ڕاپۆرت/ دلێر عەلی
لە ژێر دروشمی "دەنگی ژن، دەنگی یەکبوون و ئازادییە"، شاری سلێمانی میوانداریی کۆبوونەوەیەکی فراوان و چارەنووسسازی "پلاتفۆرمی یەکێتی نەتەوەیی ژنی کورد-باشوور"ی کرد. ئەم کۆبوونەوەیە، کە بە بەشداریی زیاتر لە ١٠٠ نوێنەر و کەسایەتیی ژن لە سەرتاسەری باشووری کوردستان و ڕێکخراوە جیاوازەکان بەڕێوەچوو، وەک وەرچەرخانێکی مێژوویی لە خەباتی ڕێکخراوەیی ژناندا ئەژمار دەکرێت.
ستراتیژیی یەکبوون: لە گوتارەوە بۆ کردار
کۆبوونەوەکە بە ساتێک وەستان بۆ ڕێزگرتن لە گیانی پاکی شەهیدان دەستی پێکرد، و دواتر دەرگای گفتوگۆیەکی کراوە و چڕوپڕ واڵا کرا. جەخت لەسەر ئەوە کرایەوە کە ژنی کورد لە ئێستادا تەنها کارەکتەرێکی ناو مێژوو نییە، بەڵکو وەک بزوێنەرێکی سەرەکی، سەرقاڵی نەخشاندنی ئایندەیەکی سیاسی و کۆمەڵایەتیی نوێیە. ئامادەبووان کۆک بوون لەسەر ئەوەی کە "یەکگرتوویی" تەنها دروشم نییە، بەڵکو تاکە چەکی کاریگەرە بۆ ڕووبەڕووبوونەوەی ئەو ئاستەنگە نەتەوەیی و ڕەگەزییانەی کە ڕووبەڕووی کۆمەڵگەی کوردی دەبنەوە.
نەخشەڕێگای کارکردن
لە ئەنجامی گفتوگۆکاندا، پلاتفۆرمەکە نەخشەڕێگایەکی نیشتمانیی بۆ قۆناغی داهاتوو پەسەند کرد، کە ئەم خاڵە جەوهەرییانە لەخۆ دەگرێت:
دامەزراندنی ژووری هەماهەنگیی بەردەوام: پێکێهێنانی لێژنەیەکی باڵا بۆ یەکخستنی گوتاری سیاسی و میدیایی ژنان لە کاتی قەیرانە نەتەوەیی و ڕەگەزییەکاندا.
پەیماننامەی شەڕەفی نەتەوەیی: واژۆکردنی بەڵێننامەیەک کە بەرژەوەندییە باڵاکانی ژن و نیشتمان دەخاتە سەرووی هەموو ململانێیەکی حیزبی و ناوچەیی، بە ئامانجی تێپەڕاندنی سنوورە دەستکردەکان.
فشاری یاسایی و سیاسی (Lobby): دروستکردنی گروپێکی کاریگەر بۆ چاودێریکردنی دامەزراوە تەشریعی و جێبەجێکردنەکان، تا ڕێگری بکەن لە دەرچوونی هەر یاسایەک کە زیان بە مافەکانی ژنان و ناسنامەی نەتەوەیی بگەیەنێت.
دیپلۆماسی و پەیوەندییە نێودەوڵەتییەکان: گواستنەوەی خەباتی ژنان بۆ ئاستی نێودەوڵەتی و بەکارهێنانی کەناڵە دیپلۆماسییەکان بۆ ناساندنی دۆزی ژنی کورد.
سەکۆی میدیایی هاوبەش: دامەزراندنی ناوەندێکی ڕاگەیاندنی سەربەخۆ کە گوزارشت لە ئیرادەی ڕاستەقینەی ژن بکات، دوور لە جەمسەرگیرییە سیاسییەکان.
کۆنفرانسی ساڵانە: بڕیاردرا کۆبوونەوەی "ژنی کورد و ئاییندەی نیشتمان" بکرێتە نەریتێکی ساڵانە بۆ هەڵسەنگاندنی دەستکەوتەکان و داڕشتنی پلانی نوێ.
بەرپرسیارێتی بەرامبەر بە پارچەکانی تری کوردستان
پلاتفۆرمەکە جەختی لەسەر پێویستیی پاڵپشتیکردنی ژنانی تێکۆشەر لە هەموو پارچەکانی کوردستان کردەوە، بە تایبەت ئاوڕدانەوەی جدی لە دۆخی ژنانی شەنگال و قوربانیانی توندوتیژی. هەروەها جەخت لەسەر بوژاندنەوەی زمانی کوردی وەک کۆڵەکەیەکی سەرەکیی ناسنامەی نەتەوەیی کرایەوە.
دەرەنجام:
ئەم کۆبوونەوەیە پەیامێکی ڕوون بوو بۆ هەموو لایەک؛ کە ژنی کورد لە باشووری کوردستان خاوەن ئیرادەیەکی یەکگرتووە و ئیدی ڕێگە نادات مافە سیاسی و کۆمەڵایەتییەکانی ببنە قوربانیی بەرژەوەندییە لاوەکییەکان.بە دروشمی ژن ژیان ئازادی کۆتایی بە کۆبوونەوەی پلاتفۆرمەکە هات .
