ئیمداد قازی، سکرتێری گشتی حزبی شیوعی پاکستان، لە نوێترین پەیامیدا ڕایگەیاند کە وڵاتەکەی باجی سیاسەتە هەڵەکانی ڕابردوو و تێوەگلانی لە ستراتیژییەکانی ئەمریکا دەدات. قازی ئاماژەی بەوە کرد کە گەڕانەوەی تاڵیبان بۆ دەسەڵات پیلانێکی داڕێژراوی واشنتۆن بووە بۆ گۆڕینی ئەفغانستان بۆ چەقی ناردنی تیرۆر بۆ وڵاتانی ناوچەکە، لەوانەش چین و ڕووسیا.
ناوبراو جەختی کردەوە کە "ئیسلامی سیاسی" وەک ئامرازێک لەلایەن ئیمپریالیزم و جەنەڕاڵەکانی پاکستانەوە بۆ لێدانی سیستەمی سۆسیالیستی بەکارهێنراوە و ئێستاش گەلی پاکستان و پەشتونەکان دەبنە قوربانی ئەو بازرگانییە سیاسییەی بە ناو ئایینەوە دەکرێت. لە کۆتاییدا، قازی داوای یەکگرتنی هێزە نیشتمانی و پێشکەوتنخوازەکانی کرد بۆ کۆتایهێنان بەم شەڕە و پێکهێنانی حکومەتێکی سەربەخۆ کە بەرژەوەندییەکانی گەل و پەیوەندی دۆستانە لەگەڵ دراوسێکاندا بپارێزێت.
