مەراسیمی بەخاکسپاردنم

بەرزان عەلی

 15

دەستیان خستە نێو دڵمەوە و هەڵیان گڵۆفی، وەکوو ئەوەی لەترێ شەراب بنەخشێنن

بە بەرچاومەوە سەفەری کرد

وەکوو ئەوەی بەشداری فیلمێک بکات لە هۆڵیۆد

پارچە پارچە بووم ڕەنگە نەتوانم پارچەکانی جەستەم کۆ بکەمەوە

بەرگەی کۆکردنەوەی یادەوەرییەکان ناگرم، ئەو یادەوەریانەی چەندین تۆوی سەوزیان لە ڕۆحمدا چاند

کۆکردنەوەی یادەوەرییەکان دەمکوژێت، دەستبردن بۆ هەر یادەوەرییەک دەمکوژێت

پێدەچێت دەرفەتی کۆکردنەوەی هەموو یادەوەرییەکانم نەبێت

لەمنداڵییەوە مەرگ داوای ژوانم لێ دەکات، حەزەکەم بیبینم، بەڵام ڕەنگە کاری زیاترم هەبێت لەئیستادا، مانشێتی مردنم لە ڕۆژنامەکان وێرانم دەکات

مرۆڤێکم حەز ناکەم کەس بە مردنم بزانێت

بۆ ئەوەی دڵڕەقی ژیان وەکوو دوومەڵێک بتەقێنی، دەبێت گوێزانێک لەنێو زمانتا بشارێتەوە و هەرچی زوخاوی یادەوەرییە بیتەقێنی، هەرچی کیم و جەراعەت هەیە بڕژێتە نێو زەوی

ناکرێت بۆ تێپەڕاندنی ژیان خەریکی کۆکردنەوەی یادەوەری بیت، هەندێک یادەوەری لە ڕوومانە دەچن، چل برینی پێوەییە

لەنێو یادەوەریدا لەدایک بووم

هەر لەوێش مردم بێ یادەوەری

یادەوەری گەر دیوێکی جوانی هەبێت، هەزاران پارچەی کۆنەکراوەی کوشتنی تێدایە

وەکوو منداڵێک لەنێو یادەوەری هەتیویدا خنکام، بێباوکی خۆزگە لەپایز دەچوو، وەکوو باوکێک لەنێو یادەوەری کۆرپەکانم ڕۆژانە دەمرم

دەبێت چەندجار بمرم؟

کۆکردنەوەی یادەوەرییەکان کاتی زۆری دەوێت، وەکوو ئەو قیامەتەی خودا کاتی بۆ دانەنا، بەڵام لەخەیاڵدانی هەندێک لە مرۆڤەکان بەم نزیکانە دێت، بەڵام پێتان دەڵێم قیامەت لەنێو ژیاندا بوونی هەیە، نەک دوای مردن، ژورەکەم پڕە لە یادەوەری، بۆم کۆ ناکرێنەوە، ،ئەوەندە دڵڕەقن خەریکە شوێنی نووستنەکەم داگیر دەکەن

یادەوەریی پارچە پارچە، زەحمەتە بیانلکێنیتەوە بەیەکەوە، نازانم لەکام یادەوەرییەوە دەست پێ بکەم، لەم شانۆگەرییدا چۆن ڕۆڵ بگێڕم و مرۆڤبوونم هاڕە نەکات

لە کاتێکدا هیچ دەقێک نامکاتە ئەکتەر و هیچ دەرهێنەرێک نابینم لەنێو شانۆی ژیاندا

دەزانم خۆزگەیەک لەکاتی مردندا بەڕەچەڵەک دەچێتەوە سەر خەیاڵی ئەفسانەیەک، کچەکەم هەژاریی منی کردە خەونێک زانکۆی تێپەڕاند، مرۆڤ بەدرێژایی مێژوو خودایەکی هەبوو، بەڵام هیچ کات نەیبینی، ئەوە منم دوو خودام هەیە و دەیان بینم

خودایەکم (نێلایە)، کە ڕۆشناییی دەبەخشێتەوە و تاریکی ڕادەماڵێت لەئیستادا

خودایەکم تۆزێک گەورەترە و ناوی (نیگای)ە، بە چاوەکانی نەخشی ئاسمان و زەوی دەنەخشێنێت

منداڵێک لە کۆڵانی قەبرستانەکەوە دەرکەوت، جووتێک پێڵاوی لاستیکی لەپێدا بوو، دوو چاوی شین و قژێکی زەردی نەرم، کە چەشنی گەڵا دەدرەوشایەوە، کاتێک بەر سروەی هەناسەی با دەکەوت، ئەو منداڵە لە تابلۆی مۆنۆلیزا دەچوو و دەدرەوشایەوە

کاتێک مەراسیمەکەی بینی، بە ڕاکردن بەرەو کفنەکەم هات، وایزانی جەژنە، شیعرەکان لەماتەمدا بوون، گورگەکان ڕوویان کردە ئاسمان، دەیان لووراند، کاتێک هاتە سەر کفنەکەم، گریا و بە ئەسپاییی وتی، من کەی مردوم؟

شیعرێک دەستی هێنا بەسەریدا و چکلێتێکی پێدا، پرسی منداڵی ئەم شاعیرە چۆن بوو؟

منداڵێک بوو بەدبەختی چەشنی ڕووبارێک بەنێو ڕۆحیدا گوزەری دەکرد، دڵخۆش بوو، کاتێک لە بەرەبەیانێکی سارددا ئاگری بۆ ئەوکرێکارانە دەکردەوە کە دڵڕەقی ژیان ڕاوی نابوون

بەمنداڵییش ژیانی بەبێدەنگی تێپەڕاند، باشترە بڵێم ژیانی نە بوو، شەوان ڕۆژە ڕەشەکانی بێباوکی خەت پێدا دەهێنا و لەژێر پەتوویەکدا قوڵپ قوڵپ دەگریا

کاتێک تەرمی باوکی لەنێو تابووتێکی تەختەدا بینی، هەر بەمنداڵی پیر بوو

بێدەنگی هەمووانی شۆک کرد

گورگێک بەکوڵ دەگریا، تا بەدبەختییەکانی منداڵیم بسڕێتەوە، منداڵەکە دەستی کرد بە گریان و ڕایکرد، هاوارم کرد:

بەرزان گیان مەڕۆ! با تەرمەکەم بە بێکەسی نەنێژن، نایشارمەوە زۆر زۆر بۆ خۆم گریام

لایەکی کردەوە، هاوارم کرد:

بەرزان تکایە پێش بانگ لە ماڵەوە بیت، تا بەر زللەی بێباوکی نەکەویت، هێندە تووند ڕایدەکرد، چەشنی تارمایی قەدپاڵی قەبرستانەکە تاریک، ئەوە دوایەمین دیدار بوو کەخۆم بینی لە منداڵیدا..!