گرنگ نییە کەمینە بن

بەندی عەلی

گرنگ نییە کەمینە بن .. 

هەر پەڵە هەوری گەواڵە

کە دەچنە ئامێزی یەکدی ،

دەکەونە ڕێژنە بارانی 

وەرزی پەڵە ..

گرنگ نییە کەمینە بن ..

هەر چرپەیە ،

دەبێت بە ماکی هاوارو

هەر خورپەیە ،

تەزووی گیان دەکاتە بەری

جەستەی بێ هەستی بوکەڵە !

گرنگ نییە کەمینە بن ..

مرواریش لەنێو سەدەفی

کەنار دەریاکانا کەمە ..

شەبەنگێکی خۆرەتاویش

بۆ زامی تاریکیی ئەشکەوت

لەهەر کوێوە بێت ، مەرهەمە !

گرنگ نییە کەمینە بن ..

هەندێ قەدەر وایە ، یاران !

بۆ کاروانی هەزار میلیش

هەنگاوێکەو

دەبێ هەر نێرگز مژدە بێ

بۆ چاوساغیی نەوبەهاران !!

گرنگ نییە کەمینە بن ..

..................................................

چارەکە سەدەیەکە ئەندامی هیچ حیزبێکی کوردی نیم ، بەڵام ئەوەی ئەم مرۆڤانە کردیان لە هەولێر جێی شانازییە ..