ئەو دەنگانەی لە پەرلەمانی عێراق بەرز دەبنەوە پێویستە بە هەند وەربگیرێت
لە نێو هۆڵی پەرلەمانەوە پێشێلکردنێکی ئاشکرای دەستوور و بنەمای شەراکەت لە عێراق دەکرێت
ڕێگای کوردستان
لە دواین دانیشتنەکانی ئەنجومەنی نوێنەرانی عێراقدا، گوتاری توند و موداخەلەی پەرلەمانتارانی لایەنە جیاوازەکانی شیعە و سوننە دژی هەرێمی کوردستان گەیشتە ئاستێکی نوێ. چاودێرانی سیاسی ئەم پەرەسەندنە بە زەنگێکی مەترسیدار، بۆ سەر قەوارەی دەستووریی هەرێم وەسف دەکەن و هۆشداری دەدەن کە نابێت ئەم لێدوانانە تەنها وەک ململانێی سیاسی ببینرێن، بەڵکو پێویستە بەهەند وەربگیرێن.
بە بڕوای چاودێران، ئەو هەڕەشانەی لە ناو هۆڵی پەرلەمانەوە ئاڕاستەی هەرێم کران، ئاماژەن بۆ ئەوەی کە ئەگەر لایەنە کوردییەکان ناوماڵی خۆیان ڕ ێکنەخەن و یەکڕیز نەبن، مەترسییەکان جدیتر دەبن. جەخت لەوەش دەکرێتەوە کە پێویستە دەسەڵات لە هەرێم بە پەلە دۆخی بژێوی و ژیانی هاووڵاتیان باش بکات و بوێرانە دان بە هەڵەکانیدا بنێت، چونکە ناڕەزایەتی ناوخۆیی و نەبوونی یەکڕیزی، زەمینە خۆش دەکات کە لە داهاتوودا ئەم هەڕەشانە لە قسەوە ببنە کردار و زیانی گەورە بە پێگەی هەرێم بگەیەنن.
لە لایەکی دیکەوە، پسپۆڕانی سیاسی ئاماژە بەوە دەکەن کە ناوەڕۆکی موداخەلەکانی ئەم دواییەی پەرلەمانتاران، پێشێلکردنێکی ئاشکرای دەستوور و بنەمای شەراکەتە لە عێراقدا. ئەم جۆرە مامەڵەیە نەک هەر زیان بە پرۆسەی سیاسی دەگەیەنێت، بەڵکو هەوڵێکە بۆ پەکخستنی ئەو ڕێککەوتنانەی کە عێراقی نوێی لەسەر بونیاد نراوە.
چاودێران پێیان وایە تەنها ڕێگەی ڕووبەڕووبوونەوەی ئەم گوتارە دوژمنکارانەیەی بەغدا، بەگەڕخستنەوەی پەرلەمان و پێکهێنانی حکومەت و ئەنجامدانی چاکسازیی ڕاستەقینە و دروستکردنی بەرەیەکی نیشتمانیی یەکگرتووە لە ناوخۆی هەرێمی کوردستاندا.
