لە چەند پەیڤێکدا.
لای کۆڵبەرێ
سبەینێ چی دەگەیەنێ
ڕۆشتن بەسەر مین و
دەستڕێژی گوللەدا
لای بەندییەک
وەستانە لە سەرەی مەرگ و
سەکۆیی ڕەشی سێدارەدا
لای دایکێکی جگەرگۆشەئەنفالکراو
هاتنەوەی زارۆکانێتی
لەگەڵ پرشنگی خۆرەتاو!
لای مووچەخۆر
مووچەی فەوتاو
لای سیاسیییێ
تەکنیکی نوێ
بۆ دزینی نەوت و دراو!
لای دڵدارێ
ژیان لە ڕامووساندایە
لای قەرزارێ
سبەینێ و ئەمڕۆ وایە!
لای بانگخوازێ
هونەری تازەی فریوودان
بردنی کیژی ئیماندار
بۆ جێژووان!
لای شاعیرێ
سبەینێ چ دەگەیەنێ؟
خەون و هیوا
جوانی و بڕوا
خەونی
ڕۆنانی دنیای نوێ
دنیایەک،
پەپوولە و کۆتر و
منداڵ بێترس
تێیدا بنوێ!
سەرزەمینێ
بە شکۆوە مرۆڤ
تێیدا بژی و بمرێ!
جەمال حەمید
حوزەیرانی 2026