ڕۆژی چوارشەممە ٥-١١-٢٠٢٥ لقی هەولێری کۆمەڵەی پێشمەرگە دێرینەکانی حزبی شیوعی کوردستان، ئاهەنگێکی پشتیوانیکردنی لە ثائرة یوسف عزیز کاندیدی ژمارە 342 بۆ پەرلەمانی عێراق رێکخست.
ئاهەنگەکە بە بەشداری هاوڕێ هیوا عومەر جێگری سکرتێری کۆمیتەی ناوەندی و ئەندامانی مەکتەبی سیاسی و کۆمیتەی ناوەندی و سەرۆک و ئەندامانی ئەنجومەنی باڵای کۆمەڵەی پێشمەرگە دێرینەکان و مەڵبەندی هەولێر و پێشمەرگە دێرینەکان بەڕێوەچوو.
سەرەتای ئاهەنگەکە بەڕێز گرتن و وەفاداریی بۆ شەهیدان دەستیپێکرد، پاشان لەلایەن هاوڕێ کاروان مورتکەیی بەرپرسی لقی هەولێری کۆمەڵە بەخێرهاتنی ئامادەبووان کرا.
پاشان هاوڕێ حەمەڕەشید قەرەداغی سەرۆکی کۆمەڵەی پێشمەرگە دێرینەکانی حزبی شیوعی کوردستان وتارێکی خوێندەوەو جەختی لەسەر پشتیوانیی کردن لە ثائرة یوسف عزیز کاندیدی ژمارە 342 کردەوە وەکوو کەسێکی لێهاتوو و شایستە و هیواداربوو پێشمەرگە دێرینەکان دەنگی پێبدەن.
لە کۆتاییدا وتاری مەکتەبی سیاسی حشک لەلایەن هاوڕێ هیوا عومەر خوێنرایەوە و تەئکیدی کردەوە هاوڕێ ثائرة یوسف عزیز کاندیدی ژمارە 342 نوێنەری بەرەی مەدەنیەت و ماف و داخوازییە ڕەواکانی خەڵک دەبێت و بە بەرنامەوە بۆ داکۆکیکردن لە ماف و ئازادییە گشتییەکان و پاراستنی مافی خەڵک بەبێ جیاوازی کاردەکات.
لە ئاهەنگەکەدا چەندین شیعر و دروشم خوێنرانەوە.
