رۆیتەرز بڵاویكردەوە سعودیە و كوێت هێرشیان كردۆتە سەر چەند پێگەیەكی گروپە چەكدارەكانی عێراق ئەوانەی لەلایەن ئێرانەوە بەڕێوەدەبرێن.
لە هەواڵەکەی رۆیتەرزدا هاتووە "فڕۆکە جەنگییەکانی سعودیە هێرشیان کردووەتە سەر چەند شوێنێکی سەر بە گرووپە چەکدارە پاڵپشتیکراوەکان لەلایەن ئێرانەوە لە نزیک سنوورە باکوورییەکانی عێراق. زانیارییەکان ئاماژە بەوە دەکەن کە ئەم هێرشانە ئەو شوێنانەیان کردووەتە ئامانج کە فڕۆکەی بێفڕۆکەوان و مووشەکیان لێوە ئاڕاستەی سعودیە و وڵاتانی تری کەنداو کراوە".
"سەرچاوەکان پێشبینی ئەوە دەکەن کە هەندێک لەو ئۆپەراسیۆنانە لە نزیک کاتی ڕاگەیاندنی ئاگربەستی نێوان ئەمریکا و ئێران لە ٧ی نیسان ئەنجامدرابن، هەروەها چەند هێرشێکی مووشەکی لە خاکی کوێتەوە بەرەو ناوخۆی عێراق ئەنجامدراون".
ئاژانسەکە ئاماژەی بەوەکردوە کە سەرچاوەکان پێیان راگەیاندوون کە "ئەو هێرشانە پێگەی گرووپە چەکدارەکانیان لە باشوور کردووەتە ئامانج و بووەتە هۆی زیانی گیانی و تێکشکاندنی ئەو دامەزراوانەی کە پێدەچێت بۆ ئۆپەراسیۆنی فڕۆکەی بێفڕۆکەوان و پەیوەندییەکان بەکارهێنرابن، تا ئێستا ڕوون نییە ئایا ئەو مووشەکانە لەلایەن هێزە چەکدارەکانی کوێتەوە تەقێنراون یان لەلایەن هێزەکانی ئەمریکاوە کە لەو وڵاتە جێگیرن".
رۆیتەرز دەڵێت کە "لایەنە فەرمییەکانی کوێت و عێراق ئامادە نەبوون لێدوان لەسەر ئەم بابەتە بدەن، هەروەها هیچ لێدوانێکیش لە سوپای ئەمریکاوە دەرنەچووە".
ڕۆیتەرز لە زاری بەرپرسێکی وەزارەتی دەرەوەی سعودیەوە زانیاری بڵاوکردوەتەوە کە ڕیاز کار بۆ "کەمکردنەوەی گرژییەکان دەکات و داوای دانبەخۆداگرتن دەکات"، بێ ئەوەی ڕاستەوخۆ ئاماژە بە پرسی هێرشەکانی ناو عێراق بکات.
بە پێی زانیارییەکانی ئاژانسەکە هێرشەکان ئەو پێگانەیان کردووەتە ئامانج کە پێدەچێت پەیوەندییان بە "کەتائیبی حزبوڵا"وە هەبێت، کە گروپێکی چەکداری پاڵپشتیکراوی ئێرانە، بەڵام تا ئێستا هیچ لێدوانێکی فەرمی لەو بارەیەوە نەدراوە لای ئەوانەوە.