ــــــــــ 24 ــــــــــ
خاك ڕێزی شاعیران ده‌زانێ
له‌و ڕۆژه‌وه‌ی
(گۆران) ئێمه‌ی به‌جێ هێشت
له‌نێو جه‌رگیا
چیمه‌نی برینی بۆ ڕاخست
نه‌یهێڵا بگه‌ڕێته‌وه
كێ له میوانداری شاعیران تێر ده‌بێت
ئه‌ی گوایه هه‌ر ئێمه نه‌بووین
هه‌ر ڕۆژه‌ی له بازنه‌ی ئه‌ڵقه‌یه‌كی دیلێتی
باسك و بازوومان ده‌ڕازانه‌وه
ئه‌ی گوایه ئێمه نه‌بووین
دڵۆپێك ئاومان
نه‌كرده براكی هه‌ڵبه‌ستیه‌وه
ئه‌ی كاتێك كه ڕۆیشت
نه‌هاته‌وه بۆ ناومان
چه‌ند په‌یكه‌ری زریوه شیعرمان
بۆی دروست كردووه
له كام شه‌و نوێژو نزای جه‌ژنا
یادێكی ئه‌ومان كردووه
كه‌ی هه‌تاكو ئا ئه‌م ساته
په‌یمان به بڵندی شیعره‌كانی و
ژانی سه‌ختی
په‌یڤی شیرینی بردووه
مردوو نه‌نێژین
زیندوو په‌رێزین
ده‌توانین دیوانێك له درۆ داڕێژین
به‌سته‌می داده‌نێین
ناوێك له خۆمان
لانكی زینده‌گانیمان بنێین
مێرووله بۆنی په‌نجه‌مان بكا
واز له دانی نێو ده‌می ده‌هێنێ
له بوونی خۆی شك ده‌كا
(سویچه‌ر) له جه‌رگی دابڕان
جه‌سته‌ی پڕ له توێشووی چه‌ك ده‌كا
ئه‌وه‌تا پێنووسه‌كانمان
له په‌نجه‌كانمان سڵده‌كه‌ن
ئه‌وه‌تانێ ڕسته‌ی په‌ڕاو
له ئاستی نیگامان دڕئه‌ده‌ن
گیرفانێك له شاباش
توێشوویه‌ك له مه‌زه
كه‌شكۆڵی سه‌فه‌ری هه‌ستمانه
تارمایییه‌ك له خۆزگه
دوندێك له ته‌فره
پاداشتی دڵسۆز و خۆشه‌ویستمانه
هه‌واڵێك له پاكی
نه‌رمه بای شه‌وان
هه‌وڵدانێك
له ئاورنگی گه‌ردنی ڕه‌نجده‌ران
ڕووبكه‌نه ده‌روازه‌ی هه‌وارمان
به‌بێزارییه‌وه..
ده‌رگای ده‌روونمان داده‌خه‌ین
له ئاستی ڕووكه‌ش
سته‌م و ڕابواردن
فه‌رشی جگه‌رمان ڕاده‌خه‌ین
بۆیه هه‌ر ڕۆژه‌ی
له گۆشه‌ی مه‌یخانه‌یه‌كدا
خه‌وێكی قورس دامان ده‌گرێ
ژینمان بووه‌ته وڕێنه
له شاعیرانمان مه‌پرسن
كه‌ی شیعری ئه‌مڕۆ
په‌روه‌رده‌ی خوێنه
ئه‌وه‌ی ئه‌مڕۆ.. له كۆچه‌و
له پاڵتۆی هه‌یبه‌ت سوڵتانا
خۆی ناگرێته‌وه
شیعری زاخ ئامێزی بێچێژه
ئه‌وه‌ی ئه‌مڕۆ
له گوناه پاك نابێته‌وه
پێنووسه زمان ناگرێت و
گه‌ردنی وشه ده‌بڕێته‌وه
كێ ده‌توانێ..
نامیلكه‌یه‌ك به چاپ بگه‌یه‌نێ
با هاوسه‌ره‌كه‌ی له برسا بكوژێ
كێ ده‌توانێ
په‌ڕه‌ی په‌رتووكێ نوێ بخوێنێته‌وه
بازاری مناڵه‌كانی ببڕێته‌وه
بنووسن
ئێوه له(با) پاكترنین و
له به‌فریش دڵسۆزو تیانتر
بنووسن
ئێوه له كۆشش نه‌به‌ردتر نین و
له خۆزگه‌ش شیرینتر
په‌ڕه كوانێ
سنگ بۆ مه‌لی ده‌روون بكاته‌وه
دیده كوانێ
وشه‌یه‌ك بخوێنێته‌وه
ستار ئەحمەد