کە سێو سێو بڕنێ، هەناریش هەنار
چۆن سەما ناکا درەختی گوێ بەگوار؟
چریکەی کەناری دڵ کەنار دەکا
نەسیم بەزمانی گوڵ هاوار دەکا
دەنگی پایز دێ گەڵا کاڵ بووە
هەروایە چنار، یان خەیاڵ بووە؟
پرچی شۆڕەبی تاڵ تاڵ وەستاوە
دەڵێی گەورەکچە لە خەو هەستاوە
ئاسۆ سوور بووە ئێوارە مەستە
موعتادەو پێکی شەرابی خەستە!
لەسەرسینەی یار دوو لیمۆ زەردن
وەک بڵێی لەگەڵ پایز هاو دەردن
دەستم بێ وروە، پەنجە لەرزۆکن
لە گوین چووزەرەی ساڵی نەزۆکن
شاعیر چیت ئەوێ لەو کەژو کێوە
کوا شکۆفەی دڵ؟.. مردن بەڕێوە.
هەمزە گوڵانی