رۆژنامەی ماركا چاوپێكەوتنێكی لەگەڵ رۆناڵدینیۆی ئەفسانەی پێشووی هەڵبژاردەی بەڕازیل و یانەی بەرشەلۆنە ئەنجامداوە، تێیدا ئەفسانەكە وەڵامی چەند پرسیارێكی سەبارەت بە بەرشەلۆنە و چەند بابەتێكی تر داوەتەوە.
لە قسەكانیدا باسی لەوەكردووە، بەرشەلۆنە دووبارە بووەتەوە یانەیەك كە چێژ بە هاندەرەكانی دەبەخشێت و پاش ساڵانێكی زۆر لە قەیران ئێستا دووبارە هەست بە شادی دەكرێت تێیدا.
وتیشی: بەرشەلۆنە و ریاڵ مەدرید دوو یانەی گەورەن، بەڵام لەم وەرزە بەرشەلۆنە لە هەموو روویەكەوە شكستی بە ریاڵ هێنا و هیوادارم ئەم رێگایە بەردەوامبێت.
جەختی لەسەر ئەوەشكردەوە، لە ئێستادا بەرشەلۆنە خاوەنی یاریزانی لاوە و ئەو لاوانەش چاونەترسن، هیواداریشە تیپەكە ببێتە پاڵەوانی چامپیۆنز لیگ چونكە فلیك زۆر بەباشی تیپەكەی رێكخستووەتەوە.
وتیشی: من و مێسی مێژوومان تۆمار كردووە، ئێستا نۆرەی لامین یامالە، ئەوەی تا ئێستا لێی بینیومانە، لەم تەمەنەدا و بە بەهرەیەكی زۆرەوە، نائاساییە، چێژ لە بینینی یاریزانانی وەك ئەو وەردەگرم، هیوادارم لەسەر ئەو ئاستە بەردەوامبێت.