لە کۆنگرەی هەشتەمی پارتی چەپی ئەوروپیدا کە لە ١٧ و ١٨ی نیسانی ٢٠٢٦ بەڕێوەچوو، مارتن مارتێز، سکرتێری گشتیی پارتی کاری بەلجیکا، وتارێکی کاریگەری پێشکەش کرد و تێیدا هۆشداریی دا لە تێوەگلانی ئەوروپا لە پێشبڕکێیەکی شێتانەی چەکداربوون و گۆڕانی بۆ سوپایەکی ئیمپریالیستی. مارتێز جەختی کردەوە کە سیستەمی ئێستا لەبری دیموکراسی، بەرەو ستەمکاری و پاراستنی بەرژەوەندیی قۆرخکارییە گەورەکان هەنگاو دەنێت، کە ئەنجامەکەی تەنها جەنگ و وێرانکارییە. ئەو داوای کرد ئەوروپا نەک تەنها لە ئەمریکا سەربەخۆ بێت، بەڵکو ببێتە سیستمێکی سۆسیالیستی جیاواز کە کۆتایی بە تاڵانکردنی سامانی گەلان و ڕەوانەکردنی گەنجان بۆ بەرەکانی جەنگ بهێنێت. لە کۆتاییدا ئاماژەی بەوە کرد کە سۆسیالیزم تەنها ڕێگەی ڕاستەقینەیە بۆ دەستەبەرکردنی دادپەروەری و پاراستنی خزمەتگوزارییە گشتییەکان، و داواشی کرد بە متمانەوە کار بۆ گۆڕینی جیهان بکەن.