وه‌رگێران و ئاماده‌كردنی: هێمن خۆشناو
دوای ئه‌وه‌ی بوڵه‌ند ئارنچ سه‌رۆكی پێشووتری په‌رله‌مانی توركیا له (14 تشرینی دووه‌می 2025) له زیندانی (ئه‌دیرنه) سه‌ردانی (سه‌ڵاحه‌دین ده‌میرتاش) هاوسه‌رۆكی پێشووتری پارتی دیموكراتی گه‌لان (هاداپ) ی كرد و ڕایگه‌یاند كه ده‌میرتاش ده‌یه‌وێت سه‌ركۆمار ره‌جه‌ب ته‌یب ئه‌ردۆغان ببینێت، به تایبه‌تی له سۆسیال میدیا، ده‌نگۆی:" ده‌میرتاش ده‌خوازێت به ئه‌ردۆغان بڵێ (هیچ كینه‌یه‌كم له به‌رامبه‌رتاند نیه)" بڵاوكرایه‌وه. ئه‌م ده‌نگۆیه‌ش ده‌میرتاشی توڕه كرد و ناوبراو ئه‌مڕۆ پێنجشه‌ممه (20 تشرینی دووه‌می 2025) له رێگای پارێزه‌رانی و له سۆسیال میدیا دوو په‌یامی بڵاوكرده‌وه.
له په‌یامی یه‌كه‌مینیدا ده‌میرتاش ده‌ڵێت:" ئه‌وه‌ی زۆر ئازارم ده‌دات، له‌سه‌ر ناوی من چه‌ندین ده‌نگۆ بۆ ڕای گشتی بڵاوده‌كه‌نه‌وه به‌بێ ئه‌وه‌ی ئاماژه‌م پێدابێت. پێویستە هەمووان بزانن و دڵنیابن، بە سەربەرزییەوە هاتمە ئێرە، رێز و کەرامەتی خۆمم نەشکاندووە و دیسانەوە بە سەربەرزییەوە لێرە دەردەچم یان تا دواڕۆژی ژیانم لێرە دەمێنمەوە. 9 ساڵ لە زیندان ناخۆشی زۆرم بینیووە، بەڵام دوورکەوتنەوە لە خەباتی ئازادی، دیموکراسی و ئاشتی گەل، لە بەرامبەر هەموو ناخۆشییەکاندا هێزی بەرگری و ئیرادەیەکی پۆڵاییم پێدەبەخشێت".
چه‌ند سه‌عاتێك دوای ئه‌م په‌یامه، ده‌میرتاش په‌یامێكی درێژتری بڵاوكرده‌وه تیایدا ده‌ڵێـت:"
دوا شت كه حه‌زم لێ نییە، ببمه كارنامه‌ی سه‌ره‌كی له‌و كاته‌ی له ده‌ره‌وه پڕۆسه‌یه‌كی زۆر هه‌ستیار و گرنگ به‌ڕێوه ده‌چێت. جوان نییه كه كارنامه‌كه بۆ شوێنێكی دیكه بگوازرێته‌وه، به تایبه‌تی له‌و كاته‌ی كه خه‌ریكه پڕۆسه‌ی ئاشتی به‌ره‌و ئاقارێكی گرنگتر ده‌چێت و كۆمسیۆنی په‌رله‌مان گفتوگۆ له‌سه‌ر چوونیان بۆ ئیمڕالی ده‌كات. له‌گه‌ڵ ئه‌وه‌شدا ئه‌و گفتوگۆ و تۆمه‌تانه‌ی له ده‌وروبه‌ری ناوی من خراونه‌ته‌ڕوو به راسته‌وخۆ یان ناڕاسته‌وخۆ كاریگه‌ریان له‌سه‌ر پڕۆسه‌كه هه‌یه. له‌م سۆنگه‌یه‌وه ئه‌م په‌یامه بڵاوده‌كه‌مه‌وه كه پێموایه خستنه‌ڕووی هه‌ندێك ته‌وه‌ره به سوود ده‌بێت بۆ پڕۆسه‌كه.
به‌و هیوایه‌ی كۆتایی به گریمانه و گفتوگۆی نابه‌جێ بهێنێت.
1- من به‌شداری و پشتگیری له پڕۆسه‌ی ئاشتی ده‌كه‌م كه به‌ڕێز ئۆجالان ده‌ستپێشخه‌ری بۆ كردووه، به‌ڕێز باخچه‌لیش خاوه‌نداریه‌تی لێكردووه و ئۆپۆزسیۆنیش به تایبه‌تی به‌ڕێز ئۆزێل به‌هێز پاڵپشتی لێ ده‌كات. له‌م باره‌یه‌وه له‌گه‌ڵ به‌ڕێز ئۆجالان، هیچ ركابه‌ری، ناكۆكی و جیاوازیمان نییه.
ڕۆڵی به‌ڕێز ئۆجالان و په‌یام و به‌رپرسیاریه‌تیه‌كه‌ی مێژوویی و زۆر گرنگه، كه ته‌نیا به‌خۆی، ده‌توانێ جێبه‌جێ بكات نه‌وه‌كو كه‌سێكی دیكه به خۆشمه‌وه. ڕۆڵ و په‌یامی من له سیاسه‌تی دیموكراتییانه پاڵپشتكردنی هه‌وڵه‌كانی ئاشتی و ته‌واوكردنیه‌تی. جگه له‌خۆم و به‌ناوی خۆمه‌وه كه‌س ده‌رفه‌تی ئه‌وه‌ی نییه ئه‌م به‌رپرسیاریه‌تییه جێبه‌جێبكات.
له‌گه‌ڵ ئه‌وه‌شدا، له سایه‌ی ئه‌م دۆخه‌ی له ئیمڕالی و ئه‌درنه له ئارادایه، ده‌رفه‌تمان نییه ئه‌م پڕۆسه‌یه به سه‌ركه‌وتوویی جێبه‌جێ بكه‌ین، ئه‌مه واقیعه‌كه‌یه، سه‌پاندن، سه‌ودا و مه‌رج نییه. هیواخوازم كه كۆمسیۆنی په‌رله‌مان بچێته ئیمرالی، ئه‌و كاته به‌چاوی خۆی ده‌بینێ مه‌به‌ستم چیه و به وردی گوێبیستی هه‌موو ڕاستیه‌كان ده‌بێت.
2- كین و نه‌فره‌تم له به‌رامبه‌ر كه‌س نییه، لۆ كەسێكی به‌م شێوه‌یه‌شم نییه. ئه‌گه‌ر ڕۆژێك ئازادبم و قه‌بوڵی بكه‌ن، ئه‌وه ئاماده‌م هه‌موو فیگوڕه سیاسیه‌كان ببینم، له‌وانه به‌ڕێز سه‌ركۆمار، به‌ڕێز ئوزگور ئۆزه‌ل، به‌ڕێز ده‌وڵه‌ت باخچه‌لی، به‌ڕێز عه‌لی باباجان، به‌ڕێز ئه‌حمه‌د داودئۆغڵو، به‌ڕێز فاتیح ئاربه‌كان، به‌ڕێز ئه‌ركان باش، به‌ڕێز مه‌حمود ئاریكان و به‌ڕێز موساوات ده‌روێشئۆغڵو. حه‌ز ده‌كه‌م گوێ بگرم له پێشنیار و ڕه‌خنه‌كانیان، بۆچوون و تێڕوانینی تایبه‌تی خۆشم به ڕاستگۆیانه باس بكه‌م سه‌باره‌ت به‌دواڕۆژی وڵات.
به‌دڵسۆزیه‌وه ئه‌مه ده‌كه‌م، به‌بێ ڕه‌چاوكردنی پێگه‌ی سیاسی و به‌رپرسیاریه‌تی. ئه‌گه‌ر به‌ڕێز سه‌ركۆمار ڕاستگۆیانه سیاسه‌تێك په‌یڕه‌و بكات و تیایدا ئامانج لێی هه‌ڵدانه‌وه‌ی لاپه‌ڕه‌یه‌كی نوێ و ڕیفۆرمی دیموكراتییانه و باشتكردنی دۆخی كۆمه‌ڵایه‌تی و ئابووری بێت، بێ دوودڵی پشتگیری لێده‌كه‌م، وه‌كو ئه‌وه‌ی به ره‌هایی پشتگیری له پڕۆسه‌ی ئاشتی ده‌كه‌م.
3- من له‌گه‌ڵ پارتی كۆمه‌ڵگای دیموكراتی (ده‌ته‌په) ده‌ستم به سیاسه‌ت كرد و ئه‌مڕۆش (ده‌مپارتی) تاكه پارتی منه كه نوێنه‌رایه‌تی نه‌ریتی سیاسیمان ده‌كات. ئه‌گه‌ر ڕۆژێك ناچاربم سیاسه‌ت بكه‌م ئه‌وه (ده‌مپارتی) ماڵ و مۆڵگه‌ی منه. هه‌موو لێكدانه‌وه‌كانی پارتێكی دیكه دروست ده‌كه‌م، یان ده‌چمه ناو پارتێكی دیكه ته‌نیا بانگه‌شه‌یه‌كی بێ بنه‌مایه.
4- ململانێی سیاسی ته‌نیا له چوارچێوه‌ی پارتی سیاسی به‌ڕێوه‌ناچێت. هه‌موو لایه‌نه‌كانی ژیان زه‌مینه‌ی سیاسه‌تكردن و ململانێ له‌خۆ ده‌گرێت. ئه‌گه‌ر به‌شێوه‌یه‌كی كاراییانه‌ش له سیاسه‌تدا به‌شداری نه‌كه‌م، ئه‌وه هه‌موو كاتێك به شێوه‌یه‌كی كارا له‌ناو ململانێكاندا جێده‌گرم.
جگه له‌وانه‌ی ئاماژه‌م پێكردوون هه‌موو شتێك، ده‌نگۆیه، گریمانه و قسه‌ڵۆكه.
سه‌ره‌تا ئاشتی بونیاد ده‌نێین، دواتر هه‌موومان به‌یه‌كه‌وه، هه‌نگاو به هه‌نگاو ده‌نێین بۆ دادپه‌روه‌ری، یه‌كسانی و برایه‌تی. هیچ ده‌رفه‌تێك بۆ نائومێدی، ڕه‌شبینی و بێهیوایی نییه. به‌دڵنیایه‌وه سه‌ركه‌وتوو ده‌بین.
له ئێستادا، چاو و گوێمان له‌سه‌ر ئەو بڕیارە بوێر و مێژووییە کە لەلایەن لیژنەی پەرلەمانەوە ده‌درێت.
سه‌ڵاحه‌دین ده‌میرتاش
زیندانی ئه‌درنه