بەشی سێیەم
یەك: واقیعێكی نوێ
ئامانج لە بەشەكانی پێشوو، تەنیا خستنەڕووی گۆڕانكارییەكان نییە لە ئاستی ئەزموون و پەیوەندییەكانی نێوان تیۆر و واقیعدا، بەقەد ئەوەی هەوڵێكە بۆ بینینی واقیعێكی نوێ كە بەدوای خۆیدا پێویستیی داڕشتنەوەی چوارچێوەیەكی تری فكری، سیاسی و ڕێكخراوەیی هێناوەتە پێشمان.
پەراوێزخراوان، بزووتنەوە كۆمەڵایەتی و ژینگەییەكان، كەمینەكان و گەنجان، لەمڕۆدا هێزی ڕاستەقینەی گۆڕانكاریی كۆمەڵایەتی و سیاسین. لە واقیعی ئەمڕۆی كوردستان و جیهاندا، لە ڕووی چەندایەتیشەوە رێژەیان لە هەڵكشانی بەردەوام دایە بەتایبەت "پریكاریات" (ئەوانەی كاری ناجێگیر، بێ بیمە و بێ گرێبەستیان هەیە). لە ساڵی ٢٠٢٦دا، ئەركی ئێمەیە وەك هێزە چەپەكان، كە دۆزی كرێكار لە دروشمبازی و چوارچێوەی تەقلیدی (كە تەنیا كرێكاری كارگەیە) دەربهێنین، تا ئەو هەزاران گەنجەش بگرێتەوە كە لە بوارەكانی "دیلیڤەری"، "كۆمپانیاكانی كەرتی تایبەت" و "كارە كاتییەكان"دا دەچەوسێنرێنەوە. ئەمە ئەو سوپا نوێیەیە كە هیچ ئاسایشێكی دەروونی، دارایی و پیشەیی شك نابات.
دوو: چینێك بۆ خۆی
پرسەكە لێرەدا تەنیا دەستنیشانكردنی هێزەكانی گۆڕانكاری نییە، بەڵكو پرۆسەی گۆڕینیانە لە "چینێك لەپێناو خۆیدا" بۆ "چینێك بۆ خۆی". لێرەوە دیالەكتیكی ماركس دەردەكەوێت؛ كرێكاران لە سەرەتادا تەنیا كۆمەڵە خەڵكێكن كە كار دەكەن، بەڵام كاتێك تێدەگەن كە دەچەوسێنرێنەوە، ئەوكاتە جۆرێك لە سوبێكتی كارا لەدایك دەبێت و دەبنە هێزی گۆڕانكاری.
دەبێت پێگەی كرێكار وەك "میتافۆر" لە ڕەهەندی فەلسەفی و مرۆییەوە وەربگرین، نەك تەنیا لە ڕەهەندی میكانیكیانەی ئابوورییەوە.
سێ: ڕێكخستنی نوێ
میتۆدە كۆنەكانی ڕێكخستن لە بەرامبەر سەرمایەداریی جیهانگیردا سەرنەكەوتن. عینادیی سیاسی كارێكی شۆڕشگێڕانە نییە، بەڵكو پێویستمان بە "پراكسیس"ێكی نوێیە؛ ڕێكخستن لە ڕێگەی تۆڕە كۆمەڵایەتییەكان، دروستكردنی هاوپەیمانی لە نێوان چینە پەراوێزخراوەكاندا (ژینگەییەكان، ژنانی كاركەر، بێكاران و كەمینەكان)، و گۆڕینی "ناڕەزایەتیی كاتی" بۆ "هۆشیاریی سیاسیی بەردەوام". دۆزی كرێكار وەك "میتافۆر" لە ساڵی ٢٠٢٦دا، دۆزی گێڕانەوەی كەرامەتە بۆ مرۆڤ لە جیهانێكدا كە دەیەوێت مرۆڤ تەنیا وەك "ژمارە" و "بەكارهێنەر" ببینێت.
یەكی ئایاری ٢٠٢٦، نابێت تەنیا یادكردنەوەیەكی مێژوویی بێت، بەڵكو دەبێت ڕۆژی داڕشتنی نەخشەڕێگایەك بێت بۆ ڕزگاركردنی "ژیان" لە چنگی پرۆسەی "بە كاڵابوون". ئەوەش تەنیا بە ڕێكخستنی ڕێپێوانێكی ساڵانەی تەقلیدی لە چەند شارێك بەدی نایەت، كە دواتر تا ساڵێكی تر لێی بخەوین!
لەم كوردستانەدا، سەبارەت بە هەزاران هاووڵاتیی پەراوێزخراو (ئەو گەنجانەی لە "دیلیڤەری"، "كۆمپانیاكانی كەرتی تایبەت" و "كارە كاتییەكان"دا دەچەوسێنرێنەوە، ئەو سوپا نوێیەی كە هیچ ئاسایشێكی دەروونی، دارایی و پیشەیی شك نابات، هەروەها كارمەندان، ژنانی كاركەر، بێكاران، كەمینەكان و خاوەن گرێبەستە كاتییەكان)، ئایا پرسیارمان لەخۆمان كردووە كە ڕۆژەكانی دوای یەكی ئایار چییان بۆ دەكەین، تا هەست بكەن فكر و چوارچێوەیەكی سیاسیی پێشڕەو بوونی هەیە؟
ئایا دەتوانین شتێكی واقیعییان پێشكەش بكەین و لەم دۆخی نائومێدییەدا هیوایەك بخەینە سەر ڕێگایان، و ببینە ئومێد لە جیهانێكی نائومێدكراو و بێدەسەڵاتكراودا؟
بۆ ئەوەی پێگەی كرێكار و پەراوێزخراوان وەك بكەر (سوبێكت)ی گۆڕانكاریی جیهانی ببینین، پێویستمان بە خستنەڕووی پڕۆژە و دیدێكی واقیعییە. بەبێ بوونی پڕۆژەیەك كە هێزی فكری، سیاسی، ئابووری، كۆمەڵایەتی و پیشەیی هەبێت لە بەرامبەر هێزی دەسەڵاتدا و لە وردەكاریی ژیانی ڕۆژانەدا ڕەنگ بداتەوە، ئەستەمە بتوانین لەمڕۆدا ڕۆڵ ببینین و ببینە هیوا. ئەمەش بەبێ خۆتەكاندنێكی بەهێز بەدی نایەت؛ خۆتەكاندنێك كە ڕابردوو تێپەڕێنێت و لەمڕۆدا بژی، تا ژیانێك دروست بكات كە ژیانی ڕاستەقینە بێت.
