بەشی سێیەم: لە بەردەم ڕووبەڕووبوونەوەی تاكتیكیدا بۆ ستراتیژیەتی گۆڕانكاری
هیوا عومەر
لە كۆتایی ئەم هەفتەیەدا كارەكانی كۆنگرەی هەشتەمی حزب دەستپێدەكات. لەم ڕۆژە مێژووییەدا، هەزاران ئەندام و ڕێبەرانی ڕێگای یەكسانی و دادپەروەری بەئومێدەوە لە هەواڵی سەركەوتنی كارەكانی كۆنگرە دەڕوانن. ئەمە كۆنگرەی حزبێكە، نزیكەی سەدەیەكە ڕیشەی تێكۆشانی لەم ناوچەیەدا داكوتاوە. حزبێكە هیچ كووچە و كوڵانێك و بن گاشەبەردێك نەماوە جێ پەنجەی بەسەرەوە نەبێت لەپێناو نیشتمانێكی ئازاد و گەلێكی بەختیاردا، بەڵام لەگەڵ ئەم مێژووە شكۆدارەشدا، سەدان پرسیار و تێگەیشتنی جیاواز دروستبووە كە دەبێت وەڵامی بدرێتەوە لە بارەی كارەكانی كۆنگرە و چۆنیەتی گۆڕانكاری و نوێكردنەوەی حزب و دەربازكردنی لە دۆخی ئەمڕۆیدا.
هەر گۆڕانكارییەك بەئاراستەی نوێبوونەوە بێت، خزمەت بە مێژووی پڕ تێكۆشانی ڕابردوو و داهاتووی حزب دەكات، گرێدانەوەیەكی مێژوویی لە تێكۆشانی دوێنێ و ئەمڕۆ دێنێتە كایەوە، بەئامانجی درێژەدان بە خزمەتكردن و خەباتكردن لەپێناو خۆشگوزەرانی كۆمەڵگەدا.
تاكتیكەكان و ئەزموونەكان؛ بنیاتنانی ستراتیژیەتی نوێ:
ڕاستییەك ڕووبەڕوومان دەبێتەوە كە ناتوانین نادیدەی بكەین: بەبێ دەستنیشانكردنی بەربەستەكانی گۆڕانكاری و نوێبوونەوە لەناو حزبدا، ناتوانین لەوەی ئێستا هەیە باشتر بكەین. لە بەشی دووەمی ئەم زنجیرە وتارەدا هێڵەگشتییەكانم باسكردووە، لەم وتارەدا زیاتر تەركیز لەسەر گوتاری سیاسی و فكری و چۆنیەتی بەجێهێنانی ئەو گۆڕانكارییانە دەكەم.
ئەم كۆنگرەیە لە هەلومەرجێكی گۆڕاو دەبەسترێت، كە پڕە لە پێكدادانی نێودەوڵەتی و ناوخۆیی. لە ئاستی هەرێمیدا، شەڕی نێوان دەوڵەتی ئێران و ئیسرائیل ڕۆژانە سەدان مووشەك بە ئاسمانی كوردستانەوە تێدەپەڕێت. شەڕێك كە هیچ پەیوەندییەكی ڕاستەوخۆی بە پرسەكانی مافی مرۆڤ و دیموكراسی و چارەسەركردنی قەیرانەكانەوە نییە، بەڵكو بەشێكە لە درێژەی شەڕی گۆڕانكارییەكان لە پارسەنگی هێز و هەژموونی هەرێمی و جیهانیدا، ئەمەش ئەوە ناگەیەنێت كە وەك دەرفەتێك ناتوانرێت مامەڵەی لەگەڵدا بكرێت.
لە لایەكی ترەوە، پەیوەندییەكانی بەغدا و هەولێر تا ئێستا گرژتر دەبن، لە كاتێكدا هەزاران مووچەخۆر و هاووڵاتی لە چاوەڕوانی مووچە و دابینكردنی كاری شیاو و بیمە سەرەتاییەكانی وەك بیمەی بێكاری و تەندروستیدا دەژین. لە ئاستی ناوەخۆشدا، هیچ مانایەك بۆ بەشداریی سیاسی هاووڵاتییان و ڕۆڵیان لە سیستەمی حوكمڕانیدا نەماوەتەوە، دوای زیاتر لە شەش مانگ هێشتا پەرلەمان پێكنەهێنراوە و حكومەتیش كاربەڕێكەرە.
سیاسەتی نیولیبرالی و كاریگەرییەكانی لەسەر چینی كرێكار:
سیاسەتی نیولیبرالیزمی حكومەتی هەرێم تا ئێستا زیاتر كەرتەكان بەتایبەت دەكات و هەراجی دەكات بە كۆمپانیاكانی خۆیان یان نزیك لە خۆیان. هەنگاو بە هەنگاو حكومەت واز لە ئەركە كۆمەڵایەتی و ئابوورییەكانی دەهێنێت، هەر رۆژە و باج و سەرانەیەك زیاددەكات، ئەمەش بووەتە هۆی ئەوەی زیاتر لە یەك ملیۆن هاووڵاتی بچنە ژێر هێڵی هەژاری. چینی ناوەڕاست بەرەو پووكانەوە و لەناوچوون بڕوات و ناوەندێكی فراوانی پەراوێزخراوان دروستبوون.
ئەم دۆخە نوێیە داوای لێكدانەوەیەكی ڕەخنەگرانە و بنیاتنانی ستراتیژیەتێكی گشتگیر دەكات، كە توانای ڕووبەڕووبوونەوەی لەگەڵ قەیرانە یەك لەدوای یەكەكاندا هەبێت. لێرەدا پرسیارگەلێك ڕووبەڕووی كارەكانی كۆنگرە و دوای كۆنگرەش دەبێتەوە، كە پێویستە بەشێوەیەكی سیستماتیك وەڵامیان بدرێتەوە.
ستراتیژیەتی بزووتنەوەی چینایەتی:
یەكەم پرسیار: رۆڵی حزب چی دەبێت لە خستنەڕووی بەرنامەیەك و چوارچێوەیەكی كاركردن بۆ بەهێزكردنی تێكۆشانی چینایەتی و داكۆكیكردن لە ناوەندی پەراوێزخراوان و كرێكاران و كارمەندان؟ چی دەكات بۆ ئەوەی لایەنی كەم پرسی دابینكردنی كاری شیاو و بیمەی بێكاری و تەندروستی ببێتە پرسێكی سیاسی جەماوەری؟
ئەم پرسیارە دەمانهێنێتەوە بۆ بنیاتی فكری حزبی چەپگەرا و چۆنیەتی بەجێهێنانی ئەركە مێژووییەكەی. حزب دەبێت بەشێوەیەكی ئاشكرا لای كرێكاران و كارمەندان و تەواوی پەراوێزخراوان بێت و ڕۆڵی ڕێكخەری سیاسی و كۆمەڵایەتی بگێڕێت. ئەمە ئەوە دەگەیەنێت كە حزب دەبێت بەرنامەیەكی ڕوون و تاكتیكەكانی گونجاو دابنێت بۆ گۆڕینی دۆخی ئابووری و كۆمەڵایەتی.
بزووتنەوەی ژنان و جیلی نوێ:
دووەم پرسیار: دەتوانێت چی بكات بۆ بزووتنەوەی ژنان و هەزاران كچ و كوڕی پەراوێزخراو؟
ئەم پرسیارە بابەتێكی ستراتیژییە لە بزووتنەوەی چەپگەرادا. ژنان و نەوەی نوێ وەك هێزی گۆڕانكاری تازەن، هاوشێوەی ئەو رۆڵەی پێشتر كرێكار بەمانا كلاسیكییەكەی دەیبنی، ئەمانە ئەڵقەی ناوەندی تێكۆشان و گۆڕانكارین . حزب دەبێت بەرنامەیەكی تایبەتی هەبێت بۆ بزووتنەوەی ژنان، كە هەم مافە كۆمەڵایەتی و ئابوورییەكانیان و هەم بەشداری سیاسییان لەخۆبگرێت، هەروەها دەبێت پرۆگرامێكی تایبەتی هەبێت بۆ گرتنەبەری هەزاران گەنج، كە لە دۆخی پەراوێزخراویدان پەراوێزخراوییەك تەنها ڕەهەندی ئابووری نییە، بەڵكو ڕەهەندێكی وجودی و كلتووری و كۆمەڵایەتی و رۆشنبیریشە .
گوتاری كوردستانی و چارەسەری پرسەكانی نێوان هەولێر و بەغدا:
سێیەم پرسیار: چی دەكات بۆ خستنەڕووی گوتارێكی كوردستانی لەدەرەوەی گوتاری حزبەكانی دەسەڵات بۆ چارەسەركردنی پرسە هەڵواسراوەكانی نێوان هەولێر و بەغدا و تەواوكردنی قۆناغی ڕزگاری نیشتمانی؟
ئەم پرسیارە گرنگی تایبەتی هەیە لە بارەی چۆنیەتی دیاریكردنی هەڵوێستی حزب لە پرسە نیشتمانییەكاندا. حزب دەبێت گوتارێكی سەربەخۆی هەبێت لەدەرەوەی هەژموونی عەقڵیەتی زۆنی زەرد و سەوز و ناوەندێتی بەغداشدا، بەڵكو هەڵگری گوتارێك بێت كە لە بنیاتدا بەرژەوەندی گەلی كوردستان و ئامانجەكانی ڕزگاریی نیشتمانی بخاتە پێشەوە و ڕێگەی دیالۆگ و مامەڵەی دیپلۆماتیك و سیاسی، بە بەشداری جەماوەری كوردستان پەسەندبكات، ئەمەش بەبێ چارەسەركردنی قەیرانەكانی ناوەخۆی هەرێم چێنابێت .
پڕۆژەی سیاسی جێگرەوە:
چوارەم پرسیار: ئایا حزب دەتوانێت بیر لە خستنەڕووی ئەڵتەرناتیڤ، پڕۆژەیەكی جێگرەوەی سیاسی و جەماوەری چەپگەرا بكاتەوە بۆ گەڕاندنەوەی شكۆی مرۆڤ و ئیرادە بۆ گەلێكی بێهیواكراو لە نیشتمانێكی داگیركراودا؟
ئەمە لەوانەیە گرنگترین پرسیار بێت كە ڕووبەڕووی كۆنگرە دەبێتەوە. ئایا حزب توانای دروستكردنی پڕۆژەیەكی سیاسی جێگرەوەی هەیە كە بتوانێت بەفراوانی لەگەڵ هیوا و ئاوات و خەونەكانی گەل بگونجێت؟ ئەم پڕۆژەیە دەبێت لە بنیاتی فكری و ستراتیژیدا چەپگەرا بێت، واتە پشت بە هێزە كۆمەڵایەتییەكان ببەستێت و بەرژەوەندی چینی كرێكار و فەرمانبەران و پەراوێزخراوان بخاتە چەقی كارەكانی.
گوتاری سیاسی و فكری نوێ:
پێنجەم پرسیار: دەتوانێت لەدەرەوەی هێزەكانی دەسەڵات و هێزە پۆپۆلیستەكان، گوتارێكی سیاسی و فكری هەبێت، كە توانای بەجەماوەریكردنی هەبێت بۆ پرسە كلتووری و كۆمەڵایەتی و ئابووری و سیاسییەكان؟
ئەم پرسیارە بابەتی دروستكردنی گوتارێكی سەربەخۆ و نوێ دەخاتەڕوو، كە نە لەژێر هەژموونی هێزەكانی دەسەڵاتە و نە پشت بە شێوازی پۆپۆلیستی دەبەستێت، بەڵكو گوتارێك كە لە بنیاتدا عەقڵانی و زانستی و دیموكراتیكە و دەتوانێت وەڵامی گونجاوی پرسە جۆراوجۆرەكانی كۆمەڵگە بداتەوە بە میتۆدێكی ماركسیتی، كە گونجاو بێت لەگەڵ ئەم قۆناغەی ئێستای كۆمەڵگەی كوردی، بتوانێت كۆمەڵێك ئەركی رۆشنگەری و عەقڵانییەت و مەدەنییەت وەربگرێت، لێرەدا بنەما فكرییەكانی ئەم چەمكانە ڕوونە، كە دەبێت چۆن بێت .
سەروەرییەكانی ڕابردوو:
شەشەم پرسیار: دوای كۆنگرەی هەشت، حزب چی دەكات بۆ ئەوەی چیتر لەسەر مێژوو و سەروەرییەكانی دوێنێی نەژیێت؟
ئەم پرسیارە ئەگەر لەم كۆنگرەیەدا وەڵام بدرێتەوە وەچەرخانێكی بەهێز دروست دەكات: حزب دەبێت بتوانێت لە مێژووەكەی فێر ببێت، هەروەها لە بیركردنەوەی كۆنەكانی دەرباز بێت، كە چیتر گونجاو نین بۆ هەلومەرجی ئەمڕۆ. ئەمە پێویستی بە شیكردنەوەیەكی ڕەخنەگرانەی هەمەلایەن هەیە، پێشتر لە بەشی یەكەمی ئەم زنجیرە وتارەدا باسكراوە، جا ئەمە نەك تەنها بۆ ئەزموونەكانی حزب خۆی، بەڵكو ئەزموونی بزووتنەوەی چەپ بەگشتی. بۆیە دەبێت بەپشتبەستن بە ئەزموونی ڕابردوو و ڕوانین لە واقیعی ئێستا و میتۆدی نوێی كاری حزبی، ڕێگەچارە بۆ تەكنیك و ستراتیژی دوورمەودا دابنێن، كە چۆن حزبێكی سۆسیالیستی لە دۆخێكی ئاوادا دەتوانێ لە ئایندەدا كاریگەر بێت و دەسەڵات وەربگرێت بە ئامانجی خزمەتكردنی كۆمەڵگە.
سەركردایەتی نوێ و ئامانج و ئەكتی سیاسی نوێ:
حەوتەم پرسیار: دەتوانێت سەركردایەتییەك هەڵبژێرێت بە هەماهەنگی لەگەڵ بنكەحزبییەكان و جەماوەر و هێزە چەپ و دیموكراتییەكان سەروەری تازە بۆ خۆی و گەل و نیشتمانەكەی بنووسێتەوە؟
ئەم پرسیارە كۆتاییدێت لەگەڵ پرسیارێكی ستراتیژی دەربارەی سەركردایەتی و ڕوانین بۆ داهاتوو. ئایا حزب دەتوانێت سەركردایەتییەك هەڵبژێرێت، كە هەم لەگەڵ بنكەكانی خۆی هەماهەنگ بێت و هەم بتوانێت دەستی ڕابگات بە هێزە چەپ و دیموكراتییەكانی تر بۆ دروستكردنی ئەڵتەرناتیڤێكی گەورەتر؟ وەڵامی ئەمە لەدوای كۆنگرە ڕووندەبێتەوە و لە جێبەجێكردنی كارنامەی حزبدا خۆی بەیان دەكات.
ڕۆڵی مێژوویی و بەرپرسیارییەتی ئەمڕۆ:
لە كۆتاییدا، ئەم هەموو پرسیارانە دەگەڕێنەوە بۆ پرسیارێكی بنیاتی: ئایا ئەم كۆنگرەیە دەتوانێ جارێكی تر حزب و فكری چەپ بە واقیعی تازە خۆماڵی بكاتەوە؟ لەپێناو ئەوەی ببێتە چەترێكی تێكۆشانی تازە، چەترێك كە لە یەككاتدا كرێكارێك و كارمەندێك و كچ و كوڕێكی پەراوێزخراو بەیەكەوە بۆ مافە چینایەتییەكان و تەواوكردنی قۆناغی ڕزگاریی نیشتمانیش كۆبكاتەوە؟!
كۆنگرەی هەشت، دەرفەتێكی مێژووییە بۆ وەڵامدانەوەی ئەم پرسیارانە و دروستكردنی پایە و بنیاتی هەنگاوی نوێ لە مێژووی تێكۆشانی گەلی كوردستاندا. لەگەڵ ئەوەشدا سەركەوتن ئیرادەی شۆڕشگێڕانە و بیركردنەوەی ڕەخنەگرانەی دەوێت بۆ گۆڕانكاریی بنچینەیی و ڕیشەیی.
