گەڕەکی ئێمە،
لە خوارووی شارەوەیە،
بە خانووە قوڕەکان ناسراوە.
کۆڵانەکانی،
خواروو خێچن.
ماڵەکانی نزم و
ژورەکانی نسرم.
خەڵکی گەرەکی ئێمە،
شەوان،
خەوون زوو دەیانباتەوە.
بەیانیان،
بەر لە هەڵهاتنی خۆر،
ڕێی کار،دەگرنە بەر.
هەریەکە و کارێ
بیناسازی،
دەسفرۆشی،
بەرد شکاندن،
ئاسنگەری.
زەویکێڵان و
باخ داری.
خەڵکی گەڕەکەکە ی ئێمە،
بنکەی تەندروستی و نەخۆشخانە دروست دەکەن،
بەڵام،
نەخۆشی،بێ دەرمانی،
تەنگی پێ هەڵچنیون.
خەڵکی گەرەکی ئێمە،
باخچە و پارک دەنەخشێنن،
بەڵام،
هەوای ئالودە بوو،
دەستلەملانی سیلی کردوون.
خەڵکی گەرەکی ئێمە،
کارگەی شیرەمەنی بنیات دەنێن،
بەڵام مناڵانیان،
بە بێ شیرن.
لە گەڕەکەکەی ئێمەدا،
شەوو نییە،
چیرۆکی خۆشەویستی نیشتمان،
لە دەرگای ماڵمان نەدا.
لەتەک سفرەی خاڵی خوانماندا،
بزەو خەندە و پێکەنین،
لەسەر لێو و
ڕوخسارماندا،
پاشەڕۆژی پڕ لە هیوا و
دنیایەکی باشترمان نیشان نەدا.
ڕاستە،
خانوەکانی گەڕەکی ئێمە نسرمن،
بەڵام هەرگیز خۆری لێ ئاوا نابێ.
ڕاستە خەڵکەکەی،
ماندوون،شپرزن،
بەڵام هەرگیز خۆشبەختی تیا بزر نابێ!
لەو ڤێلا و کۆشکە بەرزانە،
باس تەنیا باسی،
پارەو
پول و ژنی جوانە.
لەماڵ بەماڵی،
گەڕەکەکەی ئێمەدا،
هیوا و ئامانج،
تەنیا هەر ئینسان و ئینسانە.
ئیبراهیم هەورامانی