10
بەرزان عەلی
هەستان گۆڕم بۆ هەڵکەنن دەرکەوت چەشنی پاڵەوانێک
ڕووخساری لە مرۆڤی چاخەبەردینەکان دەچوو،
سامی هەبوو
جەستەی بە شمشێری بیابانەکان قڵیشابوو
لە مەچەکی ڕاستی نووسی بوو: مافیابوون جۆرێکە لە جڕتلێدان
لە مەچەکی چەپی نووسی بوو، یاخیبوون لەشیعردا شاعیری دەوێت تا لەقوربانی نەترسێت
لە لاملی نووسرا بوو: (هیچ.)
کەچی وەکوو مرۆڤێکی سەردەمی چاخەبەردینییەکان دەردەکەوت، بە تاتوو لەسەر جەستەی ئەم شیعرەی نەخشاند بوو، شاعیرێکی یاخی بوو
ڕۆژگارێک وەکوو مافیا لە کووچەکانی غووربەتدا دەژیا، عارەق سەگی نۆش دەکرد تا غووربەت لە خەیاڵیدا بکات بە مەزە کەتەرەکەی چەشنی قەرەوڵ میزان دەکرد
شەوانە چەشنی گوورگ دەنووست، ژوورەکەی پڕ کردبوو لە شیعری شاعیرە مەزنەکان
کتێبەکانی وەکوو تاجێک لەسەر کردبوو تا هیلاک نەبن، بەیانیان زوو دەچووە سەر کار لارولەنجەی ئەوکچە قاجارییە وێرانی کرد بوو کە بە حووزنەوە شەقامەکانی تێدەپەڕاند
چێژی لە چیرۆکی ئەو موعتادانە دەبینی کە ڕۆژگار وێرانی کردبوون
دەنگی پێی ئاوی لە ژورێکدا دەخوێندەوە تاتینوێتی غووربەت نەیخنکێنی لەچۆڵە وانیدا
شیعری گوناهم کرد گوناهێکی پڕ لە چێژ، لەسەر بەرماڵ دەخوێنەدەوە بە جلی کارەوە
گوێی لەو گۆرانییانە دەگرت کە تەنیایییان پڕ دەکرد لەمیهرەبانی
بەرزان یاخی بوو
شەڕی بە هەموو ئەفسانەکان دەفرۆشت، لە مردن نەدەترسا دەیزانی ئەفسانەکان دروستکراوی ترس و تەنیاییی مرۆڤن لەنێو ئەشکەوتەکاندا
ئەو بتانەی دەشکاند کە پاڵەوانی نێو ئەفسانەکان بوون لەسەردەمی گەمژەیدا
دەستی بۆ ئەو نەوتراوانە دەبرد کەشاعیرەکان لەخەویشدا دەترسان بیری لێ بکەنەوە
خۆی بایکۆت کرد لەو چێژانەی کە ئێوە لەنێو شیعردا سواڵی بۆ دەکەن و شەرم ناکەن لەشیعر
بە کەرەمتوو سەری ئەو شاعیرانەی دەپەڕاند کە لەنێو شیعردا پەناهەندە بوون و لە کۆتاییدا خیانەتیان لە شیعر کرد
دژی ئەو ژنانە بوو کە شیعرنووسین بە سووراو تێگەیشتبوون شەڕی بەو پیاوە بەناو شاعیرانە دەفرۆشت کە شیعرنووسین بەوە تێگەیشتبوون کە قژێکی درێژ بهێڵنەوە و بەپۆزەوە جگەرەیەکی حیز بکێشن، لیباسێکی هەمەڕەنگ لەبەر بکەن و شاڵێک لە گەردنیان بئاڵێنن، چەند کتێبێک بخەنە بندەستیان و ڕوو لەو چایخانانە بکەن کە لە قەحبەخانەکان زیاتر دەنگی تێدا بەرز دەبوویەوە
بەزەییی بەو شاعیرانەدا دەهاتەوە کە لە کافێکاندا سواڵی شیعریان لەقاوەیەکی دڵشکاو دەکرد
ڕقی لەو شاعیرانە بوو کە تەنیا بۆ سێڵفی دەچوونە مەراسیمەکان
ڕقی لە پۆزی ئەو شاعیرانە بوو کەپیاسەیان دەکرد و بە هەموو عەقڵیانەوە وا خۆیان نیشان دەدا کە لەنێو خەیاڵێکی قووڵی شیعریدا دەژین، بەڵام چەشنی ماسییەک کە ژاڵەی خواردبێت، دەکەوتنە سەر ئاوی شیعر
شاعیرێک بوو چەشنی دڵی زمانی نمایش دەکرد، دەمامکی لە هیچ بۆنەیەکدا لە ڕووخسار نەدەکرد، گەر میوانی کرۆناش بووایە
مردنەکەیشی بەیاخیبوون دەست پێ کرد، کفنی ڕەشی پۆشی و جڕتێکی بۆ هەموو ڕەنگەکان لێ دا
وەکوو ئاماژەیەک بۆ کاڵفامی بەشێک لەو مرۆڤانەی کە تاریکی دڵیان بەسپی دادەپۆشن، وەکوو پیاوێکی مافیای ڕۆما شایەتی بۆ ئەم شاعیرە دەدەم، کە لە ژیانێکی ڕەشدا دەژیا، جەستەی لەسەر کەوتن و هەستانەوە ڕاهێنا بوو
لای ئەو ژیان و مردن جگە لە درۆیەک هیچی تر نەبوون بۆ خەڵەتاندنی مرۆڤی هەژار
کفنی ڕەشی پۆشی چەشنی ئەو عابایانەی سپێتی دڵی ژنێک دەشارنەوە، کفنی ڕەشی پۆشی، چەشنی ئەو، تا لە نهێنی فێنکیی مردن بگات، پێدەچێت ڕەش لەنێو ئەفسانەی ئاینەکان هێمای فێنکی بێت و ئەم شاعیرە پەی پێ بردبێت تا لە فەلسەفەی ڕەش بگات و لە کاروان دوا نەکەوێت
ڕەنگە هێمابێت بۆ شەو، کە ئارامی خۆی دەخزێنێتە نێو ڕۆحمانەوە تا لە ژاوەژاوی ڕووناکی ڕۆژ دوور بکەوینەوە و تۆزێک بێدەنگ بین لەنێو قیژە قیژی ژیاندا
هەستایەوە دەنگی پێیەکانی چەشنی گۆریلایەک مردووەکانی بەخەبەر هێنا، بەڵام هیچکام لە مردووەکان نەیان وێرا فززە بکەن
چاوێکی لە کفنەکەم داگرت و ماڵئاواییی لەشیعرەکان کرد وەک ئەوەی بە من بڵێت لەنێو کفنیشدا تۆ تەنیانیت هاوڕێ