ــــــــــ 25 ــــــــ
به‌چپه نووسراوه‌كانتان
به گوێی خۆتانا بچرپێنن
به پرتاو..
ده‌ست به سمێلی
قه‌یره كچی شیعره‌كانتانا بهێنن
ئه‌مڕۆ بانگه‌واز
سه‌ربادانی زه‌مینه و
كێ له ئاستی
تووڕه‌بوونی خاكا خۆی ده‌گرێ
ئه‌مڕۆ نیاز
وێرانكردنی ویژدانه و
كێ له ئاستی
ده‌ریای گڕا ڕاده‌وه‌ستێ و
له ترسی شاڵاوی مه‌رگ
خۆی ڕاده‌گرێ
مه‌لێك له گۆڕی غه‌ریبان ده‌خوێنێ
ده‌نووكی له خوێنی
چڵێكی به‌رلێزمه سووربووه
شاباڵی تریفه‌ی
خۆرێكی بسك سووره
چاوه‌كانی
په‌یامی گزنگی هه‌ڵگرتووه
ده‌ڵێن گیانی شاعیرێكه
له ده‌ستی زه‌برو زه‌نگ هه‌ڵاته
ده‌ڵێن(خدری) زینده‌یه‌و
ئه‌شك ده‌ێژێ"شیوه‌ن ده‌كا
بۆ به‌ڵاو كه‌سه‌ری
مناڵانی ئه‌م ووڵاته
خه‌ڵكێكی زۆر ده‌ڵێن
(بابا نۆئێل) ە
له خواردن .. مانی گرتووه
ده‌یه‌وێت وه‌ك ئێمه
ئازاری برسێتی بزانێت
سێ ڕۆژه ڕۆژووی بۆ خاكمان گرتووه
ئه‌میش له‌لانه‌ی سته‌مكار وه‌ڕسه
ئه‌میش له ناڵه‌ی ئێمه
جگه‌ری سووتاوه
هه‌ر ڕۆژه‌ی له‌سه‌ر گۆڕێك
سروودی برسێتی ده‌خوێنێ
ده‌یه‌وێت به‌جیهانی ڕابگه‌یه‌نێ
هاوڵاتیان ڕێزێك بۆ بوونی دانانێن
شه‌رمه‌زاره له‌وه‌ی..
بۆ ده‌ستی خاڵییه‌وه
كۆرپه‌كانمان
له دووره‌وه چه‌مۆڵه‌ی ده‌نێن
دوێنێ هه‌واڵێك ڕایگه‌یاند
هه‌ڵه‌بجه..
سكی له داری گوێز پڕبووه
بۆسبه‌ی ده‌زێ
ئێستا له نه‌خۆشخانه كه‌وتووه
بۆ دایه‌نێك ده‌گرێ
شیعری دوا ڕۆژی
نازی كۆرپه‌كانی هه‌ڵگرێ
ده‌ترسێ جارێكی تر
ژه‌هرو خوێن
به‌تیشكی لیزه‌ر ڕێگای پیشان بده‌ن
گڵۆپی مین له چاوه‌كانیا دابگیرسێنن
بۆیه له‌باری ژیان و مردنایه
تۆ بڵێ ی به‌ری دارگوێزێك
زه‌یتوونێك نه‌بنه گلێنه‌و..
ده‌روازه‌یه‌كی بۆ نه‌دۆزنه‌وه
تۆ بڵێی.. جارێكی تر
زیندوو خۆره‌كان
ئاورنگ به سكڵ بگۆڕنه‌وه
له په‌راوێزی زوڵمی گه‌لانه‌وه
له دادی ده‌وڵه‌تان بڕوانن
له گه‌ڵای ئه‌رخه‌وان
كل بۆ دیده‌ی تازه زێ بهاڕن
چه‌رخی ده‌ستووری زه‌مانه
به‌خوێن ده‌گه‌ڕێ
دادی نه‌وای بێ زمانه
بۆ شیله‌ی زار هه‌ڵده‌په‌ڕێ
كێو نییه ئاگریان تیای نه‌كردبێته‌وه
چیا نه‌ماوه
په‌ڕه‌ی زامی هه‌ڵنه‌درێته‌وه
نه هێرۆشیما
نه زه‌یتوون
به یه‌كتری ئاشنا ده‌بن
نه‌بیابانه‌كانیش باڵا ده‌كه‌ن و
له چیا ده‌چن
ستار ئەحمەد