__ 31 __
كه‌ی ده‌هێڵن
گوێسه‌وانه‌ی ماڵه‌كانمان
لانه‌ی كۆتری بیروڕابێ
كه‌ی ده‌هێڵن شیعره‌كانمان
موڵگه‌ی خه‌می دێوانه‌ی خاك و شه‌یدابێ
شه‌كره شیعرێك
له باڵای دوندێك نزیكبێته‌وه
قه‌ده‌غه‌یه له‌گه‌ڵ به‌فرا خاك بدوێنێ
زریوه شیعرێك له په‌روانه‌یه‌ك بگه‌ڕێ
خه‌رمانی گڕ ده‌كه‌نه هێلانه‌ی
شاعیرێك قسه‌یه‌كی ڕاست به دڵیا ڕابوورێ
ته‌وقی زنجیر ده‌كه‌نه جامانه‌ی
بۆیه پێنووسێك گازمبكات
هه‌زاران سووره‌ت ده‌خوێنمه‌وه
نه‌وه‌كو ناڕه‌وا
له خوێنی هه‌ڵكێشم
نه‌وه‌كو به‌درۆ، به هه‌ڵه
نه‌خشه‌ی زامی
ڕێگایه‌كی كوردستانی پێبكێشم
شیعر هێلانه‌ی دڵی شاعیره
باخچه‌ی گوڵزاری په‌ڕه‌یه
شیعر وڵاتی ئازاره
ئاڵای ژانی ئه‌م گه‌له‌یه
شیعر به‌های بوون و نه‌مانه
شیعر چیای بێكۆتایی نیشتمانه
شیعر لانكیی كۆرپه‌یه‌و
ده‌سرازه‌ی دێڕی نوستووه
شیعر قاقای بێتاوانه
پاكیی خاكی هه‌ڵگرتووه
كه من شیعربم
بۆ به‌رد بارانم ده‌كه‌ن
ماره‌م له نامۆیی ده‌بڕن
كه من شیعر بم
بۆ له بازاڕی ڕه‌شی ڕۆژگارا
په‌ڕه‌ی بێنازی پاكمه‌ندیم ده‌دڕن
شیعر گه‌واڵه‌ی پاییزه
شیعر كیژێكی نه‌شمیله
ئابڕووی به‌رزی نیشتمانه
شیعر په‌ڕه‌ی جه‌رگی ژینه
شیعر ئاوازی ئه‌وینه
شیعر وێردی سه‌ره‌مه‌رگه
شیعر ئاسكه‌ی خه‌می سركه
شیعر تابلۆی ژان و سۆیه
شیعر زاری من و تۆیه
شیعر گیانه.. ئاو و نانه
شیعر كۆشش و هه‌وڵدانه
شیعر گزنگ و كۆچباره
شیعر ناسنامه‌یه‌و
مێژوو پێناسه‌ی به‌رواره
شیعر وڵاتێكی بێزه‌فه‌ره
شیعر شه‌یدای ده‌ربه‌ده‌ره
شیعر بارانی ڕه‌حمه‌ته
شیعر حه‌زی له ژینێكه بێمنه‌ته
من گزنگ له شیعرا ده‌بینم
پرچی شه‌و.. داوی وشه‌ی گۆرانیمه
مانگ دێڕی ماته‌مم
شه‌پۆله‌كان نۆته‌ی هه‌ڵبه‌ستی شیرینمه
بۆیه شیعرێك له تۆڕی ناخم بترازێ
خۆم له خه‌مێكی بێسزا هه‌ڵده‌ژه‌نم
بۆیه شیعرێك ماڵاواییم لێنه‌كا
ده‌یكه‌مه ئاوازی سه‌ربرده‌ی ته‌مه‌نم
شیعر بێكۆچ له‌به‌رگری تێناگات و
شیعر بێده‌ستی گومڕابوون
پشت له هێلانه‌ی خۆی ناكات
پێنووسێكم
له چڵی دارژاڵه دروستكرد
ویستم ژانی نساره‌كان بهۆنمه‌وه
ده‌رگای په‌ڕینه‌وه‌یان نیشان دام
ڕووی ده‌ریاكانیان شكاندو
ڕێڕه‌وه‌كانیان پاككرده‌وه
پێیان ڕاگه‌یاندم
له‌وه‌ته‌ی ئێوه
دیوی پێچه‌وانه‌ی ئێمه‌ن
ئارام له ناخمانا ناسره‌وێ
ئه‌م ژیانه
پسووڵه‌ی په‌ڕینه‌وه‌ی كۆچی ده‌وێ
بۆیه ڕابردووم
له په‌ڕاوێكا تۆماركردو
شیعره‌كانم..
له مۆزه‌خانه‌ی به‌هاره زه‌رد هه‌ڵگه‌ڕاوه‌كانا
به لێوی كانیه‌كان سڕیه‌وه
گه‌ردی وشه به‌سه‌رما داباری
گه‌واڵه‌ی ناونیشانی داره بێبه‌ره‌كان
بسكی به‌فریان بڕییه‌وه
ڕاستی به‌درۆ بنه‌خشێنن
ژین سه‌رینی شكۆ نابێ
گه‌ل له ژانا ئاودیو بكه‌نه‌وه
خاك ئارامگه‌ی ڕه‌نجه‌ڕۆ نابێ
جۆگه ئاوی پێدا نه‌ڕوا
خاك كاڵای جوانكاری له‌به‌ر ناكا
مرۆڤ له به‌های دابڕن
بۆ دوورگه‌ی ژان ئاڵا نابێ
شوێن پێیه‌كان مه‌سڕنه‌وه
هه‌واڵه‌كان به گوێی زریانا مه‌چرپێنن
ئه‌گه‌ر هه‌وارگه‌ی ڕۆژانه له‌كێرد بده‌ن
دڵ نه‌غمه‌ی بوون..
له ئاوازیا خامۆش ناكرێ
ئه‌گه‌ر بڕواكان..
له خاچ بده‌ن
نووری ئه‌زه‌ل..
له هه‌نیه‌ی مێژوودا نامرێ
ستار ئەحمەد