ـــــــــــ 32 ـــــــــــ
ئەم خاكه گیانێكه
له بۆته‌ی شكۆیا ده‌دره‌وشێ
دڵێكه له‌لانه‌ی ئاراما
بۆ بانگی هه‌وڵدانی چه‌وساوه ده‌ژێ
هه‌ڵه‌ته‌و كه‌پكه‌ی تری مه‌كه‌نه لانه
ورشه‌ی ڕێگاكان به تارا مه‌خنكێنن
له سنووره‌كان بپرسن
چۆن تووله ڕێگاكان ده‌ناسن
چۆن تێپه‌ڕبوونی هه‌نگاوه‌كان
ده‌بنه هه‌وارگه‌ی جێژوان
چۆن گۆشه‌ی لاپه‌ڕه‌ی هۆنراوه ئامێز
ده‌بێته لانكی باوه‌ڕ و ویژدان
چۆن ناونیشانی شاعیری كۆڵنه‌ده‌ر
بۆ لانه‌وازان..
ده‌بێته نیشتمان
من بارم گزنگه‌و
ڕێگام پرشنگی په‌ڕاوه
من كه‌ڕه‌وێك به‌رۆكم بگرێ
ده‌بمه چرۆی به‌هاری هۆنراوه
زاری وه‌ڵامم پرشنگه
له ئاگری باباگوڕگوڕ نه‌تۆراوم
كه ماچی كوڵمێكی گوڵ بكه‌م ده‌سووتێم
ناتوانم ته‌وێڵی گه‌رمیانیش ڕامووسم
ئه‌ی چی بكه‌ین..؟
زامی عاشق..
سووتانی قرچه‌ی ده‌روونه
ژانی شه‌یدا..
ئاوێنه‌ی جه‌رگی زه‌بوونه
چاكتر وایه وه‌كو هێما
له دووره‌وه وڕێنه‌ی ناكه‌سان بم
له كاتی پێویست و شه‌وا
هاوڕێی مرۆڤی غه‌ریب و ڕێنه‌زانبم
هیرۆیه‌ك له به‌رامه
چلێك له شه‌كره به‌فر
گه‌ڵایه‌ك له په‌ڕه‌ی بیروڕای نابیناكان
ته‌وێلێك له ڕۆخی چیا
ڕێگایه‌ك له هێڵی فه‌رهه‌نگی ڕه‌شه‌با
نزایه‌ك له نۆته‌ی هه‌نگاوی گومڕابوون
هاوارێك بڵند وه‌ك پیره‌مه‌گرون
به‌دواما سێبه‌ری گه‌میه‌كی بێله‌نگه‌رن
لانه‌ی نۆغروی چۆله‌كه‌ی ده‌شتی (ئاغجه‌له‌رن)
ڕێگاكان باریك.. سیان
ده‌ڵێی تاڵی پرچی سه‌رن
له ورشه سڵده‌كه‌ن
شه‌یدای په‌رچه‌می ئاگرن
من گه‌رمیانم
له گڕا خۆم ده‌دۆزمه‌وه
گه‌رمیان.. قه‌قنه‌سه‌و
له چێژی كوێستانیش ناز ئه‌كڕێت
گه‌رمیان كۆتری سووره‌و
له‌لانه‌ی خوێناوا شاباڵ ناكرێت
گه‌رمیان مامزه‌و ده‌سته‌مۆی چیایه
گه‌رمیان هه‌ڵۆیه‌و.. به‌رزی هیوایه
گه‌رمیان نه‌وره‌سه‌و
ئه‌ندێشه‌ی ژانی شاعیری ته‌نیایه
ئه‌شكه‌نجه‌ی چیا
ده‌ستێ هه‌ڵیده‌گرێ
باری قورسی چیای نه‌خشین
هه‌ر گه‌رمیان ده‌توانێ
له ئاستی خۆی ڕاگرێ
ستار ئەحمەد