ئەکتەرەکان/ڕەقیبی ژمارە چوار(کاروان)نوێنەری کۆمپانیا+ ئاری(کارمەند).
شوێن/گرتوخانەی قەعقاع.
پەردەی دەیەم
بەشی٤٦
ئیمپڕاتۆڕییەتی پڕۆلیتاریا
ڕەقیبی ژمارە چوار: تۆ تۆمەتێکیتریشت لەسەرە.
ئاری: تۆمەتی چی!؟
ڕەقیبی ژمارە چوار: هاندانی کرێکاران، لە دژی کۆمپانیا.
ئاری:من تەنها هانم داون لەئاست ناحەقی و نادادی بێدەنگ نەبن. سیستەمی کۆیلایەتی ڕەت بکەنەوە.
ڕەقیبی ژمارە چوار: تۆ، بەڕێوەبەری کۆمپانیا
زوو ئاگاداری کردیتەوە، کە بۆخۆت نانی خۆت بخۆ و لەخۆتی تێکمەدە و کارێکت دەستکەوتووە و شوکرانەبێژی خودای لەسەر بکە.
ئاری: بەڵام لە خەونیشدا من هەرگیز نانی سەرشۆڕی و کۆیلایەتی قبووڵ ناکەم.
ڕەقیبی ژماره چوار: تۆ لە کۆمپانیا دەرکراویت.
ئاری: ئێستا تۆ پێم بڵێ بۆچی هاتوویت بۆئێرە؟
خۆ ئەوەی ویستت، کردت.
ڕەقیبی ژمارە چوار: بەرلەوەی تۆ بێیت بۆ کۆمپانیاکەمان، کارەکان زۆر بەڕێک و پێکی و بێ کێشە بەڕێوە دەچوون و هیچ ئاژاوەیەک نەبوو، وەلێ ئێستا هەموو ڕۆژ مانگرتن و ئاژاوەگێڕی بەردەوامە و خەریکە ئاگری ئەو ئاژاوەگێڕییەی کە تۆ هەڵتگیرساند، هەموو وڵات دەسووتێنێت.
بۆیە تکام وایە، پێیان بڵێ دەستبەرداری ئەو تێکدەری و ئاژاوەگێڕییە بن. ئێمە بەڵێن دەدەین کرێی کاریان بۆ زیادبکەین و دەوڵەتیش هەر ئێستا تۆ ئازاد دەکات. بەڵام بەمەرجێک، نەگەڕێیتەوە سەر ئەو ئاژاوەگێڕییەی بەرێت و دەست بەرداری بیری یاخیبوون و ئاژاوەگێڕی بیت.
لە کۆمپانیاکەشمان دەگەڕێیتەوە سەرکارەکەت و دەتکەین بە جێگری دوومی بەڕێوەبەری کۆمپانیا.
ئاری: گوێ بگرە باش، ئەگەر بمکەن بە ئیمپڕاتۆڕی هەموو مەملەکەت، مادام لەسەر حیسابی چەوسانەوەی مرۆڤەکان و مژینی خوێنی هاوڕەگەزەکانم بێت، نامەوێت.
من ئەوکاتە دەبم بە ئیمپڕاتۆڕ، کاتێک ئیمپڕاتۆڕییەتی پڕۆلیتاریا جاڕبدەم و تەخت و تاراجی سەرمایەداری تێک و بێک بشکێنم.
ڕەقیبی ژمارە چوار: من بۆتۆمە و تۆ بۆ کێتە؟ ئاقڵ گیان، بۆ سەری نەئێشای پەڕۆی تێدەئاڵێنیت. تۆ مرۆڤێکی کەللـەڕەقیت و لەوە دەچێت بەو کەللـە ڕەقیییەشت، سەری خۆت بەفەتارە بدەیت و ببیت بە قوربانی بۆ خەڵکی تر.
ئاری: ئەفسووس بۆتۆ، تا دوێنێ خۆت بە هەزار پاڤێلی پالەوانی ڕۆمانی (دایک)ی ماکسیم گۆرگی نەدەگۆڕییەوە و سوێندت بە گۆڕەکەی گیڤارا دەخوارد و مارکست به کەعبە و مانیفێستی کۆمۆنیستیشت کردبوو بە کتێبی پیرۆزت، کەچی ئەمڕۆ پارووێک نان کوێری کردوویت و سەد و هەشتا پلە باتداوەتەوە و ڕیزی کرێکارانت جێ هێشتووە و بۆ پلە و پایەیەکی بێبەها، خۆت و هەموو بەها و ڕەوشت و مۆڕاڵێکی خۆتت فرۆشتووە ! بەداخەوە کە تۆ کوڕی مام ئاکۆ و برای بەهاریت.
ڕەقیبی ژمارە چوار: ژیان واتا بەرژەوەندی. کرێکاریش بۆ پارەی خۆیان کاردەکەن و هیچ خێرێک و چاکەیەکی بێبەرامبەر بە کۆمپانیا پێشکێش ناکەن.
ئاری: تۆ و هاوفیکرانت لە سەرمایەداران و سیستەمەپۆخلەکەت(سیستەمی سەرمایەداری) وادەزانن کرێکار لە ئامێرێک زیاتر نییە !
ڕەقیبی ژمارە چوار: واز لە فەلسەفە و قسەی قۆڕ بێنە و به قسەی من بکە، زیان ناکەیت.
ئاری: بڕۆ و لەبەرچاوەکانم ونبە، بێ بەهای خۆفرۆش.
لەگەڵ چەپڵەی ئامادەبووان، پەردەکە دادەرێتەوە.