راپۆرت: حەسەن یاسین
ل دەڤەرێن سنووری کۆمەکا ڕوداوێن دل ئشێن ل سەر ژینگەها دەڤەرێ ڕووددەن، کو نەبتنێ دبنە ئەگەرا تێکدانا ڕووپەلێ سروشتێ کوردستانێ، بێدەنگیا ل هەمبەر ڤێ دیاردەیێ ژی پرسیارێن مەزن ل جەم هاووڵاتیان دروست دکەت. لەشکەرێ تورکیا ل ناڤا ئاخا هەرێما کوردستانێ، ب شێوەیەکێ بەرفرەھ دەست ب بڕینا دارستانان کرییە بۆ مەڕەمێن خۆ یێن تایبەت و خۆگەرمکرنێ ل وەرزێ سەرمایێ، کو ب دەهان گوند و دەڤەرێن جودا وەك گوندێ کێستە، هرورێ، سەرێ چیایێ مەتینی ل دەڤەرا کانی ماسێ، ناوچەیا ئامێدیێ ب گشتی و دەڤەرا باتیفا و بێگوڤا ڤەگرتینە.
بارهەلگرێن پڕ ل دارێن تەڕ ل بەر چاڤێن خەلکێ دەڤەرێ و ب ئاشکرا، داروبارێ بڕی ڤەدگوهێزنە جهێن مەرەم پێ هەی بخۆ، ب بێی کو چ ڕێگری لێ بێتە کرن یان بێژنە وان "ڕاوەستن، ئەڤ کارە قەدەغەیە". تاڵانکرنا ڕووبەرێن مەزنێن کەسکاتیێ ل ڤان دەڤەران بوویە کارەساتەکا ژینگەهی کو کاریگەریا وێ ب درێژاهیا ساڵان ل سەر سروشتێ ناوچەیێ دێ مینیت.
ئاستەنگ بۆ هاووڵاتیان و بێدەنگی بۆ لەشکەرێ بێگانە
ل لایەکێ دی، هاووڵاتیێن دەڤەرێ تووشی ئاستەنگێن زۆر دبن؛ دەمێ هاووڵاتیەك بۆ مەڕەما سووتەمەنیێ هندەك دارێن هشك بەتە مالا خۆ، پێدڤی بەلگەنامە و کیتابێن ڕەسمی یە ژ فەرمانگەها دارستانێ، قایمقامیەتێ و ناحیێ ب دەست خۆڤە بینیت تا بشێت وان داران ببەت.
دیارترین نموونە ل خالا پشکنینێ یا "قومریێ" دهێتە ل بەر چاڤ، کو ئۆتۆمبێل و پیکەمێن هاووڵاتیان دهێنە ڕاگرتن، بەلگەنامەیێن وان ژێ دهێنە وەرگرتن و دار ب دار پشکنین بۆ دهێتە کرن دا پشتڕاست ببن کو چ دارێن تەڕ دناڤدا نینن. بەلێ ل هەمان شوێن و ب هەمان کات، لۆری و بارهەلگرێن لەشکەرێ تورکیا کو پڕ ل دارێن تەڕن، ب بێی چ پشکنین یان پرسیار دەرباز دەبن!
هەلویستێ فەرمی ل کیڤە یە؟
ئەڤ جوداهیا ڕوون ل ڕەفتارکرنێ و بێدەنگیا دەزگەهێن فەرمی ل هەمبەر ڤێ سووکایەتیا ب ژینگەها وڵاتی دهێتە کرن، بارگرانیەکا دەرونی ل جەم خەڵکێ ناوچەیێ دروستکریە. پرسیارا سەرەکی یا خەڵکێ دەڤەرێ ئەڤە یە:
چما چ هەلویستەکێ توند ژ لایێ جهێن پەیوەندیدار ڤە نینە؟
چما ڕێگری ل ڤێ کارەساتا ژینگەیی ناهێتە کرن، ل دەمەکێ کو هاووڵاتی ب خۆ بۆ چەند دارێن هشك دهێنە ئەزیەتکرن؟
پاراستنا دارستانێ و ژینگەها کوردستانێ ئەرکەکێ نیشتمانی یە، و هێشتا خەڵك ل هیڤیا بەرسڤەکا ئاشکرا و هەلویستەکێ جدی یێن لایەنێن پەیوەندیدارن داکو رێگریێ ل ڤێ تاڵانکاریا ڕۆژانە بگرن.