ـــــــــ30 ــــــــــ
چه‌ندینجار.. بوخچه‌ی مێژوویان كرده‌وه
كلدانی دزراوی دایكمانی تیابوو
چه‌ندینجار گرێی دڵی هه‌ورمان كرده‌وه
سه‌ری بڕاو.. كۆرپه‌له‌ی چیا بوو
زام به‌گلێنه‌ی خوێن نه‌بیسترێ
ئاوه‌ڕۆی پاكڕه‌وی نابزوێ
گوڵ به‌كوڵوانه‌ی به‌فر پاك نه‌كرێته‌وه
چیا له‌گه‌ڵ كسپه‌ی نشیوا نادوێ
بوومه چڵ..
له به‌رگی دوندێكا چرۆم كرد
بوومه دڵ
له‌سینه‌ی شیعرێكا داڵده‌م گرت
ڕدێنی خاكیان سووتان و
لاپه‌ڕه‌ی په‌ڕاوه‌كانیان له خوێنا خنكان
من تابلۆی قوربانیدانی گه‌لێكم
به‌نێشی دیواری
سه‌ر شۆسته‌كانا هه‌ڵواسراوه
من به‌رواری ڕه‌نجدانێكم
له ته‌وێڵی ده‌رگاكانا ئاوه‌ژوو كراوه
ڕه‌ونییه ڕاوكه‌رێك جڵه‌وی به‌رنه‌دا
كه‌و نییه چه‌كێك
گه‌واهی كوشتنی بۆنه‌دا
ئای له‌و ساتانه‌ی
گومه‌زی ماڵه‌كه‌م هه‌ر به‌خه‌ون
ده‌بووه كۆترو
بێچووی شیعرمی ده‌تاران
تاڵی په‌رچه‌م..
سنووری جاڕدانی هه‌نگاوی سێبه‌ر بوو
مه‌مكی هه‌ڵقرچاو
گوڵدانی ده‌روونی خوێناوی سه‌ربوو
مردن له باڵای نه‌مانی ده‌ترسا
تابووت خۆی له درزی دیوار ده‌نا
باڵدار له ترسی شریقه‌ی تۆپباران
بۆی بكرایه
زه‌مینی به ده‌نووك هه‌ڵده‌كه‌ند
هه‌تاكو ئێستا زۆر شه‌وانه
ڕایه‌خه‌كه‌م ده‌بێته هه‌ورازێك
له خوێنی ژێر پێ و
ئاره‌قه‌ی ته‌وێڵی كۆچڕه‌وا ده‌گریم
ده‌بمه(مه‌ولاناو)
سنگی ده‌فی ته‌جه‌للام ده‌كوتم
ویردی(انا الحق) ده‌كه‌مه به‌رگریم
ڕاده‌بم.. وه‌كو چڵ
به سروودی هه‌ناسه ده‌هه‌ژێم
ده‌مه‌وێ له‌گه‌ڵ هه‌یاسه‌ی خورپه‌ی
كۆرپه‌ی ڕه‌شبینی ژیانا بژێم
دڵم ده‌بێته ورته‌ی چرای شه‌و
ئه‌ستێره زریوه‌ی تیشك به‌سه‌رما ده‌بارێنێ
مانگ تریفه‌ی گه‌ڵای مێو
به‌هه‌نسكی بێئارامیم ده‌گه‌یه‌نێ
ئه‌وه‌تا دوێشه‌و
خاكێك به‌ڕووما هه‌ڵشاخاو
بووه(پیرێكی ڕدین تووتڕكی)
چه‌ناگه‌ی خسته سه‌ر
سنگی له مه‌لی دڵ ترازاوم
هه‌تا توانی
ماسولكه‌ی جه‌سته‌می ڕاكێشاو
ته‌ماشام كرد پێمه‌رده‌ی ئه‌جه‌ل
هێدی.. هێدی
گیانم له گه‌روومه‌وه سه‌رده‌خا
له‌حه‌شامه‌تێكا خۆم دۆزیه‌وه
به‌دوای جۆگه‌له‌یه‌كا هه‌ڵده‌هاتم
دایكمیان له‌ناو گڕی ناخیا ده‌سووتان
ئه‌وه‌تا ماندووم و
هه‌رچه‌نده وشیارم
له ترسا ده‌له‌رزم وه‌ك گه‌ڵای خه‌زان
به‌هارێك تێپه‌ڕی
وه‌رزی نه‌گبه‌تی
گوڵی سه‌ربه‌ستی نه‌دا له به‌رۆك
زستان چاوه‌ڕێی به‌فری ئه‌مه‌ل بوو
ساڵ تینووی هه‌وڵدانی
چه‌وساوه‌ی گه‌لبوو
مه‌ڵێن بولبولی نیازی هه‌ڵبه‌ست
له داوی په‌ڕه‌یا
دیوانی شانامه‌ی سه‌روه‌ره
شیعر عاشقی دیده‌یه‌كه
ڕێگای شكۆو سه‌ر بڵندی له‌به‌ره
ستار ئەحمەد