هاورێ كرێكار- سلێمانی
ئەمڕۆ ٢٢ی نۆڤەمبەر، لە هۆڵی عزەدین مستەفا ڕەسووڵ لە شاری سلێمانی، مەکتەبی سیاسیی حزبی شیوعیی کوردستان، کۆڕیادێکی ماتەمینیی بۆ چلەی کۆچی دوایی تێکۆشەر و سەرکردەی شیوعی، ئەبو فاروق ساز کرد.
لە مەراسیمەکەدا، هاوڕێ ئەبو کاروان سکرتێری کۆمیتەی ناوەندی، هاوڕێیان کاوە مەحمود و کەمال شاکر سکرتێرانی پێشووی حزب، هیوا عومەر جێگری سکرتێری کۆمیتەی ناوەندیی حزبی شیوعیی کوردستان، پەخشان زەنگەنە هاوژینی هاوڕێ ئەبو فاروق، سکرتێر و جێگر و ئەندامانی مەکتەبی سیاسی، بەرپرسانی حزب و لایەنە سیاسییەکان، کەسایەتی و هونەرمەندان و نوێنەرانی ڕێکخراوەکانی کۆمەڵی مەدەنی ئامادە بوون.
سەرەتا ئامادەبووان چەند چرکەیەک بۆ ڕێزلێنان لە گیانی پاکی شەهیدان ڕاوەستان. دواتر وتاری مەکتەبی سیاسیی حزب لەلایەن هاوڕێ ئەبو کاروان-ەوە خوێندرایەوە، کە تێیدا ئاماژەی بەوە دا: "ئەمڕۆ پێکەوە لە مەراسیمی یادكردنەوەی ژیانئاوایی سیاسەتمەدار و سەرکردەی تێکۆشەر، هاوڕێ عومەر عەلی شێخ-دا ڕاوەستاوین، کە مەخابن سەرلەبەیانیی ڕۆژی ٢ی ١٠ لە ماڵەكەی خۆی لە شاری هەولێر دڵە گەورەکەی لە لێدان کەوت و دوا ماڵئاوایی لێکردین."
وتیشی: "هاوڕێ عومەر عەلی شێخ ناسراو بە (ئەبو فاروق) لە ساڵی ١٩٤٦ پەیوەندی بە حزبی شیوعیی عێراقەوە دەکات، وەک گەنجێکی لێوەشاوە و بەئەمەکی خەباتی چینایەتی و نیشتمانی، دەکەوێتە سووسەی دۆزینەوەی ڕێچکەی تێکۆشان و داکۆکی لە ماف و داخوازیی چینی کرێکار. لە دوای كودەتای شوومی ساڵی ١٩٦٣، لە شاری كەركووك سەرپەرشتیی ڕێكخستنەكانی حزبی پێ دەسپێردرێ و وەک کادرێکی بەهەڵمەت چاپخانەی نهێنیی حزب لەم شارە دەرباز دەكات و ڕەوانەی شاخی دەكات، تا لەو ڕێگایەوە دەنگی حزب و چالاکییەکانی بگاتە جەماوەر".
ئاماژەی بەوەش کرد: "بەهۆی پێگەیشتنی لە ڕێزەکانی حزب و تێگەیشتنی لە دید و تێڕوانینی مارکسیزم و بنەماکانی سۆسیالیزم، هاوڕێ عومەر عەلی شێخ لە ساڵی ١٩٦٤ دەبێتە ئەندامی كۆمیتەی ناوەندی و پاشان مەكتەبی سیاسیی حزبی شیوعیی عێراق. لەو ماوەیەشدا چەندین جار دەستگیر كراوە و بە لێهاتوویی و چاپووکیی خۆی توانیویەتی بەربەستی زیندان ببڕێت و هاوڕێ زیندانییەكانیشی لەگەڵ خۆی ڕزگار بکات. ئیتر لەو کاتەوە هەتا كۆنگرەی پێنجەمی (حشع) لە ساڵی ١٩٩٣، وەک سەرکردە و سیاسییەکی قاڵبووی کاروانی تێکۆشانی ئاشکرا و نهێنی، درێژە بە خەبات و تێکۆشانی خۆی دەدات و بەردەوام بووە لە كاری ڕێكخستن و سەركردایەتیكردنیان، بەتایبەتی لە ناوەڕاست و باشووری عێراق. لەگەڵ ڕاگەیاندنی حزبی شیوعیی كوردستان لە ٣٠-٦-١٩٩٣، بە سكرتێری كۆمیتەی ناوەندیی حزب هەڵدەبژێردرێت و بەرپرسیارێتیی گشتیی حزب هەڵدەگرێت و بێ دوودڵی بەردەوام دەبێت لە تێکۆشان و ڕووبەڕووبوونەوەی هەموو ئەو لەمپەرانەی لەو قۆناغەدا دەخرانە بەردەم ڕەوتی تێکۆشانی حزبی شیوعیی کوردستان."
دواتر، هاوڕێ ڕائید فەهمی، سکرتێری کۆمیتەی ناوەندیی حزبی شیوعیی عێراق، وتەیەکی پێشکەش کرد و تێیدا باسی لە ڕۆڵ و تێکۆشانی هاوڕێ ئەبو فاروق کرد کە شیوعییەکی قارەمان و تێکۆشەر بووە بۆ خزمەتکردنی ڕێبازەکەی فەهد و هەمیشە گیانی ئامادە بووە بۆ جێبەجێکردنی ئەرکی حزب؛ بۆیە شیوعییەکان لە کوردستان و عێراق، سەرکردەیەکی قارەمان و تێکۆشەر و خۆنەویستیان لەدەست داوە، هاوڕێ ئەبو فاروق لە هەموومان چووە.
لە بەشێکی دیکەی کۆڕیادەکەدا، ژیان و تێکۆشانی هاوڕێ ئەبو فاروق لە ڕێگای کورتەفیلمێکی دیکۆمێنتارییەوە کە لەلایەن ڕاگەیاندنی مەڵبەندی سلێمانیی حزبی شیوعیی کوردستانەوە ئامادە کرابوو، خرایە ڕوو. دواتر هاوڕێ ئازەر پارچە پەخشانێکی پێشکەش بە ئامادەبووان کرد.
لە مەراسیمەکەدا، ژمارەیەک بروسکەی ماتەمینی خوێندرانەوە. تێیدا بافڵ تاڵەبانی، سەرۆکی یەکێتیی نیشتمانیی کوردستان، هاوخەمیی خۆی بۆ هاوڕێیان و خانەوادەی هاوڕێ ئەبو فاروق پیشان دا و ئاماژەی بە ڕۆڵی ناوبراو لە خەبات و تێکۆشانی کوردستاندا کرد.
لە کۆتاییی مەراسیمەکەدا، هاوڕێ پەخشان زەنگەنە، هاوژینی هاوڕێ ئەبو فاروق، وتەی بنەماڵەی پێشکەش کرد و تێیدا باسی لە ژیانی هاوبەشی خۆی و هاوڕێ ئەبو فاروق کرد و تیشکی خستە سەر تێکۆشان و کارکردنی.
