ڕاگەیاندراوی كۆبونەوەی سەركردایەتی كۆڕبەندی چەپی كوردستان

لە 26ی شوباتی 2025 لە شاری هەولێردا، سەركردایەتی كۆربەندی چەپی كوردستان، كۆبونەوەی خۆی بەست.

لە كۆبونەوەكەدا باس لەسەر كاری كۆڕبەند وەك پرۆژەی كارێكی تێكۆشەرانەی هاوبەش‌و، ئاماژە بە گرنگی خوێندنەوەی پێشهاتەكانی جیهان‌و ناوچەكە‌و كارتێكردنی لەسەر ڕەوشی كوردستان بە گشتی كرایەوە‌و، لەم بوارەشدا جەختكرایەوە، كە ئاشتی‌و ئاسایش‌و بەیەكەوژیان‌و گەشەپیدان لە تەواوی ناوچەی رۆژهەڵاتی ناوەڕاستدا بێ چارسەركردنێكی دیموكراتی عادیلانەی دۆزی ڕەوای گەلی كوردستان‌و بەهەندوەرگرتنی ئیرادەی ئازادانەی گەلی كوردستان لە هەموو بەشەكانیدا، دابینناكرێت.

كۆبونەوەی كۆڕەبەند لە كاتێكدا جەختی لەسەر كاراكردنی ڕۆڵ هێزی چەپی كوردستان لە بزووتنەوەی ڕزگاریخوازی گەلەگەمان كردەوە، ئاماژەی بە گرنگی گرێدانی خەباتی نیشتمانیی كوردستانی بە خەبات لە پێناوی دەستەبەركردنی تەواوی ئازادییە دیموكراتییەكان‌و پاراستنی مافی مرۆڤ‌و داكۆكی لە مافی ژنان‌و پاراستنی ژینگەی كوردستان‌و خەبات لە پێناوی عەدالەتی كۆمەڵایەتی كردەوە‌و، بەم جۆرەش گوتاری چەپ تایبەتمەندی خۆی بێ لێڵی لە تێكۆشانی ڕۆژانەی جەماوەردا دەردەكەوێت‌و، ئاراستەی چەپی كوردستانی وەك هێزێكی سیاسی لە خەباتی نیشتمانیدا كاراتر دەبێت.

كۆبونەوەكە ئاماژەی بە گرنگی كاری هەماهەنگی‌و هاوبەشی سەرجەم لایەنە سیاسییەكانی سەرجەم بەشەكانی كوردستان كردەوە، بە جۆرێك تایبەتمەندی خەبات‌و سەربەخۆیی بڕیاری سیاسی‌و دەستێوەرنەدان لە ناوەندەكانی بڕیاری سیاسی هەر بەشێكی كوردستان، بپارێزرێت.

ئامادەبووانی كۆبونەوەی كۆڕبەندی چەپی كوردستان هەڵسەنگاندنی ئەرێنییان هەبوو بۆ سێیەمین دیداری چەپی كوردستان كە لە 25ی شوبات لە هەولێردا بەناونیشانی (گۆڕانكاریە نێودەوڵەتی‌و هەرێمایەتییەكان‌و كاریگەری لەسەر كوردستان) بەسترا‌و، ئاماژەیان بەوە كرد، كە نەرمی‌و مرونەت نێوان سەرجەم لایەنە بەشداربووەكان لە پانێلەكاندا‌و هەڵێنجانی خاڵی هاوبەش‌و، بەشداری كەسایەتی سیاسی بەرچاوی چەپ‌و بەرهەمدار لە بواری هزر‌و سیاسەتدا لە دەرەوەی لایەنەكانی كۆڕبەندی چەپی كوردستان‌و، كرانەوە لەگەڵ دید‌و بۆچوونەكانی هێزەكانی دیكەی دەرەوەی چەپ، شوناسی سەرەكی دیدارەكە بوو. جگە لەم خاڵە گرنگە ئامادەبووانی دیدارەكە ئاماژەیان بە گرنگی گریدانی ئەم جۆرە چالاكییە‌و كاری هاوبەشی چەپ كردەوە.

لە كۆتایی كۆبونەوەكەدا سەركردایەتی كۆڕبەندی چەپی كوردستان كۆمەڵێك بڕیاری گرنگی سەبارەت بە كاراكردنی میكانیزمەكانی كاری ڕێكخستنی كۆڕبەند وەرگرت.

كۆڕبەندی چەپی كوردستان

(باكور: حزبی كۆمۆنیستی كوردستان‌و، حزبی سۆشیالیستی كوردستان. ڕۆژهەڵات: كۆمەڵەی زەحمەتكێشانی كوردستان. ڕۆژئاوا: پارتی كۆمۆنستی كوردستان.باشور حزبی زەحمەتكێشانی كوردستان‌و حزبی شیوعی كوردستان‌و بزووتنەوەی دیموكراتی گەلی كوردستان)

26/ شوباتی 2025