ڕاپۆرت: حەسەن یاسین
دەمێ بێدەنگیا مێژوویی و هاوارا جڤاکی دبیتە هەوێنێ شورەشەکا ریشەیی ل هەمبەر بێ دادپەروەریێ.
د مێژووا گەلان دا، چ مللەت نینن کو بو هەمیشە زولمێ ب بێدەنگی هەڵگرن . دەمێ گوشارێن سیاسی و ئابووری ژ ئاستێ بەرگەگرتنا ژیانێ دەرباز دبن، هەلویستێ جڤاکی ژ تەسلیمبوونێ دگۆهڕیت بۆ ڕووبەڕووبوونێ. ئەڤروو، جڤاك ل بەردەم وەرچەرخانەکا مێژوویی یا ئەڤان پێنج چەمکان دایە: برس، ترس، قێری، شورەش، و گوهرین. ئەڤ چەمکە ب تنێ پەیڤێن سەربەخو نینن، بەلکو زنجیرەکا لوژیکی یا رەوشا دەروونی و سیاسی یا جڤاکەکی نە کو بەرەڤ ئازادیێ هەنگاڤان دهاڤێژیت.
چەمکێ برسێ ل ڤێرێ ب تنێ کورت ئینانا نانی ل سەر سفڕێ نینە، بەلکو بێبەشکرنا مروڤی یە ژ بوهاترین مافێن خوە یێن بنەرەتی وەکی ئازادی، کەرامەت، و دادپەروەریا جڤاکی. دەمێ خەلك بو ماوەیەکێ درێژ ژ خزمەتگوزارییان و سەربەستیا ڕادەربرینێ، و دەرفەتێن ژیانێ بێبەش دبن، برس دبیتە ئێشەکا کوور د رحا جڤاکی دا. بەلێ خوراگری و بێدەنگیا جڤاکی سنورەك هەیە دەمێ ئەو سنور دهێتە بەزاندن، ئاستێ بێزاربوونا مەزن دەستپێدکەت.
د هەمان دەم دا، سیستەمێن زۆردار هەردەم هەول داینە دیوارێ ترسێ وەك دارەدەستەکێ بەرهەمدار ل هەمبەر هشیاریا جڤاکی ب کاربینن دا کو خەلك بێدەنگیێ رابگرن. بەلێ ل دووڤ یاسایێن سروشتێ دەروونی یێ جڤاکی ترسێ ژی تەمەنەکێ دیارکری هەیە؛ دەمێ ئازار و بێ دادپەروەری دگەهنە لوتکێ، دیوارێ ترسێ و خوراگرتنێ ژ دەست ددەت و ب تەمامی دکەڤیت. جڤاك پێنگاڤێ دهاڤێژیتە د قۆناغا قێریێ دا چونکی تشتەك نەمایە ل سەر بترسیت یان بپارێزیت، دەمێ کەرامەتا مروڤی کەفتە د مەترسیێ دا، ترس واتا خوە ژ دەست ددەت.
ئەڤ قێریا کو ئەڤروو دهێتە بیستن، ڕەنگڤەدانا تەقینا ئەوێ ئازارا کو ساڵانە د سنگێ جڤاکی دا کومکرین. ئەڤە پەیامەکا راستەوخو و ڕوونە بو هەمی لایەکی کو ڕەوشا نوکە بەردەوامبوونا وێ نەیا رەوایە و ناهێتە قەبوولکرن. بەلێ مێژووا پروسەیێن سیاسی مە فێردکەت کو قێری ب تنێ بێ نەخشەرێیەکا ئاقلمەندانە ناکەڤیتە د خزمەتا گوهرینێ دا و دبیت ب شێوەیەکێ بێهودە بێتە مەزاخستن.
ژبو کو ئەڤ ئازار و هەوارا گشتی ببیتە دەستکەفتەکێ مێژوویی، پێدڤیا حەتمی ب شورەشەکا ڕێکخستی و هوشمەند هەیە. شورەش ل ڤێرێ نەك ب تنێ هەرەشەکرن یان تێکدانا ئاڤاهیێن کەڤنە ، بەلکی دارشتنا ئایدولوژیا نی و ئاڤەدانکرنا بنەمایێن حوکمرانیەکا رەوا یە. گوهرینا ڕیشەیی ب رێکەفت یان ب هەلکەفت چێنابیت، بەلکو ئەنجامێ ڕێکخستن و گوهرینا ڤێ وزەیا جڤاکی یە بەرەڤ نویبونەڤەیێ.
سەرکەفتن هەبوونا سەرکێشیەکا هوشمەند و کاریزما یە داکو بکاریت تەوژمێ قێریێ ئاراستەی نەخشەڕێیەکا سیاسی یا دیار بکەت د هەمان دەم دا دەستڤەئینانا پالپشتیا دوو قولی ، چ ب ڕێکا ئێکگرتنا تەواو یا ناڤخویی یا چین و توێژێن جڤاکی ، چ ب ڕێکا دەستڤەئینانا هەڤسوزی و پشتەڤانیا نێڤدەولەتی، دو مەرجێن بنەرەتی نه بو وێ چەندێ کو داخوازیێن گەلی ل سەر ئاستێ هەرێمی و جیهانی ڕەوایەتیێ بگرن ، جڤاك ل ئاستا سەردەمەکێ نوو دایە، کو تێدا قێریا ئەڤرو دێ بیتە زەنگا دەستپێکرنا مێژووەکا نوو ل سەر بنەمایێ دادپەروەری، ئازادی و رێزگرتنا کەرامەتا مروڤی.