لە حەوتەمین شەوی هێرشە ئاسمانییەکانی ئەمریکادا بۆ سەر خاکی ئێران، چەندین ناوچەی ستراتیژی و ژێرخانی پارێزگای هورموزگان کرانە ئامانج. لە بەرپەرچدانەوەیەکیشدا، سوپای پاسدارانی ئێران زنجیرەیەک هێرشی توندی کردە سەر بنکەکانی ئەمریکا لە چەند وڵاتێکی ناوچەکە.
زیانەکانی هێرشی ئەمریکا بۆ سەر هورموزگان
ئاژانسی هەواڵی "تەسنیم"ی نزیک لە سوپای پاسداران ڕایگەیاند، لە حەوتەمین شەوی هێرشەکانی ئەمریکادا، دوو پردی گرنگ لەسەر ڕێگای "بەندەر عەباس-ڕودان" کراونەتە ئامانج و زیانیان پێگەیشتووە. ئاژانسەکە ئاماژەی بەوەش کردووە کە هێرشەکان کوژراو و برینداری لێکەوتووەتەوە، بەڵام هێشتا هیچ ئامارێکی فەرمی و ورد لەسەر ژمارەی قوربانیان و قەبارەی زیانەکان بڵاونەکراوەتەوە.
لای خۆشیانەوە، پارێزگاری هورموزگان بەرەبەیانی ئەمڕۆ شەممە (١٨ی تەموزی ٢٠٢٦) ڕایگەیاند کە بەهۆی هێرشەکانەوە ئەم شوێنانە زیانیان بەرکەوتووە:
- تونێلی میرزایی: بە تەواوی داخراوە.
- پردی ڕووباری شوور: لەسەر ڕێگای بەندەر عەباس بۆ سیرجان کراوەتە ئامانج.
- پردی تەوەرەی چوون: لە سێڕێیانی میناب بەرەو ڕودان پێکراوە.
- دوورگەی لارک: کاتژمێر ١:٣٠ی بەرەبەیان شوێنێک لە دوورگەکە و تاوەری چاودێریی دەریاییەکەی کراونەتە ئامانج.
ئاگاداری بۆ هاوڵاتیان: پارێزگاری هورموزگان داوای لە هاوڵاتیان کردووە بەهۆی مەترسیی و زیانەکانەوە، لە هاتوچۆکردن لەم ڕێگایانەدا خۆیان بپارێزن.
وەڵامدانەوەی توندی ئێران بۆ سەر بنکەکانی ئەمریکا
لە بەرامبەر ئەم هێرشانەدا، تەلەفزیۆنی فەرمی ئێران ڕایگەیاند کە سوپای وڵاتەکەی وەک وەڵامدانەوەیەک، زنجیرەیەک هێرشی سەربازیی کردووەتە سەر چەند ئامانجێکی سوپای ئەمریکا لە وڵاتانی کوەیت، ئوردن و بەحرەین.
بەپێی ڕاگەیەندراوێکی فەرمی سوپای پاسداران، بەرەبەیانی ئەمڕۆ شەممە، هێرشی چڕ کراوەتە سەر بنکە و ناوەندەکانی پشتیوانی هێزی پیادەی ئەمریکا لە هەریەک لە بنکەکانی "عەریفجان" و "ناوەندی چاودێریی بنکەی عەلی سالم" لە کوەیت، و جەختیان کردووەتەوە کە زیانێکی زۆریان بەو بنکانە گەیاندووە.
