هەموو كاری حزبیمان بۆ هەڵبژاردن و هەموو ووزە و تواناكان لە پێناو سەرخستنی لیست و كاندیدەكانی حزب
سەر لەبەیانی رۆژی 20/7/2024 لە هۆڵی شەهیدانی عەنكاوە لە هەولێر كۆنفرانسی گشتی هەڵبژاردن بەسترا لە ژێر دروشمی ( هەموو كاری حزبیمان بۆ هەڵبژاردن و هەموو ووزە و تواناكان لە پێناو سەرخستنی لیست و كاندیدەكانی حزب ) بە ئامادە بوونی سكرتێری كۆمیتەی ناوەندی و ئەندامانی كۆمیتەی ناوەندی و كادیرەكانی تایبەتمەندییەكان و كاندیدانی حزب لە بازنەكانی)هەولێر و سلێمانی و دهۆك و هەڵەبجە و پسپۆرانی بواری هەڵبژاردن (.
دەستپێكی كارەكانی كۆنفرانس بە سرودی نێونەتەوەیی و ساتێك وەستان بۆ گیانی پاكی شەهیدانی حزب و بزوتنەوەی رزگاریخوازی گەلی كوردستان دەستیپێكرد .
لە كۆنفرانسەكەدا ووتاری هاوڕێ سكرتێری كۆمیتەی ناوەندی و مەكتەبی هەڵبژاردن و راپۆرتی مەڵبەندەكان و بازنەكانی هەڵبژاردن و بەشداری ئامادەبوان بەرنامەی كاری كۆنفرانس دەوڵەمەندكرد .
ئامانجی سەرەكی بەستنی كۆنفرانسی گشتی هەڵبژاردن هەڵوەستە كردن و پیا چوونەوە و بەدواداچوونی زیاتر بوو بۆ كارو چالاكی رێكخستنەكان و چارەسەرەكردنی ئەو گرفت و بەربەستانەی كە دێتە رێگای ئیش و كارەكانی حزب لە پرۆسەكە .
شایانی باسە كۆنفرانس گوڕ وتینێكی گەورەی دایە رێكخستنەكان بۆ ئەنجامدانی كار و چالاكی جەماوەری زیاتر و وێستگەیەكی گرنگ بوو بۆ بەرزكردنەوەی هۆشمەندی هەڵبژاردن و گۆڕانكاری دیموكراسی .
هەروەها سەرجەم ئامادەبوان جەختیان لە جێبەجێ كردنی دروشمی ناوەندی حزب لە پێناو سەرخستنی لیست و كاندیدانی حزب كردەوە .
سەركەوتوو بێت حزبی شیوعی كوردستان
سەركەوتوو بێت لیست و كاندیدانی حزب
مەكتەبی هەڵبژاردنی ناوەندی
20/7/2024
وتاری هاوڕێ كاوە محمود سكرتێری كۆمیتەی ناوەندی حزبی شیوعی کوردستان، لە كۆنفرانسی گشتی هەڵبژاردن
هاوڕێیان ئەمڕۆ هەموومان لێرە كۆبوینەتەوە ، لە هۆڵی شەهیدانی عەینكاوە ، بۆ ڕاپەڕاندنی ئەركێكی گرنگی حزبیمان ئەویش گرێدانی كۆنفرانسێكی گشتی تایبەتە بە هەڵبژاردن و پرۆسەی ڕێكخستنەوەو وەگڕ خستنەوەی وزەو تواناكانمانە لە ژێر دروشمی (هەموو كاری حزبیمان بۆ هەڵبژاردن ، هەموو وزەو تواناكان لە پێناو سەرخستنی لیست و كاندیدانی حزب)
لەمرۆدا هەڵبژاردن یەكێك لە هێماكانی هەر سیستەمێكی دیموكراسی و، بە یەكێك لەو ئامرازە گرنگانە دادەنرێ، كە تێیدا هاووڵاتیان دەتوانن لە ڕێگەی دەنگدان و هەڵبژاردن نوێنەرانی خۆیان بەشداری لە دەركردنی بڕیار و بەڕێوەبردنی وڵاتدا بكەن و ئەمەش سەرەڕای دەیان تێبینی لە سەر نەزاھەتی پرۆسەكەو ئەو ساختاكارییانەی كە لە هەڵبژاردنەكاندا ئەنجام دراوە ، وەك سەرەتایەكی باش كاریگەری لە سەر پرۆسەی سیاسی ھەرێمی كوردستان دانا و لەدوای ڕاپەڕینەوە بوە هەوێنی پەیرەوكردنی جۆرێك لە دیموكراسی و حزبمانیش لەم چوارچێوەیەدا بەشداری كاراو بەرچاوی هەبوە و ڕۆڵێكی گرنگی لە بەڕێوەبردنی ململانێ سیاسییەكاندا گێڕاوەو كاریگەری بەرچاوی هەبوە لە بوارەكانی گەشەی كۆمەڵایەتی و نوێنەرایەتیی ئافرەتان، هاندانی هاووڵاتیان بۆ بەشداری لە پرۆسەی هەڵبژاردن، گۆڕانكاری لە سیستەمی بەڕێوەبردنی وڵات، گەشەكردنی سیستەمی دیموكراسی و سەقامگیریی سیاسی و هتد، رێگایەكیشە بۆ بینینی ئەنجامی كارەكانمان و هەڵسەنگاندنی كاری حزبیمان .
ھاوڕێیان/
هەر لەسەر ڕۆشنای ئەو بنەمایە ئێمە لە كۆبونەوەی كۆمیتەی ناوەندی بەشداریمان لە پرۆسەی هەڵبژاردن لەم قۆناغەدا بە بەشداری لە تێكۆشانێكی سەخت وێناكرد ، ئەو وێناكردنەش لە ترسەوە سەرچاوەی نەگرتوە بەڵكو لە هەڵومەرجی نێودەوڵەتی و ھەرێمایەتی و ژینگەی سیاسی عێراق و كوردستان و ڕەوشی ناوخۆیی حزبیمان و توانای مرۆیی و دارایی و ڕاگەیاندنمانەوەیە و پێمان وایە ئەم بارودۆخە ناكۆكییەكان تێیدا گەیشتوەتە لوتكە ، شەڕی سەپاندن و بەرژەوەندی دونیای دابەشكردوەو بەرەو دوو جەمسەری .
هەرێمی كوردستان لەمرۆدا رووبەرووی قەیرانی گشتگیر دەبێتەوە رۆژ لە دوای رۆژ ماف و ئازادییەكانیش لە پاشەكشەدان و بەشداریمان لە ھەڵبژاردنی پەرلەمانی كوردستان گرنگە بۆ رووبەروو بونەوە و گۆرانكاری، لەم شەڕەدا چەك و بیرو باوەڕی شیوعییانەو وابەستەیی بەحیزبەوە خالێكی ئێجگار گرنگە و دەبێت بە عقڵیەتی كاری بە كۆمەڵ و ئینسجام كاربكەین و پەیوەندی بەھێزمان بەجەماوەرەوە ڕێگای سەركەوتنی حزب بەدەست دێنێ و نابێ لێی پاشگەزبینەوە بەتایبەت لەو هەڵوێستانەی كە پاڵپشتە بەهەڵوێستی خەڵكی ناڕازی و ئەو جەماوەرەی كە خواستی گۆڕانكاری ڕیشەی هەیە لەم سیستەم و دەسەڵاتەی هەرێم .
ھاوڕێیان /
حزبمان لە دوای كۆنگرەوە بە شێوەیەكی گشتی ھەناگاوەكانی زیاتر گورجكردەوە بەمەبەستی بەھێزكردن و كاراكردنەوەی مەكتەبی ھەڵبژاردنی ناوەندی و ئەو ڕێوشوێنانەی كە بۆ پرسی ھەڵبژاردن گرنگ و كاریگەرن و حزب پێویستی پێیەتی ، بۆیە بەم شێوەیەو بەپێكھاتەی ٧ ھاوڕێ ، مەكتەبی هەڵبژاردنی ناوەندی دیاری كرد كە ئەركی سەرەكیان ڕێكخستنی ئیش و كارەكان و سەرپەرشتی پرۆسەی ھەڵبژاردنەكانە ، ئەمەش بە ھاوكاری لیژنەی باڵای ھەڵبژاردن كە پێكھاتووە لە بەرپرسی ھەڵبژاردنی مەڵبەندەكان و كەسانی پسپۆڕ لەم بوارە
لە دوای كۆنگرەو دابەشكردنی ئیش و كارەكان، ئەم لێژنە باڵایە بەرنامەو میكانیزمی كاركردنی بۆ چوار ساڵ دیاریكردو قۆناغ بەقۆناغ دەستبەكاربوو ، ھەر لە سەرەتاوە بەپێی ڕاپۆرتێك بەرنامەو ڕوئیای حزبی شیوعی بۆ ھەڵبژاردنەكان دیاریكرد كە لە ڕاپۆرتی ئامادەكراوی ئەم كۆنفرانسەدا بە تێروتەسەلی ئاماژەی پێ كراوە .
لە بەرنامەی مەكتەبی هەڵبژاردنی ناوەندیدا زۆر بەڕوونی دیدو تێڕوانینی حزب بۆ سەرجەم ئەو پرس و بابەتانەی پەیوەستن بە ھەڵبژاردن و سیستەمی دیموكراسی و ئازادی گشتیەوە خراوەتە ڕوو، كە بۆچی جەخت لە بەرجەستەكردنی دیموكراسیەت و بەشداری كارای خەڵك دەكەینەوە لە هەڵبژاردن و گرنگی بەشدار بوونی ئێمە چیە لەم ھەڵبژاردنەداو كام یاساو كام كۆمسیونی باڵای ھەڵبژاردنمان دەوێ، لەپاڵ ئیقرار كردنی ئەم بەرنامە و پلانكارەشدا ، ئێمە جەختمان كردەوە لەوەی كە ئەم بەرنامەیە ، بەرنامەیەكی كرداریە و دەكرێ وەك ڕاپۆرتێكی ستراتیژی سیاسی و نەخشە ڕێگای تایبەت بە هەڵبژاردن تەماشابكرێت و تەنھا بۆ خولێكی ھەڵبژاردن نییە و بەڵكو سود بەخشە بۆ پرۆسەی ھەڵبژاردن و پێویستە كادرو ئەندامانی حزب وەك چەكێك لە كۆڕو كۆبونەوەكان و بواری خۆ ڕۆشنبیركردن و شارەزای بەكاری بێنن ، لەم پلانكارەشدا مەكتەبی هەڵبژاردنی ناوەندی ھەڵبژاردنی دابەش كرد بەسەر ٧ قۆناغ ( قۆناغی دەركردنی یاساكان ، قۆناغی تۆماری دەنگدەران ، تۆماری پارتەكان و دەنگدەران، ھەڵمەتی پڕوپاگەندەی ھەڵبژاردن ، ڕاگەیاندنی دەرئەنجامی ھەڵبژاردن و تانەكان ، ھەڵبژاردنی تایبەت و گشتییەكان ) لە ھەریەك لەم قۆناغانەشدا ئەركی ڕێكخراوەكان و ئەندامانی حزب بەشێوەیەكی ڕوون و ڕاشكاو دیاریكراوە بۆ چۆنێتی كاركردن لە بواری هەڵبژاردندا و دەكرێ بۆ هەریەك لەو خاڵانەی ئاماژەمان بۆكرد بابەتی گونجاوە بۆئەوەی بەبەرنامەی كاری لەسەر بكرێ .
ھاوڕێیانی ئازیز/لەسەرو بەندی ئەنجامدان و ئەنجام نەدانی هەڵبژاردن تێروانینی مەكتەبی هەڵبژاردن و كۆمیتەی ناوەندی بەم شێوەیەی خوارەوە بوو بۆچۆنیەتی بەشداریكردن لە هەڵبژاردنی پەرلەمانی كوردستان :-
بژاردەی یەكەم / پێكھێنانی لیستێكی هاوپەیمانیەتی فراوان كە گوزارشت لە بەرەیەكی فراوانی خەڵك بكات.
بژاردەی دوو/ لیستێكی هاوپەیمانیەتی لەگەڵ حزبە چەپەكان و پێشكەوتوخوازەكان و كەسایەتییەكان ئەنجام بدات .
بژاردەی سێیەم/ حزب بە تەنها بە لیستێكی تایبەت بەشداری بكات .
لە ئەنجامی چەندین كۆبونەوە لەگەڵ هێزو لایەنەكان گەیشتینە ئەنجامی پێكهێنانی لیستی (هاوپەیمانی هەرێمی كورستان)، كە پێكهاتووە لە حزبمان و حزبی سۆسیالیست و زەحمەتكێشان و بە بەشداری بزووتنەوەی دیموكراتی گەلی كوردستان بە كاندیدێك لە بازنەی هەولێر ، ئەم هاوپەیمانییەتە رێكەوتنێكی كاتییە و تەنها وەك تاكتیكێك هاوكارە بۆ سەركەوتنی لیستەكەو سەرخستنی كاندیدەكانمان، بۆیە ئێستا وا دەخوازێت و ئەركیشە بەبێ دوو دڵی كار بۆ سەرخستنی لیست و كاندیدەكان بكەین و لایەنە ئیجابییەكانی بخەینەڕوو تێبینییەكانیش بهێڵینەوە بۆ دوای ئەنجامدانی هەڵبژاردن .
ھاوڕێیانی ئازیز
گرێدانی ئەم كۆنفرانسە و ئامادەكردنی ڕاپۆرتی تایبەت بە هەڵبژاردن سەردێكی ئیش و كارەكانە بۆ بەرچاوی هاوڕێیانی بەشدار و دەمانەوێ لێرەوە بابەتیانە و بە ڕوحێكی دڵسۆزانەی شیوعیانەوە گفتوگۆێ تێكڕای پرسی هەڵبژاردن و بەشداریمان و چۆنێتی كاركردنمان بكەین لەم بوارەدا
ئامانجی سەرەكیمان ئەوەیە ئەم كۆنفرانسە دەرگایەك بێت بۆ سەركەوتنی لیستەكە و كاندیدەكانمان و بەدیدێكی ھاوڕێیانەو مەبدەئیانەوە بچینە پێشەوە.
لە كۆتایدا/ ئەوەی گرنگە كارەكان بە پلان بەرێوەبچێت و وەرزی نەبێت
ھەڵبژاردن بۆ كادرو ئەندامانی حزبمان بكەینە دەرفەت بۆ پەیوەندی كردن بەجەماوەرو تێگەیشتن لێیان و گەیاندنی سیاسەت و گوتاری حزبمان بەجەماوەر
دەبێت بە كردەیی بزانین تا ئێستا چیمان كردووە، چەند لێژنە دروستكراوە،رۆژانە چی دەكەین، ئایە ئەو پلان و بەرنامەی دامان ناوە رۆژانە چی لێی جێبەجێكراوە و بەدواداچونی بۆ بكەین
ئەم ھەڵبژاردنە كۆتا ھەڵبژاردن نییەو وەرچەرخان و قۆناغێكە دەبێت ببیتە بنەمای كارمان بۆ ھەڵبژاردنەكانی داھاتوو.