ـــــــــ ٣٣ ــــــــ
دێیه‌كم له قه‌راخ ڕۆخانه نیشته‌جێم
دێیه‌كم ئاوی ڕوون ناكه‌مه شوێنپێم
سزای زه‌مانه دیده‌كانمی كردووه‌ته‌وه
ده‌زانم خاك به چیاوه شیرینه
ده‌زانم گوند نه‌بێ هه‌واڵی شاره‌كان
لانكیی ده‌ریای وروژمی قینه
ئه‌و ڕه‌وه‌ی لادێكانی له‌سنگی شاره‌كان دابڕانه
دوای سێبه‌ری دوژمن كه‌وتووه
ناچارییه گه‌ردنی چه‌م
به به‌ردی ئه‌لحه‌د ده‌بڕێته‌وه
ناچارییه دێیه‌كان ناكه‌ونه گاوڵكێ
ناچارییه ڕۆخانه سێلاوی كۆچباره
خوێنی هه‌نگاوی ده‌ربه‌ندی لێده‌تكێ
سێ وێستكه.. ئاڵای داد له‌به‌رت ده‌كرۆژن
سێ سنوور.. دوژمنی خوێنخۆری ڕۆژن
سێ پارچه‌ی گه‌رمه‌سێر
له ئاودا بێمه‌له
سێ به‌ربه‌ست
ڕێبازی ده‌ستووری گه‌له
هه‌وڵمداو تێكۆشام
له خوێناو به‌دووربم
منی گه‌رمیانی ناتوانم
بۆ چیا ڕه‌قیبی كوڵوانه‌ی ژووربم
په‌لكه زێڕینه‌م له‌به‌ر كردووه‌و
له هه‌وری خاكه‌لێو.. نووری خوا هه‌ڵده‌مژم
گلێنه‌م ئه‌ستێره‌ی به‌یانه‌و
له مانگی تاری دوندێك ده‌گه‌ڕێم
چۆن ده‌بێ بۆ ناكه‌س
كۆرپه‌ی كوێستانی ئاواتم بكوژم
بۆیه ڕێبه‌ڕێ
له‌به‌ركی دوڵێكا گیرفانم ته‌مه‌و
په‌یامی سه‌رم ته‌می ته‌رزه‌یه
ئاسمانێك له جوانی گه‌رمه‌سێر ڕاماوه
هه‌ڵبه‌ستی ڕه‌نگینه نه‌عره‌ته‌ی ئێمه‌یه
هۆ كوێستانچی.. كاروانت له دیوی ئه‌زمڕا پشووده
هۆ ڕابه‌ری به‌فری كه‌لیخان
تریفه‌ت سۆزی ئاوازی سرووده
له خوانی ئه‌مه‌كا ماچی نان به‌راته
له خوانی پاكیا هه‌ر چیا براته
سه‌نگه‌ری ناحه‌زان داڵده‌ی گوڵناده‌ن
هه‌وارگه‌ی نامۆكان
ئاڵای تۆ هه‌ڵناده‌ن
ڕه‌و مه‌كه‌ن
ئاسمان كه نووری باڵاگه‌ردانی گزنگبێ
کڕێوه‌ی باران به‌كپی دێته‌خوار
ئای كه‌شیرینه ته‌مه‌نی نه‌وگوڵی هه‌وار
ستار ئەحمەد