ئێوارەتان باش
ئامادەبوانی بەڕێز،
میوانانی ئازیز،.
بنەماڵەی هاوڕێی کۆچکردومان، کەمال شاکر.
لە سەرەتادا، سوپاس و پێزانینی خۆم پێشکەشی بەڕێزتان دەکەم لە ،نوێنەرانی لایەنەسیاسیەکان و حکومەت وڕێکخراوو کەسایەتیەکان و بنەماڵەی سەربەرزی شەهیدان، پێشمەرگە دێرینەکان، زیندانیانی سیاسی و هەموو میوانانی ئازیز دەکەم کە ئەمڕۆ بە ئامادەبوونی خۆیان لەم کۆڕیادەدا، لەگەڵمان بەشداربوون لە ڕێزگرتن لە یادی تێکۆشەرێکی دیار و کەسایەتییەکی سیاسیی خۆڕاگر .
کۆبونەوەی ئەمڕۆمان بۆ یادکردنەوەی یەکێک لە خەباتگێڕانی ڕێگای ئازادی و دیموکراسی و دادپەروەری کۆمەڵایەتییە ، یادی کەسایەتییەک کە بەشی زۆری ژیانی خۆی بۆ ئەم ئامانجانە تەرخانکردبوو، کە ئامانجی گەلەکەمان وتێکۆشەرەکانی و حزبمان حزبی شیوعی عێراق وکوردستان بوون.
بەڕێزان!
چل ڕۆژ لەمەوبەر، بزووتنەوەی چەپ و دیموکراسی کوردستان و عێراق، کەسایەتییەکی سیاسی و تێکۆشەرێکی ماندوونەناسی خۆی لەدەستدا؛ ئەویش هاوڕێ کەمال شاکر بوو.
هاوڕێ کەمال لەو کەسایەتییانە بوو کە ژیانی خۆی لەپێناو بەدیهێنانی ئامانجێکی گەورەدا بەخت کرد،کە ئامانجی بنیاتنانی کۆمەڵگایەک بوو کە تێیدا مرۆڤ ئازاد و خاوەن شکۆمەندی بێت، کرێکاران و زەحمەتکێشان مافەکانیان بە بەدەست بهێنن، دیموکراسی ببێتە بنەمای ژیانی سیاسی و دادپەروەریی کۆمەڵایەتی لە ئاستی دروشم و بانگەشەوە بگوازرێتەوە بۆ ڕاستییەکی زیندوو لە ژیانی خەڵکدا.
هاوڕێ کەمال لە درێژایی ژیانی سیاسی و تێکۆشانی خۆیدا، بەردەوام لە پێناو ئەم ئامانجانەدا خەباتی کرد. بۆیە، ئەم کۆڕیادە، تەنها یادکردنەوەی کەسایەتییەکی سیاسی وتێکۆشەر نییە؛ بەڵکو یادکردنەوەی بەشێکە لە مێژووی خەباتی چەپ و دیموکراسی و مێژوویەکە لە خەباتی کرێکاران و زەحمەتکێشان و هەوڵی نەوەیەک کە ئازادی و دادپەروەریی بە نرخێکی گران بەدەست هێناوە.
بەڕێزان... لە حەفتاکانی سەدەی ڕابردوودا، هاوڕێ کەمال ئەرکی سکرتاریەتی یەکێتیی لاوانی دیموکراتی عێراقی لە ئەستۆ گرت و ڕۆڵێکی گرنگی لە بەهێزکردنی ئەو ڕێکخراوە و بڵاوکردنەوەی بیری نیشتمانپەروەری و دیموکراتی لە نێو لاواندا گێڕا.
ئەو تەنها خاوەنی باوەڕێکی سیاسی نەبوو، بەڵکو هەوڵی دەدا لە ڕێگەی کار و تێکۆشانەوە ئەو باوەڕە بکاتە هێزێکی کاریگەر لە کۆمەڵگادا. بەڵام ئەم ڕێگایە ئاسان نەبوو؛ ڕێگایەک بوو پڕ لە زەحمەت، زیندان، ئەشکەنجە و قوربانی.
خەبات و هەڵوێستە سیاسییەکانی، هاوڕێ کەمالی تووشی ستەم و چەوساندنەوەی ڕژێمە یەک لە دوای یەکەکانی عێراقکردەوە . بەشێکی زۆری ژیانی لە زیندان و بەندیخانەدا بەسەر برد و تەنانەت حوکمی لەسێدارەدانیش بەسەردا سەپێنرا.
بەڵام ئەوەی لەم مێژووەدا جێی تێڕامانە، ئەوەیە کە زۆرداری نەیتوانی باوەڕی بشکێنێت و زیندان نەیتوانی ویستی خەبات وئامانجەکانی حزبەکەی وگەلەکەی لە ناخیدا بکوژێنێتەوە.
ئەو بە ژیانی خۆی نیشانی دا کە خەبات بۆ ئازادی و دادپەروەری تەنها بە قسە و دروشم ناگاتە ئامانج؛ بەڵکو پێویستی بە خۆڕاگری، خۆبەختکردن و وەفادارییەکی بەردەوام هەیە.
ئامادەبوانی هێژا
دوای ڕاپەڕینی بەهاری ساڵی ١٩٩١ی کوردستان و لە دەرئەنجامی هەلومەرج و گۆڕانکارییە سیاسییەکانی ئەو قۆناغەدا، حزبی شیوعی کوردستان لە ساڵی ١٩٩٣ وەک وەڵامدانەوەیەکی پێداویستییەکانی ئەو هەلومەرجەی خەبات وەک حزبێکی سیاسی سەربەخۆ ودڵسۆزی تایبەتمەندی گەلی کوردستان ڕاگەیەنراو هاوڕێ کەمالیش بەئەندامی کۆمیتەی ناوەندی و مەکتەبی سیاسیی حزب هەڵبژێررا و لە ڕێگەی ئەو ئەرکانەوە بەردەوام بوولە خزمەتی ڕێکخستن و بەهێزکردنی کار و تێکۆشانی سیاسی .
لە کۆنگرەی سێیەمی حزب، کە لە ٢٠٠٤ دالە سلێمانی بەڕێوەچوو، بە سکرتێری کۆمیتەی ناوەندی هەڵبژێردرا و تا کۆنگرەی شەشەمی حزب لە ساڵی ٢٠١٦ ئەم ئەرکەی لە ئەستۆ بوو.
ئەو ساڵانە بەشێکی گرنگ بوون لە ژیانی سیاسیی هاوڕێمان کەمال شاکر. ساڵانی ئەرک و بەرپرسیارێتی، ڕووبەڕووبوونەوەی ئاستەنگ و هەوڵدان بۆ بەردەوامیی ڕێکخستن و خەباتبووە.
بێگومان، هەڵسەنگاندنی تەواوی ژیانی ئەو تێکۆشەرە، پێویستی بە لێکۆڵینەوە و خوێندنەوەیەکی وردی مێژوویی هەیە؛ بەڵام ئەوەی لەم کۆڕیادەدا گرنگە، ئەوەیە کە ژیانی ئەو وەک بەشێک لە مێژووی خەباتی سیاسی و دیموکراسی کوردستان، شایانی یادکردنەوە و هەڵسەنگاندنە.
یادی ئەو کاتێک بەڕاستی زیندوو دەمێنێتەوە کە بتوانین لە ئەزموونەکانی ڕابردوو فێر ببین، لە قوربانییەکانی تێبگەین و ئەو ئامانجانەی کە لەگەڵ هاوڕێکانیدا خەباتیان بۆ کردووە، لە ژیانی سیاسی و کۆمەڵایەتیماندا بە زیندوویی ڕابگرین.
بەڕێزان!
کۆڕیادی ئەمڕۆ تەنها بۆ یادکردنەوەی ڕابردوو نییە؛ بەڵکو دەرفەتێکە بۆ بیرکردنەوە لە ئەرکەکانی ئێستا و داهاتوو، لەو ئاستەنگانەی کە ڕووبەڕووی کوردستان و عێراق بوونەتەوە و لەو بەرپرسیارێتییە نیشتمانییەی کە لە ئەستۆی هەموومانە.
کاتێک لەم مەراسیمەوە سەیری دۆخی ئەمڕۆی عێراق، کوردستان و ناوچەکە دەکەین، دەبینین ناوچەکە بە ڕووداوو گۆڕانکارییە خێراکاندا تێدەپەڕێت. نەخشەی ململانێ سیاسی و ستراتیژییەکان دەگۆڕێت، هاوسەنگیی هێزەکان دەجوڵێت و ئەرک و بەرپرسیارێتییەکانمان لە قۆناغێکی هەستیاردا قورستر دەبن.
لە عێراقیشدا، هێشتا کێشە بنەڕەتییەکان پەیوەست بە مافەکانی گەلی کوردستان بەپێی دەستور چارەسەر نەکراون. ئەم کێشانە، لەگەڵ ئەو ئاڵنگارییانەی کە لە ناوچەکەدا ڕووبەڕووی کوردستان دەبنەوە، بەرپرسیارێتییەکی گەورە لەبەردەم هێز و لایەنە سیاسییەکانی هەرێمدا دادەنێن.
لە ڕووی ناوخۆییشەوە، بێ‌متمانەیی سیاسی، تێکچوونی هاوسەنگییەکان و زیادبوونی ناکۆکییەکان لە ناوچە جیاوازەکاندا، مەترسییەکان زیاتر دەکەن و توانای هاوبەشیی نیشتمانی لاواز دەکەن.
لەبەرامبەر ئەم دۆخەدا، پێویستمان بە خوێندنەوەیەکی زانستی و واقیعی هەیە؛ خوێندنەوەیەک کە دوور لە هەست و بەرژەوەندیی تەسکی حیزبی، لەسەر بنەمای ڕاستییەکان، بەرژەوەندیی گشتی و داهاتووی گەلەکەمان بوەستێت.
چونکە ناتوانین بە هەمان شێوازی بیرکردنەوە و کارکردنی ڕابردوو، وەڵامی هەموو پرسیار و ئاستەنگە نوێیەکان بدەینەوە. قۆناغی ئێستا پێویستی بە هەڵسەنگاندنێکی ڕەخنەگرانەی ئەزموونەکانمان، دەستنیشانکردنی هەڵەکان و گرتنەبەری ڕێگایەکی نوێ و بەرپرسیارانە هەیە.
ئەوەش پێویستی بە ئیرادەی سیاسی، ئازایەتیی بڕیاردان و باوەڕێکی ڕاستەقینە بە هاوبەشی و هاوکاری هەیە.
بەڕێزان!
دەبێ بە ڕوونی ئەوە بڵێین کە دەستکەوتەکانی خەباتی دەیان ساڵەی گەلەکەمان بە نرخێکی زۆر گران بەدەست هاتوون.
قەوارەی هەرێمی کوردستان تەنها پێکهاتەیەکی ئیداری و سیاسی نییە؛ بەڵکو دەستکەوتێکی نیشتمانییە کە لە ناخی خەبات و خۆڕاگریی گەلەکەماندا ڕەگی داکوتاوە.
لەبەر ئەوە، پاراستنی قەوارەی هەرێمی کوردستان لەم قۆناغە هەستیارەدا تەنها ئەرکێکی سیاسی نییە؛ بەڵکو بەرپرسیارێتییەکی نیشتمانی و مێژووییە لە ئەستۆی هەموو هێز و لایەنە سیاسییەکان و هەموو ئەو کەسانەیە کە باوەڕیان بە ماف و داهاتووی گەلەکەمان هەیە.
نابێ بە بیانووی جیاوازیی حیزبی، ململانێی ناوخۆیی یان پاراستنی بەرژەوەندییە تەسکەکان، ئەو دەستکەوتانە بخەینە مەترسییەوە کە بە خوێنی شەهیدان و خەباتی درێژخایەنی گەلەکەمان بەدەست هاتوون.
پاراستنی ئەم دەستکەوتانە بە قسە و دروشم مسۆگەر نابێت؛ بەڵکو پێویستی بە بەرپرسیارێتی، بڕیاری دروست، یەکڕیزیی سیاسی و کارکردنی ڕاستەقینە هەیە.
لە هەمان کاتدا، پاراستنی قەوارەی هەرێم نابێ ببێتە بیانوو بۆ پشتگوێخستنی پێویستیی چاکسازی، دادپەروەری، دیموکراسی و مافەکانی هاووڵاتیان. بە پێچەوانەوە، بەهێزکردنی بنەماکانی حوکمڕانیی باش، حاکمییەتی یاسا و متمانەی گشتی، لە هۆکارە سەرەکییەکانی پاراستنی قەوارە و بەهێزکردنی پێگەی هەرێمن.
بەڕێزان!
ئەمڕۆ زیاتر لە هەر کاتێک پێویستمان بە یەکڕیزی، تەبایی و پێکەوەکارکردنی ڕاستەقینە لە نێوان هێز و لایەنە سیاسییەکانی کوردستاندا هەیە.
یەکڕیزییەک کە تەنها لە کۆبوونەوە و ڕاگەیاندنەکاندا نەبینرێت؛ بەڵکو لە بڕیارەکان، بەرنامەکان، شێوازی مامەڵەکردن لەگەڵ کێشەکان و خزمەتکردنی بەرژەوەندیی گشتیی خەڵکدا خۆی بنوێنێت.
یەکڕیزی واتای لەناوبردنی جیاوازییەکان نییە؛ بەڵکو واتای داننان بە جیاوازییەکان و گەڕان بەدوای خاڵە هاوبەشەکانە، بۆ ئەوەی هیچ ناکۆکییەکی حیزبی و هیچ بەرژەوەندییەکی تەسک، لە سەرووی بەرژەوەندیی نیشتمانییەوە نەوەستێت.
ئەگەر بەڕاستی دڵمان بۆ داهاتووی کوردستان و بەرژەوەندیی گەلەکەمان دەوێت، دەبێ بتوانین لە چوارچێوەی دیالۆگ، هاوکاری و بەرپرسیارێتیی هاوبەشدا، چارەسەری کێشەکان بدۆزینەوە.
بەڕێزان!
لە کۆتاییدا، ولە یادی هاوڕێمان کەمال شاکردا بانگەوازمان بۆ وەفاداری بە بەهاکانی ئازادی، دیموکراسی و دادپەروەری؛ نەک بۆ دووبارەکردنەوەی دروشمە سیاسییەکان. باشترین ڕێزگرتن لەوە، ئەوەیە بە کردار، متمانە، هاوکاری و خزمەتکردنی خەڵک، ئەو بەهایانە زیندوو ڕابگرین.
سوپاسی ئامادەبوون و هاوبەشیتان لەگەڵماندا دەکەین .
یادی هاوڕێ کەمال و شەهیدانی حزبمان و گەلەکەمان هەمیشە بە زیندوویی و بەرزی بمێنێتەوە.
هەولێر
٢٠٢٦/١٠/٢٦