بەپێی راپۆرتێكی ماڵپەڕی "ئەلمۆنیتەر" كە پشتی بە چەند سەرچاوەیەكی ئاگادار بەستووە، سوپای ئەمریكا دەستی بە كشانەوەی هێزەكانی و كەرەستە سەربازییە قورسەكانی لە نزیك فڕۆكەخانەی نێودەوڵەتیی هەولێر كردووە. دیارترین هەنگاوی ئەم پرۆسەیە، كە لە هەفتەی رابردووەوە دەستیپێكردووە، گواستنەوەی سەرجەم سیستمەكانی بەرگریی ئاسمانیی "پاتریۆت"ە بۆ شوێنێكی نادیار.
ئەم هەنگاوە لە كاتێكدایە كە هەرێمی كوردستان بەردەوام لەژێر هەڕەشەی مووشەكی و درۆنیی ئێران و گرووپە چەكدارەكاندایە. هەرچەندە پاتریۆتەكان بۆ پاراستنی سەربازانی ئەمریكا جێگیركرابوون، بەڵام وەك "چەترێكی ئەمنی" بۆ هەرێمیش كاریان كردووە؛ ئەو سیستمە بەرگرییانە توانیویانە زۆرینەی ئەو هێرشانە تێكبشكێنن كە دەكرانە سەر ناوچەكە.
هۆكارەكانی كشانەوەكە:
١. ڕێككەوتنی بەغدا: بەرپرسانی ناوچەكە دەڵێن ئەمە بەشێكە لەو ڕێككەوتنەی لەگەڵ حكومەتی عێراق كراوە بۆ كشانەوەی تەواوەتیی هێزەكانی ئەمریكا تاوەكو ٣٠ی ئەیلوولی ئەمساڵ.
٢. كەمیی یەدەگی مووشەك: راپۆرتەكان باس لەوە دەكەن ئەمریكا بەدەست كەمیی مووشەكی بەرپەرچدەرەوەی پاتریۆت دەناڵێنێت و ٥٥٪ی یەدەگەكەی لەدەستداوە، ئەمەش وایكردووە ئەولەویەت بداتە ناوچەكانی وەك كەنداو و ئوردن نەك هەرێمی كوردستان.
كاریگەرییەكان و دیدی شارەزایان:
شارەزایان پێیان وایە ئەمە بە مانای كۆتایی هاوئاهەنگی نایەت، چونكە هێزە تایبەتەكانی ئەمریكا لە شوێنی شاراوەدا دەمێننەوە.
لە كاتێكدا فەرماندەیی ناوەندیی ئەمریكا (سێنتكۆم) و حكومەتی هەرێم لێدوانی فەرمییان لەسەر بابەتەكە نەداوە، بەڵام چۆڵكردنی بنكەكان لە سیستمە بەرگرییەكان، ترس و نیگەرانیی دروستكردووە هەرێمی كوردستان رووبەڕووی مەترسیی زیاتر ببیتەوە ، بەتایبەت كە میلیشیاكانی سەر بە ئێران هێشتا چالاكن و حكومەتی عێراقیش لە كۆنترۆڵكردنیان سەركەوتوو نەبووە.