🔻ئەمریکا بودجەی پڕچەککردنی پێشمەرگەی گەیاندە سفر.
🔻پارتی و یەکێتی ئامادەنەبوون هێزەکان یەکبخەن.
🔻بڕینی ئەم بودجەیە ئاماژەیەکی مەترسیدارە.
ڕێگای کوردستان
بەپێی ڕەشنووسی بودجەی ساڵی ٢٠٢٧ی وەزارەتی جەنگی ئەمریکا (پێنتاگۆن)، هاوکارییەکانی واشنتۆن بۆ مەشق و پڕچەککردنی هێزەکانی پێشمەرگە بۆ سفر کەمکراوەتەوە.
ئەمە لەکاتێکدایە بۆ ساڵی ٢٠٢٦ بڕی ٦١ ملیۆن دۆلار بۆ ئەو مەبەستە تەرخانکرابوو.
لە بەرامبەردا، ئەمریکا بودجەی هێزە عێراقییەکانی زیاد کردووە، بەشێوەیەک زیاتر لە ٣٨ ملیۆن دۆلار بۆ سوپای عێراق و ٥٧ ملیۆن دۆلار بۆ دژەتیرۆری عێراق تەرخانکراوە، کە کۆی گشتیی دەگاتە سەروو ٩٦ ملیۆن دۆلار.
ئەم بڕیارە تەواکەری هەنگاوەکانی ساڵی ڕابردووە کە تێیدا هاوکاریی مانگانە ٦٠ ملیۆن دۆلارییەکەی پێشمەرگە بڕدرا.
چاودێران پێیان وایە ئەم دۆخە سزادانێکی ڕاشکاوانەی هێزەکانی پێشمەرگەیە لە سایەی پارتی و یەکێتی، چونکە سەرەڕای فشارە بەردەوامەکانی ئەمریکا، پارتی و یەکێتی لەپێناو بەرژەوەندی حزبی و پاراستنی بنەماڵەیی ئامادەنەبوون هێزەکان لە چوارچێوەی سوپایەکی نیشتمانیدا یەکبخەن.
بڕینی ئەم بودجەیە ئاماژەیەکی مەترسیدارە کە ڕەنگە لە داهاتوودا واشنتن هەنگاوی توندتر دژی پەرتەوازەیی هێزە چەکدارەکانی هەرێم بگرێتەبەر.
