بەكر ئاڵەیی
لەگەڵ یەکەم بارانی پایز، نۆرە گەیشتە سەر کتێبەکەی هاوڕێم سەلام عومەر، تازەترین کتێبییەتی، بەناوی (دەڕژێمە ناو منداڵیمەوە) نامەوێ باسی بەرهەمەکانی پێشووی بکەم، چونکە سەلام عومەر توانیویەتی لە نووسینی ڕۆمان و چیرۆکیش جێپەنجەی دیاربێت، هاتووم کەمێک لەسەر دیوانە شیعرییەکی بۆچوونی خۆم بڵێم، ئەوەی من سەرنجم داوەتێ و لێیحاڵی بووم، سەلام عومەر کۆنی تێپەڕاندووە، جوان ئەو قۆناغەی بڕیوە، جوان توانییەتی وێنابخوڵقێنێ و مانا و تێگەیشتن بۆ شیعری سەردەم بەیان بکات، لەیەکێک لە تێکستەکانیدا پێمان دەڵێ: (دەبمە فیرعەون
چەند ئەهرامێک درووست دەکەم
موچەی کرێکارەکانیش مۆمیادەکەم
دەبمە هیتلەر
ئەهرامەکان دەڕووخێنم
تەواو جومگەکانی ژیان ناشیرین دەکەم
دەبم بە کەمال و ئەردگان
سنوورەکان تێکدەشکێنم
گیانی مۆسۆلینی سەدام لەدەمارەکانم دەچێنم
تا وەک دیواری بەرلین و پەیکەری دیکتاتۆرەکان هەرەس دێنم)
ئەو چۆن ئەو وشانەی قێزەون و بێزراون لەناو کۆمەڵگە بەرگی شیعری بەبەرداکردوون، ئاخر وەختێ ناوی دیکتاتۆرەکان دێ مرۆڤ برینی ساڕێژنەبووی مرۆڤایتی دێتە ناو ڕوح و بە ئازارەکانی دەتلێتەوە، بەڵام سەلام عومەر توانیویەتی لە نائومێدیی و دەردەسەرییەکانی ژیاندا خەیاڵێکی دیکە بەرجەستەبکات، زۆر لە تێکستەکانی جێی هەڵوەستەکردنن، دەکرێ بە دەیان لاپەڕە لەسەر زمان و وێناکردنی دەقەکان بنووسرێ، عیشقێک بۆ مانەوە بگێڕێنێتەوە.
دەستخۆشی بۆهاوڕێ سەلام و سپاسگوزارم بۆ دیارییەکەی.