فەرماندەی ئاسایشی ناوخۆی هەسەدە رایگەیاند كۆمەڵگای نێودەوڵەتی ئاگادار دەكەینەوە كە هێرش دەكرێتە سەرمان و ئێمەش ئامادەی بەرگری كردنین.
ئاخین نوجان، لە پەیامێكدا لە ڕێگەی تۆمارێكی ڤیدیۆییەوە بڵاویكردەوە، جارێكی دیكە بە گەلی خۆمان و كۆمەڵگەی نێودەوڵەتی دەڵێین، هێرش دەكرێتە سەرمان و بەرگری لەخۆمان دەكەین، ئێمە خوازیاری شەڕنین و نامانەوێت شەڕبكەین، لە هەمان كاتدا دەڵێین، ئامادەین و خۆمان بەختدەكەین بۆ گەلەكەمان.
ئاماژەی بەوەشكرد، ورەی شەڕڤان و فەرماندەكانمان بەرزەو بریندارەكانیشمان دوای چارەسەركردنی برینەكانیان، گەڕاونەتەوە بۆ سەنگەرەكانی خۆیان. هەروەها خاوەنی ئیرادەیەكی بەهێزین و گەلەكەمان دڵنیادەكەینەوە، هیوای سەركەوتنیش بۆ شەڕڤانان و فەرماندەكانیان دەخوازێت.
لە دوای نیوەڕۆی دوێنی سێشەممە جارێكی دیكەی گرژی و پێكدادان لە نێوان ئاسایشی گەڕەكە كوردییەكانی حەلەب و گروپەكانی سەر بە حكومەتی سوریا دروستبو، كە بەگوێرەی ڕاگەیەندراوی ئاسایش، "چوار هاوڵاتی مەدەنی كورد گیانیان لەدەستداوە كە یەكێكیان منداڵ بو".
ئەوە لەكاتێكدایە كە نیوەڕۆی دوێنی سێشەممە، گەڕەکەکانی شێخ مەقسود، ئەشرەفیە و بەنی زەید لە حەلەب، ڕوبەڕوی هێرشی توند و بۆردومانی هەڕەمەکی بە چەکی قورس، تۆپ و موشەک لەلایەن گروپەکانی حکومەتی کاتی بونەتەوە کە ڕاستەوخۆ ماڵی هاوڵاتیانی مەدەنی دەکەنە ئامانج و هێزەكانی ئەو دو گەڕەكەش بە توندی وەڵامیان داونەتەوە، ئەوەش بەگوێرەی میدیاكانی ڕۆژاڤای كوردستان.
