لە درێژەی سەردانەکەیدا بۆ ووڵاتی چین، هاوڕێ نەبەز مستەفا ئەندامی مەکتەبی پەیوەندییەکانی حزبی شیوعی کوردستان چاوی کەوت بە خاتوو سەن ھایان، جێگری وەزیری دەرەوەی حکومەتی چین، لە دیدارێکدا خاتوو سەن هایان تێڕوانینێکی وردیان لەبارەی مۆدێلی حوکمڕانیی پارتی کۆمۆنیستی چین، چوارچێوەی دژەگەندەڵی، سیاسەتەکانی بنەماکراو لەسەر داھێنان و ستراتیژییەکانی گەشەپێدانی گەل-خستەڕوو.
جێگری وەزیری دەرەوەی چین، پلانی پانزەی پێنج ساڵەی (٢٠٢٦-٢٠٣٠)ی خستەڕوو، کە تێیدا گرنگی دەدات بە وزەی سەوز، گۆڕانی دیجیتاڵی، بووژاندنەوەی لادێکان و خۆبژێوی و تەکنەلۆژی لە بواری زیرەکیی دەستکرد و نیمچەگەیەنەرەکان، و ئامانجیش لێی گەشەی ساڵانەی بەرهەمی ناوخۆیی بە ڕێژەی نزیکەی ٥٪، پلانەکە لەسەر دەستکەوتەکانی پلانی چواردەی پێنج ساڵە لە بواری بنبڕکردنی ھەژاری و خۆڕاگریی دوای پەتای جیهانی بنیات نراوە.
هەروەها دیدگای سەرۆک شی جین پینگی بۆ کۆمەڵگەیەکی جیهانیی چارەنووسی هاوبەش ڕوونکردەوە، کە جەخت لەسەر فرەلایەنی، هاوکاریی "یەک پشتێنە و یەک ڕێگا" و وەڵامدانەوەی بەکۆمەڵ بۆ گۆڕانی کەشوهەوا و سەقامگیریی جیهانی دەکاتەوە.
ئەم دەستپێشخەرییەی بەشی نێودەوڵەتیی پارتی کۆمۆنیستی چین، ئامانجی بەهێزکردنی هاوکاریی نێوان پارتەکان و گەشەپێدانی هاوبەشە.
جێگای باسە هاوڕێ نەبەز مستەفا نوێنەری حزبی شیوعی کوردستان بە یاوەری ٢١ نوێنەر پارتە سیاسییە جیاوازەکانی باشووری ئاسیا، ئەفریقا، ئەوروپا، ئەمریکای لاتین و ناوچەکانی دیکە، لەلایەن بەشی نێودەوڵەتیی پارتی کۆمۆنیستی چین (IDCPC) بانگهێشتی چین کراوەو لەو سەردانەیدا ژمارەیەک دیداری لەگەڵ بەرپرسانی حکومەت و بەرپرسانی حزبی کۆمۆنیستی چین و نوێنەرانی حزبە شیوعی و چەپەکان ئەنجامداوە.