ــــــــــ 26 ـــــــــ
ده‌بازبوون سنگی شۆسته‌یه
به‌مێخی ڕه‌شماڵی ڕه‌وكه‌ران ده‌مبه‌ستێته‌وه
بانگه‌واز جاڕدانی فرۆشتنی به‌هایه و
به‌من مه‌زات ده‌كرێته‌وه
بۆیه له كێوی كێویترم
له ئه‌زموونی بتپه‌رستان ڕێوی ترم
ده‌ڤه‌رێك له خه‌وا بمته‌نێ
ڕووبه‌ری ئازارم پێوانه ده‌كا
سه‌فه‌رێك له ئه‌درێسی ڕاوكه‌رانا نه‌بێت
له گیرفانی هه‌وری هه‌ناسه‌می ده‌نێم
به‌دڵما گوزه‌ر ده‌كه‌م و
بۆ نێو قۆزاخه‌ی هه‌ڵبه‌ستێك ملده‌نێم
كێ ناڵێ ئه‌و شه‌وه‌ی
بروسكه‌یه‌ك له دایك ده‌بێ
چه‌ندین نه‌رمه‌با نازێن
كێ ده‌ڵێ
سنگی ئاسمان شه‌ق نابات و
زریان ورده باران و
هه‌ناسه‌ی ته‌مه‌نی چیا ناخوا
ئه‌ی بۆچی كه‌دوندێك ده‌خزێ
دۆڵێك گه‌رووی بۆ ده‌كاته‌وه
ئه‌ی بۆچی شه‌پۆلێك هه‌ڵبسێ
كه‌نارێك كوڵمی ده‌شواته‌وه
له‌وه‌ته‌ی
دادگای مافی ده‌وڵه‌تان دانراوه
پسووڵه‌ی په‌ڕینه‌وه‌ی
هه‌ڵۆی شیعر نه‌دراوه
له‌وه‌ته‌ی شیعریان
بۆ ڕه‌ش و ڕووت هه‌ڵبه‌ستووه
هه‌ر شاعیر خۆی
له كه‌ناری برسێتیا
خه‌وی مه‌ینه‌ت دایگرتووه
وتیان نه‌كه‌یت خه‌فه‌ت بخۆیت
كه‌س نییه له ژینا كۆچنه‌كا
وتیان نه‌كه‌ی سوێند بخۆی
شیعر له ژانی درۆ ناگا
وتیان دڵی شاعیره‌كان وه‌كو بایه
وتیان نزای شاعیره‌كان
گڕوگاڵی بیرو ڕایه
كێ لێمده‌گا..؟
كوا سروشتی ئه‌م زه‌مینه
هاو خوێنێكی به‌كۆڵه‌وه گرتووه
كوا ده‌رفه‌تێكی ده‌ست هه‌ڵبڕین
په‌ی به سووتاوی ده‌ستم و
برینی ناخم بردووه
بۆكێ بدوێم
شیعر له ئاوریشم ناسكتره
ده‌یانه‌وێ بیكه‌نه كۆتی په‌رییه‌كان
شیعر گه‌ردیله‌ی بارانه
كێ ده‌توانێ
سنووری په‌ڕینه‌وه‌ی بگرێ
شیعر گه‌واڵه‌ی ئاسمانه
كێ ده‌توانێ
ڕێگا له كۆچباری بگرێ
ستار ئەحمەد