وەزارەتی تەندروستی عێراق بە فەرمی دەرگای دامەزراندنی بەڕووی ژمارەیەک گرووپی پزیشکی و تەندروستی کردەوە، کە بریتین لە دەرچووانی پزیشکیی ددان، دەرمانسازی و بەشە تەکنیکییە تەندروستییەکان، بە تایبەت ئەوانەی لە کۆلێژەکانی هەرێمی کوردستان و زانکۆکانی دەرەوەی عێراق خوێندنیان تەواو کردووە بۆ ساڵی خوێندنی 2023-2024.
بەگوێرەی ڕاگەیەندراوێکی وەزارەتەکە، و بە ڕەزامەندیی ساڵح مەهدی حەسناوی، وەزیری تەندروستی، فەرمانگەی پلاندانان و گەشەپێدانی سەرچاوەکان لینکی ئەلیکترۆنی پڕکردنەوەی فۆڕمی دامەزراندنی کاراکرد.
داوا لە دەرچووانی پزیشکیی ددان، دەرمانسازی، کۆلێژە تەکنیکییە تەندروستییەکان، هەروەها پەیمانگە پزیشکی و تەندروستی و تەکنیکییەکان کراوە کە خوازیارن لەسەر میلاکی وەزارەتی تەندروستی عێراق دابمەزرێن، فۆڕمەکان پڕبکەنەوە. دامەزراندنەکە بە پشت بەستن بە یاسای ژمارە 6ی ساڵی 2000 دەبێت.
مۆڵەتی یەک مانگە بۆ پڕکردنەوەی فۆڕم
وەزارەتی تەندروستی ئاماژەی بەوەداوە کە لینکەکە بۆ ماوەی مانگێک لە ڕۆژی بڵاوکردنەوەی ڕاگەیەندراوەکەوە کارا دەبێت.
ئەمەش دەرفەتێکە بۆ هەزاران دەرچوو تا خۆیان بۆ پێشبڕکێی وەرگرتن ئامادە بکەن.
ڕاگەیەندراوەکە جەختی لەوە کردەوە کە بڕیاری کۆتایی لەسەر دامەزراندنەکان و وەرگرتنی ناوەکان دەدرێت دوای پەسندکردنی خشتەی بودجە لەلایەن وەزارەتی دارایی عێراقەوە. دامەزراندنەکان لەسەر بنەمای "پێویستیی وەزارەت" ڕێکدەخرێن، ئەمەش واتا وەرگرتن بەپێی ئەو بۆشاییانەی لە دامودەزگاکانی تەندروستی عێراقدا هەن دیاری دەکرێت.
ئەم هەنگاوە نوێیەی وەزارەتی تەندروستی بە بەشێک لە هەوڵەکانی حکومەتی فیدراڵی دادەنرێت بۆ پڕکردنەوەی کەمیی کارمەندانی پزیشکی و تەندروستی لە دامەزراوە حکومییەکاندا.
