ـــــــــــــ 28 ــــــــــــ
تارایه‌ك له هه‌وری دووكه‌ڵی ڕێڕه‌و
ئاوێنه‌ی ڕۆژی لێخن كردووه
گرۆیه‌ك له ژانی ژێر په‌نجه‌ی هه‌نگاو
سه‌ری گردێكه.. له‌ڕه‌وا مردووه
ڕێگا تابووتی هه‌ناسه‌ی گوڵه
جۆگه‌له ته‌وێڵی لۆچی زاگرۆسه
له داخی ساویلكه‌ی داخوازیی ده‌له‌نگێ
شه‌و باڵای كێوێكه
تینووه بۆ پاكی بزه‌ی هاوده‌نگێ
گورك تاری نشیوه‌و..
له ڕانی ئاسكه‌ی پرشنگ تێر نابێ
چڵ تیغی ده‌واری ڕه‌وه‌نده‌و
ئاگری قوتیله‌ی ده‌روونی هه‌ڵنابێ
ده‌ستێك چڵی دار گوێزه‌و
بۆ نزا له یه‌زدان
باسكی بێلاسكی به‌رز كردۆته‌وه
ڕه‌گێك په‌نجه‌ی گه‌واهی(خانی) یه‌و
ده‌رگای هه‌ڵبه‌ستی ڕووپاكیی كردووه‌ته‌وه
ده‌نگێك ڕاوی مه‌ل و مرۆڤ ده‌نا
ڕه‌نگێك خۆی له زه‌ردی گه‌ڵا و خوناڤ ده‌نا
دار بایڤێك بۆ په‌رستگای سه‌ربه‌ستی كوڕ بووه‌ته‌وه
مه‌لێك ده‌ستنوێژی سه‌ركه‌وتن له ئاوه‌سپی ده‌گرێ
دڵێك گڕ ده‌ژمێرێ..
تینوێتی به‌ژان داده‌مرێ
ئه‌وه‌ی ئازاری نه‌بڕیبێ
له‌سزای بێچاره تێناگا
ئه‌وه‌ی له ته‌نووری وڵاتێكی غه‌ریبستان
شه‌وانه‌ی به‌سه‌ر نه‌بردبێ
له تامی نان و
گریانی كۆرپه‌ی خاكه‌كه‌ی ناگا
شارێك پیاو چاكانی
له ته‌ویله‌ی ئاژه‌ڵانا
به باسك ده‌نرخێنێ
بۆ كارێك ته‌لاری ڕه‌زاشا بڕازێنێته‌وه
به‌ردێك گلێنه‌ی مێژووه
دوندی ئه‌ستۆی ڕۆژگاری نوغرۆیه
به‌هایه‌ك له پاڵانی ڕه‌شه ساڵا
ژێر سكی ئابوونه‌ی ترۆپكی ئه‌و دیوه
تۆرانێك له جریوه هه‌ساره‌ی ناسنامه‌ی
هه‌ورازی بێداری زه‌مینی چنیوه
كیژۆڵه‌یه‌ك بولبولی ئه‌شكه‌نجه‌ی
له‌سه‌ر شانی داناوه‌و
ده‌نگێكی به چرپه له گیانی هه‌ڵده‌ستێ
نازانم.. سه‌دای گیانداره
یان ناڵه‌ی مرۆڤی ژێر ده‌سته
بڕیارێك له‌گه‌ڵ ڕابه‌ری ڕاست و ڕه‌وا ده‌به‌ستێ
زیندان نییه.. ژماره‌ی كۆچكه‌ران بژمێرێ
په‌رستگا نی یه..
نانێك بۆ گه‌ده‌ی خواناسێك بنێرێ
دەنگیك خۆی نادا له قه‌ره‌ی بانگه‌واز
هه‌ر پێیه‌و به دوای په‌نجه‌یا هه‌ڵدێ
هه‌ر ده‌سته‌و بۆ نزا..
ڕوومه‌تی(با) ده‌شوا
بۆ تریفه‌یه‌ك له‌گه‌ڵ بارانا..
خۆی ده‌كات به سۆزی كۆچڕه‌وی ڕێگا
ئه‌ستێره‌كان له‌گه‌ڵ به‌ردی كه‌ناری چه‌ما
چاوشاركێی كسپه‌ی ئاوی قه‌ترانن
نانێك له خوانی ئاسمان وه‌رگه‌ڕێ
برسی هه‌ڵاتوو..
ده‌روونی خونچه‌ی خۆزگه‌ی ده‌دڕێ
به‌فرمێسك خوێنی جه‌رگ
ژه‌مێكی سه‌رفرازی ساتێكی ئاسووده‌یی
بۆ خه‌وی پێڕه‌وكه‌ی ڕه‌و ده‌كڕێ
به‌زمێكه تینوێتی تاراو تاج
ڕه‌زمێكه ناڵێنی مناڵی بێڕه‌واچ
ئه‌مه ده‌ستووری گێتییه
بازرگانی ئاده‌میزادی بێهه‌واره
ئه‌مه شه‌قڵی جه‌رگی خاكه و
به نووكی گاسنی سته‌م زامداره
ستار ئەحمەد