ڕۆژی شەممە ٢١-١٠-٢٠٢٣ لەلایەن مەڵبەندی هەولێری حزبی شیوعی کوردستان کۆڕێک بۆ هاوڕێ سوبحی مەهدی ئەندامی کۆمیتەی ناوەندی حشک، بە ئامادەبوونی ژمارەیەک لە کادیرانی مەڵبەند، سەبارەت بە دیموکراسیەت و هەڵبژاردن ڕێکخرا.
لە کۆڕەکەدا هاوڕێی کۆڕگێڕ ڕۆشنایی خستەسەر هەڵبژاردن وەکوو کۆڵەگەیەکی سەرەکی و گرنگی دیموکراسیەت، هەروەها سەرنج و ڕەخنەکانی لەبارەی هەردوو چەمک لە هەرێمی کوردستان و بە لاڕێدابردنیان خستەڕوو و لێکەوتە خراپەکانی شیکردەوە لە بواری حوکمڕانی و قۆرخکاری و زاڵبوونی گیانی خۆسەپاندن بەسەر ڕای ڕاستەقینەی گەل و گوێنەدان بە دەنگی هاووڵاتیان.
لەلایەن بەشداربووانەوە گفتوگۆ سەبارەت بەکۆی بابەتەکە کرا و جەختکرایەوە پرۆسەی هەڵبژاردن و دیموکراسیەت بە ڕێچکە سروشتیەکەی خۆیدا بەڕێوەنەبراوەو ئەنجامە نێگەتیڤەکانیشی لە هەموو بوارەکاندا لە هەرێمی کوردستان بەدیدەکرێت.