ـــــــــ ٢٩ ـــــــ
له ته‌لی بروسكه ئاوابووم
له گۆشه‌ی ژێرخانی خانه خوێیه‌كا دامابووم
ده‌ستێك له شه‌پۆلی گڤه‌ی بای نه‌داری
په‌رچه‌می لاسكی نیازمی داده‌هێنا
شه‌قامێك هه‌نگاومی نه‌دیبوو
له‌گه‌ڵ كاری بێكاران
ژێی هه‌ناسه‌می ڕاده‌هێنا
گوزه‌رانێك.. به ئالووده‌یی خاكه‌كه‌ت ئاوبدرێ
ژیانێك به‌زاری خوێنمژان ناوبنرێ
هه‌ناسه‌یه‌ك ته‌مه‌نی سه‌رشۆڕی دیاری بكا
خورپه‌یه‌ك له نێڵه‌ی ئاگر بئاڵێ
هه‌واڵێك كوشتنی دایكت بێ و
گۆرانیه‌ك شیوه‌نی مردنی مناڵێ
مه‌لای قوتب جاڕی فرۆشتنت بداو
كتێبه پیرۆزه‌كان گه‌ردی ناكه‌سان
له ئاوێنه‌ی ده‌روونی سه‌روه‌ران دانه‌ماڵێ
ده‌مێك خوانی پێنجژه‌مه‌ی له‌سه‌ر نرابێ
چوارچێوه‌یه‌ك تارای مه‌رگی چرابێ
سووتانه.. ژیانی دووره گڵ
نه‌مانه.. كوانووی بێگڕ و ئه‌سكڵ
گوێی كه‌ڕمان به درۆی دادوه‌ران پڕ بووه
ده‌روونمان له كولانه‌ی گڵكۆی ته‌فره‌یا كڕ بووه
حه‌سره‌ته خامه‌مان گڕ له خۆی به‌ردەدا
لاپه‌ڕه‌ی بوونمان.. له گه‌رووی زام ده‌نرێ
سته‌مه میلله‌تێك تاوانی سته‌مكار هه‌ڵگرێ
ڕه‌وێك شه‌شساڵ
له‌لانه‌ی دڵسۆزان دایبڕیبووم
شه‌قامێك هه‌ر به‌زۆر ته‌مه‌نی كڕیبووم
باڵی مه‌لی گه‌ڕانه‌وه‌م
له خوێنا سوور گه‌ڕا
ده‌یه‌وێت ئاسمانی خۆشنوودی
به‌شاباڵ بهۆنمه‌وه
ناونیشانێك.. له دڵما..
برینی شیعرێكی یاساغه
بووەته هه‌ڵۆیه‌ك له چیای ئاگرا
باڵی ده‌ربازبوونی لێكداوه
له ژماره‌ی سنووری ڕێگاكان سڵناكا
خواحافیزی به ئه‌ستێره ده‌سپێرێ و
هێلانه‌ی خۆری له دڵ ڕوواوه
ئه‌وه‌تا نه‌رمه‌بای شاباڵی
ڕووی به‌فری دوندی سه‌خت ده‌سڕێ
شه‌خته ئاوێنه‌ی هه‌ناوی نه‌ترسه
ته‌رزه گلێنه‌ی چیایه
له خوانی لوتكه‌یا داماوه بۆ پرسه
به گه‌ردنی هه‌ورا..
سكاڵای باران بۆ ئێوه ده‌نێرم
له دوندی سه‌ختی هه‌ڵگوردا
په‌نجه‌ی بڕاوی ڕۆژگاری سته‌مكارم ده‌ژمێرم
نه‌عره‌ته‌ی هه‌وڵدانی مرۆڤی كۆڵنه‌ده‌ر
خامۆش نابێت و.. جه‌فای ناله‌بار
به بازوبه‌ندی ڕێگاكان ده‌تاسرێن
خه‌رمانی ڕه‌نجی ڕه‌نجده‌ره قه‌ندیل و هه‌ندرێن
ستار ئەحمەد