ـــــــــــ34 ـــــــــــــ
ده‌نگێك له تانك
زایه‌ڵه‌ی نركه‌ی زریانی زوڵمه
وادێ ڕه‌وڕه‌وه‌ی زه‌مان ده‌شكێنێ
ڕازێك ئاوێنه‌ی هه‌ناوی گڵمه
به‌ره‌و پاش ڕۆئه‌چێ
به ئاورنگ ڕووی به‌فراو ده‌گرێنێ
ده‌ستێك بیبڕن
به‌ڕوویه‌ك ڕه‌گی خۆی له خاكا چه‌سپ ده‌كا
هه‌نگاوێك له‌گڵا سرودی بارانبێ
چاوه‌ڕێی مه‌رگی به‌ڵاو كۆسپ ده‌كا
بارانه شیعرم
زریوه‌ی وشه‌ی
به‌كۆڵا داوه
له ده‌نگی گێتی به‌فرو با ڕاماوه
جریوه‌ی ئه‌ستێره‌ی باخچه‌ی نووسینم
ئاوازی ده‌نگی كاتی پاراوه
زه‌مینه‌ی جه‌رگم به‌گڵ سوور ده‌كا
هه‌نگاوم مه‌رگی داڵاشی ڕقه
خۆزگه‌ی ناخ..
به باڵای چیایه‌كی دوور ده‌كا
هه‌ر دێم و له ئێوه ناترازێم
هه‌ر دێم و عاشقی مه‌رگێكم
سروودی نه‌مری بكاته هاوڕێم
ساڵانێك وه‌كو ئه‌م ڕۆژو ساته
له پێسته‌ی گورگا خۆمان داپۆشی
ساڵانێك وه‌كو ئه‌م مه‌رگه‌ساته
له باڵای جۆگه‌ی دوورگه‌ی ناسۆری
ده‌گه‌ڕاین به‌دوای ئامانجی خۆشی
ئه‌وه‌تا وا ئه‌مڕۆیش ده‌رفه‌تی پێشینه
ناحه‌زی كردووه به تاجی سه‌رو
ئه‌وه‌تا وا ئه‌مڕۆیش مه‌وڵه‌تی قینه
ئێمه‌ی كردووه به‌ڕانی مه‌ڕو
شوانكاره‌ی دوژمن
له ده‌رگای جه‌ورا ئاودیومان ده‌كا
ئه‌وه‌تا وا ئه‌مڕۆیش
خوێنی كۆنه‌زام
بۆ چقڵی ڕێگا ده‌بێته تكا
ئه‌و داره‌ی ده‌مێكه له دڵمان ڕوواوه
ئه‌و گوڵه‌ی نیگای موولووله‌و
په‌رژینی چاوه
ده‌یكه‌نه كوانووی ئه‌سكڵی تاوان
شه‌پۆلی ئاگر عومری به‌هاره‌و
ده‌یكه‌نه به‌هاری دایكه‌ڕۆی خه‌زان
چۆن ده‌بێ ته‌مه‌نی بۆ ئاوی ئه‌ڵوه‌ن
له سۆزی عه‌شقی گه‌رمیان بێبه‌ش بێ
بۆ ده‌بێ وه‌ته‌ن
هه‌نگاوی تینووی چیای سه‌ركه‌شبێ
من بایه‌ك له سنگما
وه‌ك په‌ڕه لوولم ده‌دا
گه‌ردیله وشه.. گوڵاو ده‌ڕژێنێ
من ده‌ستێك له ڕه‌گی بوونما شینبووه
په‌یامی مژده‌ی مێژووم بۆ دێنێ
دڵنییه له خاكا كفن و كۆی دامرێ
چرۆیه‌ك نه‌ڕوێ.. دارێك به‌رنه‌گرێ
ڕێگایه‌ك نییه ماچی هه‌ڵوێستكاو
له جه‌رگی خاكا بیسڕنه‌وه
هه‌رگیز نه‌بووه چیایه‌ك بكۆكێ و
گردێك به چرپه
ده‌ستی به‌ڕێزی به‌رزنه‌كاته‌وه
ئه‌ی بۆچی گه‌لێك له گڵكۆی ژیان
سه‌دان گه‌واهی خۆگری داوه
ئه‌ی بۆچی گه‌لێك له‌پێش سه‌ختیا
سه‌دان له‌شكری زوڵمی پێكاوه
له به‌سته‌ی خاكی باوانیان دوورین
ئه‌ی بۆچی گه‌لێك گاره‌ی
به ئه‌ستۆی هه‌ڵگرتووه
عاشقی خه‌نده‌ی لێوی چنوورین
كه‌ی ڕه‌وا شین ده‌بێ
ده‌ستی سته‌مكار
له دڵی بیدادان گیرده‌كا
كه‌ی ڕه‌وا..
ده‌بێته به‌فری شه‌قڵاوه
كۆتایی پێدێت
قامچی تووله ڕێی ئه‌م كۆچ و ڕاوه
ستار ئەحمەد