ڕێگای کوردستان
لە ساڵی ٢٠٠٥ەوە تا ئێستا، کورد لە دامەزراوە باڵاکانی عێراقدا خاوەنی پێگەی گرنگە، لەوانە پۆستی سەرۆک کۆمار، چەند خولێک جێگری سەرۆکی حکومەت، جێگری پەرلەمان، زیاتر لە ٦٠ پەرلەمانتار و چەندین وەزیر و بریکاری وەزارەت. بەڵام پرسیارەکە ئەوەیە کە ئایا ئەم پۆستانە چی سوودێکیان بۆ مافە ڕەواکانی گەلی کورد هەبووە؟
کاتێک سەیری دۆسێ ستراتیژییەکان دەکەین، دەبینین جێبەجێکردنی ماددەی ١٤٠ هێشتا بە هەڵپەسێردراوی ماوەتەوە و ناوچە دابڕێندراوەکان لەگەڵ کێشەی جددیی زەویوزاری جوتیارانی کورد و مەترسییەکانی تەعریبدا دەتلێنەوە.
لە ڕووی داراییەوە، شایستە داراییەکانی هەرێم، بوودجە و مووچەی فەرمانبەران بەردەوام وەک کارتێکی گوشاری سیاسی لە دژی کوردستان بەکاردەهێنرێن و ئەم پۆستانە نەیانتوانیوە چارەسەرێکی بنەڕەتی بۆ ئەم قەیرانە بدۆزنەوە. هاوکات، هێزەکانی پێشمەرگەش وەک بەشێک لە سیستمی بەرگری عێراق، هێشتا لە مافە دەستوورییەکانی خۆیان وەک مووچە، پڕچەککردن و هاوکاری لۆجیستی بێبەش دەکرێن.
بەبۆچونی چاودێرانی سیاسی، بەرپرسیاری یەکەمی ئەم پاشەکشە ستراتیژییەی کورد لە بەغدا، هێزە دەسەڵاتدارەکانی هەرێمی کوردستانن، کە بەرژەوەندییە حزبی و بازرگانییەکانی خۆیان خستە پێش مافە نەتەوەیی و نیشتیمانیەکانەوە. ئەوان بەهۆی پەرتەوازەیی و ناکۆکییە ناوخۆییەکانیانەوە، پێگەی بەهێزی کوردیان لە بەغدا لاواز کرد و پۆستە باڵاکانیان تەنها بۆ دەستکەوتی شەخسی و حزبی بەکارهێنا.
دەشڵێن، لەبری ئەوەی ئەو پۆستانە بکەنە قەڵغانێک بۆ پاراستنی قووتی خەڵک و جێبەجێکردنی ماددەی ١٤٠، دۆسیەی مووچە و خاکیان کردە قوربانیی ململانێ و سەوداکارییە سیاسییەکانی خۆیان. دەرئەنجامی ئەم سیاسەتە شکستخواردووەش، بێبەشبوونی پێشمەرگە و لێکترازانی ناوخۆیی و ڕادەستکردنی تەواوی کارتە بەهێزەکانی هەرێم بوو بە بەغدا.
