سەدیق سەعید ڕواندزی
سەرۆك كۆماری ئێران، لە كاتی گەڕانەوەی لە ڕێوڕەسمی بڕینی قردێلە و كردنەوەی پڕۆژەی بەنداوێك، بە هۆكاری تێكشكانی فڕۆكەكەی لە ناوچەیەكی سنووری باكووری خۆرئاوای ئێراندا گیانی لەدەستدا. فڕۆكەكەی سەرۆكی ئێران، گەرچی چەندین تایبەتمەندی فلایی و تەكنیكی و خزمەتگوزاریی و بەهاناوە هاتنی هەبوو، كەچی دواجار ئەمانە فریای ڕەئیسی نەكەوتن و كەوتە قووڵایی جەنگەڵێكەوە. مردنی ڕەئیسی، دەنگانەوەیەكی گەورەی لە نێوەندی سیاسی و دیبلۆماسی و جەماوەری لە ئێراندا لێ كەوتەوە، چونكە سەرۆك بوو، لە كاتێكدا ڕۆژانە لە سایەی دەسەڵاتی ئیسلامی ئەو سەرۆكەوە، بە سەدان گەنج و ئازادیخواز و چاڵاكوانانی فێمێنیزم و خەمخۆرانی زمانی دایك، زیندانی دەكرێن و لە سێدارە دەدرێن، بەداخەوە كەسیش خوێنی ڕژاویان نابینێت. لەوڵاتانی ڕۆژهەڵاتی ناوەڕاست و وڵاتە دواكەوتووەكان و بگرە هەرێمەكەی خۆشمان، سەرۆكەكان و بەرپرسە گەندەڵەكان، چونكە خزمەتكردن و ئەنجامدانی پڕۆژەی خزمەتگوزاری بۆ هاووڵاتییەكانییان بە بەخشش و دەسكەوت و خێری خۆیان دەزانن، نەك خزمەت و ئەركی ڕاستەقینەیان ، ئیدی ئارەزوو دەكەن ئەگەر پڕۆژەی كردنەوەی كولانەیەكی مریشك، تەوالیتێك، گەرماوێك، تەوێڵە و ئاخوڕێكیش بێت، خۆیان ئامادەبن و بە شانازیی و خۆ دەرخستنەوە ئەوە بڵێن كە ئێمە چی بۆ ئێوە دەكەین. لەو ڕووداوەدا، هەمووان بە دوای چارەنووسی سەرۆكێكی گەورەوە بوون، كە بۆ كردنەوەی پڕۆژەیەكی ئاسایی دەیان كاتژمێر بە ئاسمانەوە دەفرێت. شڕۆڤەكاران و چاودێران، جۆرەها خوێنەوەیان بۆ ڕووداوەكە كرد، بەڵام كەسیان پرسیاری ئەوەیان نەكرد، ئایا مەرجە كە هەر دەبێ سەرۆكە گەندەڵەكانی ڕۆژهەڵات و وڵاتە دواكەوتووەكان، خۆیان پڕۆژە بكەنەوە؟ باشە نەدەكرا لە بری سەرۆك، ئوستاندارییەك، بەڕێوەبەرێك، كارمەندێكی ژینگە دۆست بەنداوەكە بكاتەوە؟ كردنەوەی بەنداوێك، مەگەر لووتكەی كۆمكاری وەزیرانی دەرەوەیە، تا وەزیری دەرەوەی ئێران، یاوەری سەرۆك بكات؟ ئایا مەرجە هەر پڕۆژە و خزمەتگوزارییەك هەبوو،دەبێ سەرۆك یان بەرپرسە گەندەڵەكان ئامادەبن؟ زۆر جار لەكوردستان سەرنج دەدەم، ئەو بەرپرسانەی شریتی پڕۆژەیەك دەبڕن و دەكەنەوە، دە بەرانبەر زیاترن لە خەڵكی ئاسایی شوێنەكە و هاووڵاتییان. بگرە دەكەنە پاڵدان و قەراپەستییەك و تێك قژقژانێك ئەوسەری دیار نەبێت تەنها بۆ ئەوەی لە شاشە دەرچن و ببینرێن! لە كاتێكدا، مەرجی هەر دەسەڵات و حكومەتێكە، خزمەتگوزاریی و پڕۆژەی بچووك و ژێرخانی بۆ هاووڵاتییەكانی بكات، بەبێ ئەوەی بەدەسكەوتی خۆی بۆیان بزانێت. دواجار دەڵێم، چەند مانگێك لەمەو بەر، لە سۆنگەی بۆردومانكردنی ماڵی سەرمایەدارێكەوە لەلایەن ئێران، بەرپرسانی هەرێم خەریك بوو هەمووومان بە گژ ئێران دابدەن و چەندین خۆپیشاندانییان لە دژی ڕەئیسی بە خەڵكی كرد، كەچی ئێستا بە پرتاو دەگەنە تاران و بەشداری پرسەكەی دەكەن و هاوخەمی خۆیان دەردەبڕن. ئەم دوو ڕووییە سیاسییە چییە؟ مەگەر ئێران هەر ئێران و ئەوەشی مردووە، هەر ڕەئیسی جاران نین؟ دە بڕۆن بەشداری پرسەی كۆڵبەرێكی داماوی ڕۆژهەڵاتیش بكەن، كە لە پێناو نانێكی ئاساییدا، بە دەستی ئێران و سەرۆكەكانییەوە ڕۆژانە شەهید دەكرێن !
پەراوێز:_ سیاسەتی یەكسانی لە نێوان ئافرەت و پیاودا، لە بڵاوكراوەكانی : وەزارەتی ناوخۆ_پەیمانگای پەرە پێدانی ئەمنی و كارگێڕی و تەكنەلۆژیای زانیاری، زنجیرە (9)، چاپی یەكەم _ 2019.
*ئەم بابەتە لە هەفتەنامەی ڕێگای كوردستان ژمارە (1378) لە 2/20/ 2024 بڵاوكراوەتەوە.
