ئۆفیسی هەواڵ
لیندزی گراهام، سێناتۆری دیاری کۆمارییەکانی ئەمریکا ڕایگەیاند کە لە کۆبوونەوەیەکی درێژخایەندا لەگەڵ دۆناڵد ترەمپ، پلانی توندی واشنتنیان بۆ کۆنترۆڵکردنی گەرووی هورمز بە زەبری هێز تاوتوێ کردووە، ئەمەش لە ئەگەری شکستهێنانی دانوستانەکانی ئێستا لەگەڵ تاران.
کۆبوونەوەی چوار کاتژمێر و نیوی: گراهام لەگەڵ ترەمپ بە وردی باسی لە بژاردە سەربازییەکان کردووە لە ئەگەری بنبەستبوونی گفتوگۆکان لەگەڵ ئێران.
سەپاندنی باج بەسەر کەشتییەکاندا: ئەمریکا پلان دادەنێت باج بخاتە سەر سەرجەم ئەو کەشتیانەی بە گەرووەکەدا تێپەڕدەبن، بە مەبەستی دابینکردنی تێچووی ئۆپەراسیۆنە سەربازییەکانی لە ناوچەکەدا.
هەڕەشەی تێکشکاندنی هێزەکانی ئێران: گراهام هۆشداری توندی دایە تاران و ڕایگەیاند:
"ئەگەر ئێران لەسەر کۆنترۆڵکردنی گەرووەکە رکابەریی ئەمریکا بکات، ئەوا بە تەواوی تێکی دەشکێنن."
ئەم لێدوانە توندانەی گراهام لە کاتێکدایە کە ناوچەکە لە ماوەی ڕابردوودا شاهیدی پێشهاتی خێرا و ئەرێنی بووە بەو پێیەی واشنتن و تاران گەیشتبوونه یاداشتێکی لێکتێگەیشتنی سەرەتایی بۆ سەرلەنوێ کردنەوەی گەرووی هورمز بەڕووی هاتوچۆی کەشتیوانی نێودەوڵەتیدا. بەڵام ئەم هەڕەشە نوێیانە ئەگەری ئاڵۆزبوونی دووبارەی دۆخەکە نیشان دەدەن.
گرنگی ستراتیژیی گەرووی هورمز
گەرووی هورمز بڕبڕەی پشتی ئابووری و وزەی جیهانە و پێگەیەکی یەکجار هەستیاری هەیە:
شێڕەگی وزەی جیهان: ڕۆژانە نزیکەی ٢٠٪ـی نەوتی جیهانی پێدا تێپەڕدەبێت.
کاریگەری لەسەر بازاڕەکان: هەر جۆرە ناسەقامگیرییەک یان گرژییەکی سەربازی لەم ناوچەیەدا، کاریگەرییەکی ڕاستەوخۆ و خێرا لەسەر بەرزبوونەوەی نرخەکانی وزە و تێکچوونی ئابووری جیهانی دروست دەکات.
