ڕاوێژکاری ئاسایشی نیشتمانیی عێراق لە چاوپێکەوتنێکدا لەگەڵ کەناڵی (جەزیرە)، تیشکی خستە سەر چەند پرسی ئەمنی و هەستیار و چەند پەیامێکی گرنگی لەبارەی دۆسیەی چەک و بوونی پەکەکە ڕاگەیاند.
1. دۆسیەی کۆنترۆڵکردنی چەک و پێگەی پێشمەرگە
• چەکی پێشمەرگە: جەختیکردەوە کە چەکی هێزەکانی پێشمەرگە لە چوارچێوەی دەستووردا ڕێکخراوە و پرۆسەی کۆنترۆڵکردنی چەک لە دەستی دەوڵەتدا، هێزەکانی پێشمەرگە ناگرێتەوە.
• گرووپە چەکدارەکان: حکومەت لە گفتوگۆی بەردەوامدایە لەگەڵ گرووپە چەکدارەکان بۆ ئەوەی چەک تەنیا لە دەستی دەوڵەتدا بمێنێتەوە.
• هاوپەیمانان: ئەوەی خستەڕوو کە دوای کشانەوەی هێزەکانی هاوپەیمانان، دەرفەتی زیاتر دەڕەخسێت بۆ ئەنجامدانی گفتوگۆی جددیتر لەسەر ئەم پرسە.
• بنەمای یاسایی: هەوڵەکانی حکومەت بۆ کۆنترۆڵکردنی چەک، تەنیا ئەو لایەنە چەکدارانە دەگرێتەوە کە لە دەرەوەی دەستوور و یاسان.
2. دۆسیەی پەکەکە و بوونی سوپای تورکیا
• پێگەی پەکەکە: ڕاوێژکاری ئاسایشی نیشتمانی ڕایگەیاند کە بوونی هێزەکانی پارتی کرێکارانی کوردستان (پەکەکە) لەسەر خاکی عێراق نایاساییە.
• هاوئاهەنگی لەگەڵ ئەنقەرە: بەغدا لەگەڵ ئەنقەرە کار دەکات بۆ چارەسەرکردنی ئەم کێشەیە.
• کۆتاییهاتنی قەیرانەکە: ئاماژەی بەوەش کرد، ئەو بارودۆخەی بووەتە هۆی هاتنی سوپای تورکیا بۆ ناو خاکی عێراق، بە کۆتاییهاتنی دۆسیەی پەکەکە کۆتایی دێت.