.بێكەس حەمە قادر
به خه‌تێكی پان له تابڵۆیه‌كی سپی
بنووسه ئێره ناوه‌ندی گۆی زه‌وییه
به‌قه‌له‌مێكی سۆفت له‌م شه‌وه‌دا بنووسه
كاتێ تۆ دار پرته‌قاله‌كه‌ت راوه‌شاند
له جیاتی پرته‌قال كۆمه‌لێك چۆله‌كه‌ی جوان
فڕین و ئیدی نه‌گه‌ڕانه‌وه
ئه‌ها تۆ به‌ردێكی چه‌ند گه‌رم بووی
له‌شه‌وێكی سارد
ئێمه‌ت له‌دڵه‌ڕاوكێ هێشته‌وه
گیاكه واكه‌وت ده‌لێی له‌مێژه خه‌وتووه
گه‌لاكان واپه‌رش بوون
هیچ بایه‌ك ناتوانێ وا په‌رتیان بكات
وا په‌رش و بلاوبوون
ده‌مه‌وێ برۆم دوور دوور
له‌كه‌ناری ده‌ریایه‌ك خه‌و بمباته‌وه و
خه‌به‌رم نه‌بێته‌وه
له ژاوه‌ژاوی ئه‌و په‌رش و بلاویه‌ی ئێره
كه كه‌سێك نیه كۆمان كاته‌وه
ئۆقره‌م نه‌ماوه
تۆ وه‌ره مرۆڤ بیت و
چێژ له شكاندنی قاچی
سه‌گێك ببینی
تۆ وه‌ره مرۆڤ بیت و
لێنه‌گه‌ڕێی كۆترێك ئارام
له‌سه‌ر دارته‌لی كاره‌باكه بنیشێ
تۆ وه‌ره بۆنی گران به‌ها
له‌خۆت بده‌یت و ژینگه پیس بكه‌ی
چه‌كی گران به‌ها بكڕیت و
بیر له كوشتنی مرۆڤ بكه‌یته‌وه
ده‌چێته كلاپ و سه‌مایه‌كی جوان ده‌كات
كه‌چی دێته‌وه مه‌مله‌كه‌تی من
ژنێك ده‌كوژێ و ده‌بێته هه‌والی رۆژنامه‌كان
له‌ناو ماشێنه‌كه‌ی گوێ له موزیك و گۆرانی ده‌گرێ
كه‌چی كۆنتڕۆلی تیڤی له‌نێو ده‌سته‌كانی خۆی دایه
نه‌بادا كچه‌كه‌ی یان ژنه‌كه‌ی چێژ له‌گۆرانیه‌ك ببینن
ده‌مه‌وێ عه‌ترێك بكڕم
بۆنی هیچ كه‌سێكم لێنێ
له‌چیمه‌نێك بژیم گیایه سه‌وزه‌كه
گه‌ر خۆی نه‌یه‌وێ هیچ كه‌سێ نه‌بێ
به‌پێیه‌كانی بیخه‌وێنێ
هه‌ندێ رووناكی له‌ئه‌ستێره‌یه‌كی
دوور دوور قه‌رز بكه‌م
تا باخچه‌كه‌م رووناك ببێته‌وه
تا گه‌ڵاکان سه‌رله‌نوو
گوڵ بگرن گوڵ
گوڵی نارنجی له چه‌شنی پرته‌قال
تا دووباره و سه‌د باره‌ی بكه‌مه‌وه
خۆشمده‌وێی خۆشه‌ویستی