قوبادی جەلیزادە

1

جاران دەم؛

بۆ وشەی شیرین و 

بۆ ماچ کردن و

بۆ گۆرانی گوتن بوو.

ئێستا؛

بۆ جنێو و تفکردنە.

2

جاران چاو؛

بۆ فرمێسک و

بۆ دیتنی جوانیی و

بۆ خوێنەوەی غەزەل بوو.

ئێستا؛

بۆ مۆڕە کردنە.

3

جاران دەست؛

بۆ شمشاڵ ژەنین و

هەنار ڕنین و

تەوقە کردن بوو.

ئێستا؛

بۆ شەقازلەیە.

4

جاران دار؛

بۆ چاندن و

بۆ بەر گرتن و

بۆ گۆچان دروست کردن بوو.

ئێستا؛

بۆ حەسیرمەیدانە

5

جاران قاچ؛

بۆ ڕۆیشتن و

هەڵپەڕین و

بۆ یاری کردن بوو.

ئێستا؛

بۆ شەق وەشاندنە

6

چەند قێزەون بووە؛

دەم

چاو

دەست

دار

قاچ!!