: پێکەنینی منداڵ بە لیرەیەک و پێکەنینی گەورەکان بە هەزار لیرە.. و ئیتر بەمشێوەیە بە گوێرەی تەمەن دەیکڕین .
لە جیاوازی نرخەکان حەپەسام و پێم وت :
مامە گیان پێکەنین پێکەنینە، بۆچی ئەم جیاوازییەی نرخەکان.
بچکۆلەکەم... ڕۆڵە گیان
پێکەنینی گەورەکان دەگمەنن.. ئا ئەمەیە هۆی گرانبوونی نرخەکەی.
ئەوەی وتی، لێی تێنەگەیشتم.. و بەڵام هەردوو پێکەنینەکەم فڕۆشت و پارچەیەک پسکێتم پێ کڕی.
گەڕامەوە ماڵەوە.. پرسیارم لە دایکم کرد، ئەگەر باوکم پێکەنینی کۆنی هەیە.. پێکەنینی گەورەکان پارەی باش دەکەن، و رەواجی باشی هەیە
دایکم تەواوی کونج و قوژبنی ماڵ گەڕا... پێکەنینێکی باوکمی بەردەست نەکەوت(باوکم پێناکەنێت)..!!
و بەڵام زۆرێک لە فرمێسکەکانی دۆزییەوەو پێی دام..
و پێی وتم : ئەمانە بۆ خەرجی سبەینێت...!!
لە رۆژی دواتردا.. کە گوێبیستی دەنگی مامە بووم
کە هەست و سۆز دەکڕێت
بە پەلە چوومە لای و خۆم لێی نزیک کردەوە، پرسیاری نرخی فرمێسکی گەورەکانم لێ کرد
هەڵبەت ئەمەیان گرانبەهایە وەک پێکەنینەکانیان..
پێی وتم : فرمێسکی گەورەکان هەرزانە.. و ئەوە بازرگانی پێوە ناکرێت و وتی : رۆڵە گەورەکان بەردەوام دەگرین ..!!
لە شەقامی کوشتارگە زێیەک هەیە لە فرمێسک و
لەوێ لە گۆڕستان زێیەکی تر
تەنانەت بێوەژنەکەی شەهید یوسف، زیاتر لە دوو بەرمیل پڕاو پڕ فرمێسکی هەیە لێم نەکڕی
کوڕم من پێکەنینی گەورەکان دەکڕم، بەڵام من فرمێسک کڕ نیم و بە خۆڕایی نامەوێت
من بازرگانێکی دەگمەن و کەم وێنە، جیاوازم
شەرەف دەکڕم لە خۆشی فڕۆشەکان
درۆی دایکان و وەفاداری لە بەرپرس
پەند لە شێتەکان
کوڕی خۆم
کارم بە فرمێسکی گەورەمانەوە نییە
گشت گەورەکان دەگرین..!!
پێش ئەوەی مامەی فڕۆشیاری گەڕۆک بەجێم بێڵێت و بڕوات
چرپاندی بە گوێمدا و وتی:
ئەمڕۆ .. رۆژی هەینییە ئەگەر راستییەکت لە گووتارەکەی شێخ دا بەدی کرد، بۆمی بێنە
ئەوە نرخی زۆر گرانە، لێتی دەکڕم ..!!!