كاتێك بەرژەوەندیی حزبی خەونی هەموان دەخاتە مەترسیەوە، خێڵەكان زیندوو دەبنەوە و میلیشیاش چەكەكانی پاك دەكاتەوە، ئەوە چەقینی یاسایە لەنێو قوڕی دەسەڵاتێكدا كە بەنەقیزەش دەرچوونی ئەستەم دەبێت، لێرەدا رەشماڵەكانی دەسەڵات شەماڵێك دەتوانێ لوولی دبدا.
هەرێمی كوردستان لەوەتەی هەیە هەر بەقۆناغێكی مێژوویی هەستیاردا تێپەڕ دەبێت، كە كەمتر مێژووی هاوچەرخی كوردی بەقەت ئەمڕۆ تێبینی حەزی تاكەكان و فراوانی بنەماڵەكانی كردووە، ئەو دەستكەوتە نیشتمانی و دەستوورییانەی كە بە خوێنی هەزاران شەهید و قوربانیی بێشوماری گەلەكەمان هاتنەدی، دواجار نەك هەر نەیانتوانی ببنە سەكۆیەك بۆ ئارامی و خۆشگوزەرانی، بەڵكو ئەمڕۆ لە بەردەم مەترسییەكی ڕاستەقینەی ناوخۆیی و دەرەكیدان، پاڵنەری سەرەكی ئەم مەترسییەش، چەقینی پەرلەمان و پێداگریی خێڵەكیانەیە لەسەر دەسەڵات و پشتبەستنی دوو حزبی باڵادەستە بە ستراتیژی سڕكردنی دۆخەكە لەپێناوی بەرژەوەندییە كۆنەكانیاندا.
پەرلەمان كە دەبێت ڕەنگدانەوەی ئیرادەی گەل و جێگەی یەكلاكردنەوەی قەیرانە نیشتمانییەكان بێت، بەهۆی ململانێی دوو بنەماڵەی سەرەكییەوە تووشی ئیفلیجی و چەقین بووە. ئەم چەقینە تەنها كێشەیەكی یاسایی یان كارگێڕی نییە، بەڵكو ڕەنگدانەوەی عەقڵییەتێكی خێڵەكی و عەشایەریی سیاسییە كە تێیدا باڵادەستی و قۆرخكاریی هێز لەپێش هاوڵاتیبوون و دامەزراوەییەوە دادەنرێت.
ئەم دوو حزبە كاتێك ناتوانن لەسەر دابەشكردنی كورسی دەسەڵات ڕێكبكەون، پرۆسەی پێكهێنانی كابینەكانی حكومەت دوا دەخەن و دامەزراوە دەستوورییەكان پەكدەخەن، یان دەیكەنە منەت و بەبێبەرامبەر بە هاوڵاتیانی دەفرۆشنەوە، هاوكێشەكە ڕوونە: پشكی زیاتر لە هەرێمێكی پارچەكراو و لاوازدا، لای ئەوان هێشتا بەنرخترە لە هێشتنەوەی هەرێمێكی بەهێز و یەكگرتوو، ئاكامی ئەم جۆرە بیركردنەوەیەش، ڕیشەكێشكردنی هێواشی ئەو خەونە مەزنانەیە كە گەلەكەمان دەیان ساڵە چاوەڕوانی دەكات.
ئەوانەی ئەمڕۆ لەپێناوی دەسەڵاتی زیاتردا كۆسپ دەخەنە بەردەم یەكڕیزی، تێناگەن كە لە كاتی هەر داڕمانێكی قەوارەكەدا، خۆیان دەبنە نیشانە و یەكەم گوللەی هەرێمایەتی بەر جەستەی ئەوان دەكەوێت، چونكە هێزە ناوچەییەكان ڕێز لە لایەنی لاواز و پارچەبوو ناگرن و هەمیشە بەنێو درزەكاندا دێن و هەوڵی فراوانكردنی دەدەن، وەك ئەو پلانە ژەهراویانەی هەڵیدەدەنە سەر مێزەكانی هەردوولاو ئەوانیش دژی یەكتری نۆشی دەكەن.
ڕۆژانە لە میدیاكان و لێدوانی بەرپرسانی ئەم دوو لایەنەدا، شایەتی شەڕە دەنووك و قسە نەقیزە ئاساییەكانین، قسەگەلێك كە تەنها بۆ برینداركردنی یەكتری و ڕاكێشانی سۆزی كاتیی سەرشەقام بەكاردێن، پرسیارە جەوهەرییەكە لێرەدایە، ئەگەر ئەو وزە و كاتەی بەم جۆرە دژایەتییە بەفیڕۆ دەدرێت، بخرایەتە خزمەت گفتوگۆیەكی كراوە و نیشتمانی، ئایا دۆخەكە بەم ئاستە دەگەیشت؟
ئاخر تاكڕەوی لە بڕیاردا هەمیشە شكست دەهێنێت، پێویستە حزبە باڵادەستەكان گوێ لە هێزە سیاسییەكانی دەرەوەی خۆیان و ڕێكخراوەكانی كۆمەڵگەی مەدەنی و نوخبەی ڕۆشنبیر بگرن، پۆشاكی خێڵ و بنەماڵە لەخۆیان بكەنەوە و چاو لە رابردوو بكەن تا ئایندەیەكی گەش بۆ هاوڵاتیان بدۆزنەوە ئەوكات گفتوگۆی نەرم لەپێناوی هاوڵاتیاندا رێگەی دەرباز بوونیان دەبێت و دەبێت ئامانجی كۆتایی ڕێككەوتنەكان دابینكردنی بژێوی و خۆشگوزەرانی و پاراستنی كەرامەتی هاوڵاتیان بێت، ئەوكات زمانە زبر و تیژەكان دەگۆڕێن بۆ زمانی لێكتێگەیشتن.
كاتێك نیەتەكان بەرەو خزمەتی گشتی و نیشتمانی وەربچەرخێن، گەورەترین كێشە سیاسییەكان كە ئێستا وەك كێوی سەهۆڵین دەبینرێن، تائاستی بیرچوونەوە بچووك دەبنەوە، جیاوازیی بیروڕا لە سیستمی دیموكراسیدا دیاردەیەكی تەندروستە، بە مەرجێك نەبێتە هۆی هەڵوەشاندنەوەی ماڵی كوردی لەبەردەم باهۆزە دەرەكییەكاندا، ئەو باهۆزانەی لە سنوورەكانەوە دێن و خەریكە تاوڵی خێڵەكان و دیوەخانی بنەماڵەكان لوولدات.
كاتی ئەوە هاتووە پاشەكشە بە عەقڵییەتی خێڵگەرایی سیاسی بكرێت و بنەمای هاوڵاتیبوون و پاراستنی خوێنی شەهیدان بكرێتە پێوەری سەرەكی تەنها لەو كاتەدا دەتوانین دڵنیابین كە گوللەی نەیاران ناگاتە جەستەی ئەم قەوارەیە و مێژووش بە شانازییەوە باسی ئەم قۆناغە دەكات.
